خلق‌ارا روحی سلامتلیک کونی؛ جهان ساغلیقنی سقلش تشکیلاتی افغانستان اهالیسینی روحی باسیملردن حمایه قیلیشگه چقیردی
۸صبح، کابل: جهان ساغلیقنی سقلش تشکیلاتی‌نینگ افغانستاندهگی وکیلی‌نینگ اَیتیشیچه، مملکتده‌گی کۉپلب آدملر یقینلرینی یۉقاتیش و حیاتده‌گی قیینچیلیکلر سببلی روحی باسیمگه دوچ کېلماقده.
سالوادور شنبه کونی، ۱۸ میزان، خلق‌ارا روحی سلامتلیک کونی مناسبتی بیلن روحی سلامتلیککه اعتبار بېریش و اونی اسره‌ش جسمانی سلامتلیک کبی مهم اېکنینی تأکیدله‌دی.
او روحی معمالر بیلن کوره‌شه‌یاتگن انسانلر یالغیز اېمسلیگینی و یاردمگه محتاج اېکنینی بیلیشلری کېره‌کلیگینی قید اېتدی.
جهان ساغلیقنی سقلش تشکیلاتی وکیلی‌نینگ اَیتیشیچه، همدردلیک بیلن و حکم قیلمسدن تینگلش، بیر-بیرینی قۉللب-قوّتلش همده روحی سلامتلیک حقیده آچیق گپلشیش مستحکمراق عایله‌لر و ساغلامراق جمعیتلرنی شکللنتیریشگه یاردم بېره‌دی.
سالوادور بو ییلگی خلق‌ارا روحی سلامتلیک کونی‌نینگ «حیاتی تجربه‌لر تینگلنسین: حقیقی آوازلر، حقیقی اۉزگریشلر» شعاری انسانلر‌نینگ حیاتی حکایه‌لرینی تینگلش مهم‌لیگیگه اورغو بېریشینی قۉشیمچه قیلدی.
او یکونده آدملرنی بیر-بیرینی تینگلشگه، اۉزارا یاردم بېریشگه و یانمه-یان توریشگه چقیردی، تاکه هېچ کیم اعتبار و قۉللب-قوّتلشدن محروم قالمسین.
خلق‌ارا روحی سلامتلیک کونی هر ییلی ۱۰-اکتوبرده نشانلنه‌دی.
اوشبو کون‌نینگ مقصدی روحی سلامتلیک‌نینگ اهمیتی حقیده خبردارلیکنی آشیریش، روحی معمالر بیلن باغلیق اجتماعی تمغه‌گه قرشی کوره‌شیش همده برچه انسانلر‌نینگ قۉللب-قوّتلش و دوالنیش خدمتلریدن فایده‌لنیش امکانیتیگه اېگه بۉلیشی ضرورلیگینی تأکیدلشدن عبارت.
