یونیسف افغانستانده آنه‌لر و ینگی توغیلگن چقه‌لاقلر سلامتلیگینی قۉللب-قوّتلش اوچون آزیق-آوقت قۉشیمچه‌لرینی تأمینله‌ماقده
۸صبح، کابل: بیرلشگن ملتلر تشکیلاتی‌نینگ باله‌لرنی قۉللب-قۉتلش جمغرمه‌سی (یونیسف) افغانستانده آنه‌لر و ینگی توغیلگن چقه‌لاقلر سلامتلیگینی قۉللب-قوّتلش مقصدیده حامله‌دار عیاللرگه آزیق-آوقت قۉشیمچه‌لرینی تقدیم اېته‌یاتگنینی معلوم قیلدی. بو آرقه‌لی اولر و فرزندلری ساغلام اۉسیش اوچون ضرور آزیق مادّه‌لرنی آلیشی کۉزده توتیلگن.
یونیسف یک‌شنبه کونی، ۲۸-سرطان، ایکس صحیفه‌سیده اوشبو دستور «بزوس عایله‌سی جمغرمه‌سی»نینگ باله‌لر طعاملنیشینی قۉللب-قوّتلش بۉلیمی یاردمیده عملگه آشیریله‌یاتگنینی یازدی.
اوشبو تشکیلات‌نینگ قۉشیمچه قیلیشیچه، آنه‌لر و ینگی توغیلگن چقه‌لاقلر حامله‌دارلیک دوریدن باشلب اۉزارا باغلیق بۉله‌دی و بو دورده یېترلی آزیق مادّه‌لرنی قبول قیلیش هر ایکّیسی‌نینگ سلامتلیگی اوچون مهم اهمیتگه اېگه.
یونیسف تأکیدلشیچه، حامله‌دار عیاللرگه آزیق-آوقت قۉشیمچه‌لرینی تقدیم اېتیش تشکیلات‌نینگ افغانستانده آنه‌لر و باله‌لر اۉرته‌سیده طعاملنیشنی یخشیلش همده آزیق مادّه‌لر یېتیشماوچیلیگی بیلن باغلیق خوفلرنی کمه‌یتیریشگه قره‌تیلگن سعی-حرکتلری‌نینگ بیر قِسمی دیر.
شو بیلن بیرگه، افغانستانده آنه‌لر و ینگی توغیلگن چقه‌لاقلر هلی هم یېترلی آوقت‌لنمسلیک همده طبی خدمتلردن چېکلنگن درجه‌ده فایده‌لنیش کبی معمالرگه دوچ کېلماقده. بو اېسه ینه‌ده کۉپراق قۉللب-قوّتلش ضرورلیگینی یقّال کۉرسه‌تماقده.
