طالبان یېتّی خصوصی بیلیم یورتی فعالیتینی تۉخته‌تدی
۸صبح، کابل: طالبان عالی اۉقوو وزیرلیگی «اۉقیش و اداری قانون‌بوزرلیکلر» سببلی یېتّی خصوصی بیلیم یورتی فعالیتینی بیر ییلگه تۉخته‌تگنی و ینه ایکّی بیلیم یورتی‌نینگ فعالیت یوریتیش رخصت‌نامه‌سی بېکار قیلگنینی معلوم قیلدی.
اوشبو وزیرلیک شنبه کونی، ۱۷-اسد، بو قرار ۱۴۰۵-ییل بهارگی سمسترینی تۉقّیزته خصوصی بیلیم یورتیده بهالشدن سۉنگ قبول قیلینگنینی اَیتدی.
طالبان بوندن آلدین هم اوشبو بیلیم یورتلرگه قانون‌بوزرلیکلر حقیده آگاهلنتیریش بېریلگنینی تأکیدله‌گن.
طالبان عالی اۉقوو وزیرلیگی‌نینگ اَیتیشیچه، «ساخته طلبه‌لر» موجودلیگی، حاضرینی ساخته‌لشتیریش، تعلیم آلیشدن چېتله‌تیلگن طلبه‌لرنی یکونی امتحانلرگه کیریتیش و عملی تعلیم اوچون ضرور جهازلر‌نینگ موجود اېمسلیگی اوشبو بیلیم یورتلرده انیقلنگن قانون‌بوزرلیکلردن اَیریملری دیر.
وزیرلیک اَیریم بیلیم یورتیلرده طلبه‌لر درسلرده منتظم قتنه‌شمسدن، لابراتوار‌لر و شفاخانه‌لرده عملی ایشلرنی بجرمسدن توریب، بیتیریشگه مناسب دېب تاپیلگنینی قۉشیمچه قیلدی.
اوشبو قرارگه کۉره، جوزجان‌ده‌گی برلاس، بلخ‌ده‌گی راه سعادت و تورکستان، بدخشان‌ده‌گی ازهر و برنا، فاریاب‌ده‌گی رشاد همده کابل‌ده‌گی پیام بیلیم یورتیلری‌نینگ فعالیتی بیر ییلگه تۉخته‌تیلگن.
شونینگدېک، قندوزده‌گی کهندژ یوکسک اۉقوو موسسه‌سی و تخارده‌گی خانه دانش‌نینگ فعالیت رخصت‌نامه‌لری بېکار قیلینگن.
