امید سبز شهرچه‌سی اهالیسی: طالبان اۉز اویلریمیز اوچون بیزدن اجاره حقی آلماقده
۸صبح
امید سبز شهرچه‌سی‌نینگ اَیریم اهالیسی اَیتیشیچه، طالبان عدلیه وزیرلیگی بیر خاندان‌نینگ هر بیر خانه‌سی اوچون اوشبو گروهگه تۉله‌ش مقصدیده ۴ مینگ افغانی اجاره حقی بېلگیله‌گن. اولر‌نینگ سۉزلریگه کۉره، اولر بوتون عمری دوامیده محنت قیلیب، اوی قورگن، اما اېندی اۉز اویلریدن طالبانگه اجاره حقی تۉله‌شگه مجبور بۉلماقده.
شهرچه اهالیسی اَیتیشیچه، طالبان عدلیه وزیرلیگی اجاره حقینی خانه‌لر سانیگه قره‌ب بېلگیله‌گن و هر بیر خانه اوچون آییگه ۴ مینگ افغانی اجاره حقی تعیینله‌گن. حال‌بوکه، اوی اېگه‌لری اۉز اویلری‌نینگ اجاره حقینی طالبانگه قنده‌ی قیلیب تۉله‌شی کېره‌کلیگینی سۉره‌ماقده. اولر اویلرینی اۉز مبلغلری حسابیدن قورگنینی و یېرینی هم اۉزلری ساتیب آلگنینی تأکیدله‌ماقده.
امید سبز شهرچه‌سی اهالیسی اَیتیشیچه، طالبان اۉتگن کون اولرگه اوشبو اجاره حقینی جاری ییل‌نینگ ثور آییدن باشلب تۉله‌شلری کېره‌کلیگی حقیده آگاهلنتیرگن. شونینگدېک، شهرچه‌ده‌گی برچه اوی اېگه‌لری اۉتگن آلتی آی اوچون اجاره حقینی هم طالبانگه تۉله‌شی کېره‌ک، عکس حالده ملکلرینی بۉشه‌تیشلری طلب قیلینه‌دی.
اولر‌نینگ سۉزلریگه کۉره، طالبان سۉنگگی بیر نېچه کون ایچیده امید سبز شهرچه‌سی اهالیسی‌نینگ اویلرینی تېکشیرگن و اجاره‌چیلرگه بوندن بویان اوی اجاره حقینی اوشبو گروه عدلیه وزیرلیگی‌نینگ بانک حساب رقمیگه تۉله‌شلری کېره‌کلیگینی اَیتگن. طالبان عدلیه وزیرلیگی هیاتی اجاره‌چیلرگه شکللرنی هم بېرگن و بوندن بویان اوی اجاره حقی اوشبو گروه‌نینگ بانک حساب رقمیگه اۉتکزیلیشی کېره‌کلیگینی تأکیدله‌گن.
شهرچه اهالیسی طالبان بونده‌ی باسیملر آرقه‌لی شهرچه‌نی بوتونله‌ی اهالی تصرفیدن چیقریب، اۉز نظارتیگه آلیشگه اورینه‌یاتگنینی تأکیدله‌ماقده.
شهرچه اهالیسیدن بیری اۉز شخصینی آشکار قیلمسلیک شرطی بیلن ۸صبح گزېته‌سیگه بېرگن اینتېرویوسیده شونده‌ی دېیدی: «بو ظلم و زۉرآورلیک دېگنی. مېن تۉرت خانه‌لی اۉز اوییم اوچون هر آی ۱۶ مینگ افغانی اجاره حقی تۉله‌شیم کېره‌ک. بو قرار اسلامی حکملر و عدالتدن کېلیب چیققنمی؟»
۱۴۰۵-ییل ثور آییده مرکزی حدودده‌گی طالبان تامانیدن تارتیب آلینگن یېرلر بیلن باغلیق ایشلرنی کۉریب چیقیش بۉییچه مخصوص محکمه اوشبو شهرچه‌ده‌گی ۱ مینگ ۵۰۷ جریب یېر میدانینی اۉز تصرفیگه آلگن و بو یېرلر بېش قِسمگه بۉلینگن حالده دولت اداره‌لری نامیگه رۉیخطدن اۉتکزیلگنینی همده جسمانی یاکه یوریدیک شخصلرگه اۉتکزیلمه‌گنینی دعوا قیلگن.
طالبان عدلیه وزیرلیگی اوشبو بویروقنی «شرعی» دېب اته‌گن و طالبانگه علاقه‌دار کمیسیونگه اونی عملگه آشیریش وظیفه‌سینی یوکله‌گن. اوشبو گروه شهرچه اوی اېگه‌لریگه یېر پولی و ضررنی آلیش اوچون ایلگری یېرنی اولردن ساتیب آلگن شخصلرگه مراجعت قیلیشنی اَیتگن.
۱۴۰۵-ییل اسد آییده طالبان عدلیه وزیری عبدالحکیم شرعی حدود وکیللری و مسجد اماملرینی چقیریب، اولرگه اویلرینی بۉشه‌تیش تۉغریسیده‌گی بویروقنی یېتکزگن. اولرگه جاری ییل‌نینگ ۱۵-اسدیگچه اویلرینی ترک اېتیشلری کېره‌کلیگی اَیتیلگن. شو بیلن بیرگه، او هر قنده‌ی بیتیم، آلدی-ساتدی و حتا خصوصی روشده اوی اجاره‌گه بېریش هم تقیقلنگنینی آگاهلنتیرگن، شونینگدېک، اَیریم کۉچمس ملک اداره‌لری هم مُهرلنگن.
منبعلر اَیتیشیچه، طالبان احتمال اېگه‌لری «یۉق» بۉلگن و خارجده یشه‌یاتگن اویلرنی اۉز تصرفیگه آلیشگه اورینماقده. اولر‌نینگ سۉزلریگه کۉره، بو جریان مجبوری کۉچیریش و احتمال اوشبو ملکلرنی باشقه شخصلرگه بېریب یوبارایش حقیدگی خواطرلرنی کوچه‌یتیرگن.
امید سبز شهرچه‌سی اهالیسی اوشبو قرارنی مطلقا «ظالمانه» دېب حسابله‌یدی و ملککه اېگه‌لیک قیلیش حجتلریده هېچ قنده‌ی حقوقی معما یۉقلیگینی، یېرلرینی شرعی حجتلر و رسمی بیتیملر آرقه‌لی ساتیب آلگنینی اَیتماقده.
بوندن آلدین شهرچه‌‌نینگ اېگه‌سی و اساسی سرمایه‌داری محمد نبی خلیلی ایشنی حجتلر اساسیده خالص قَیته کۉریب چیقیشنی طلب قیلگن و اوشبو لایحه اوّلگی حکومت دوریده تېگیشلی اداره‌لر نظارتی آستیده تشکیل اېتیلگنینی تأکیدله‌گن.
طالبان عدلیه وزیرلیگی هیاتی کېلیب، ینگی حکمنی اعلان قیلگنیدن سۉنگ، شهرچه اهالیسی بیر نېچه ییغیلیش و تۉپلنیشلر اۉتکزیب، طالبان رهبرلریدن اوشبو گروه عدلیه وزیرلیگی‌نینگ بیر تمانلمه حرکتلریگه چېک قۉییشنی و فقرالر‌نینگ حقوقلری پایمال قیلینیشیگه یۉل قۉیمسلیکنی سۉره‌گن.
شهرچه اهالیسی طالبان‌نینگ امید سبز شهرچه‌سیگه نسبتاً یانده‌شووینی تنلب قۉللنه‌یاتگن و خواطرلی دېب حسابله‌یدی همده بو مناسبت هزاره‌لر و شیعه‌لرگه نسبتاً کمسیتووچی طرزده عملگه آشیریله‌یاتگنینی اَیتماقده. بوندن آلدین هم هزاره و شیعه جماعه‌لری آقسقاللریدن عبارت هیاتلر طالبان ایچکی ایشلر وزیرلیگیگه مراجعت قیلگن اېدی. خبرلرگه کۉره، طالبان ایچکی ایشلر وزیرلیگی معاونلریدن بیری هبت‌الله بو باره‌ده بویروق بېرمه‌گونچه، مجبوری بۉشه‌تیش جریانی و باسیملر دوام اېتیشینی اَیتگن.
