بیرلشگن ملتلر تشکیلاتی: دنیاده ۴۲۶ میلیون عیال و قیز آغیر قشّاقلیک بیلن یوزمه-یوز کېلماقده
۸صبح، کابل: بیرلشگن ملتلر تشکیلاتی‌نینگ عیاللر تشکیلاتی ۲۰۲۶-ییلده دنیا بۉیلب قریب ۴۲۶ میلیون عیال و قیز آغیر قشّاقلیک شرایطیده یشه‌یاتگنینی معلوم قیلدی.
اوشبو تشکیلات شنبه کونی، ۱۷-اکتوبر، خلق‌ارا قشّاقلیککه برهم بېریش کونی مناسبتی بیلن اجتماعی حمایه تیزیملرینی مستحکملش همده ساغلیقنی سقلش و تعلیم خدمتلرینی کېنگه‌یتیریش اوچون کۉپراق سرمایه کیریتیشگه چقیردی.
بمت‌نینگ عیاللر تشکیلاتی اوشبو ساحه‌لرگه سرمایه کېریتیش‌لرنی کۉپه‌یتیریش دنیا بۉیلب عیاللر و قیزلر آره‌سیده قشّاقلیکنی کمه‌یتیریش همده اولر‌نینگ تورموش شرایطینی یخشیلش اوچون ضرورلیگینی تأکیدله‌دی.
شونینگدېک، اوشبو تشکیلات حکومتلر و مسؤول اداره‌لردن عیاللر و قیزلر اوچون تېنگ امکانیتلرنی تأمینلش، اولر‌نینگ اقتصادی و اجتماعی احوالینی یخشیلش مقصدیده ینه‌ده ثمره‌لی چاره‌لر کۉریشنی سۉره‌دی.
بو آره‌ده، ۲۰۲۱-ییل اگوستیده طالبان حاکمیتگه قَیته کېلگنیدن سۉنگ، افغانستاندهگی عیاللر و قیزلر تعلیم، بندلیک و اجتماعی حیاتده‌گی اشتراک باره‌سیده کېنگ کۉلملی چېکلاولرگه دوچ کېلماقده.
خلق‌ارا تشکیلاتلر عیاللر‌نینگ ایش بازاریدن چېتله‌تیلیشی قشّاقلیک و عایله‌لر‌نینگ ضعیفلیگینی آشیریش بیلن بیرگه، افغانستان اقتصادیاتی‌نینگ اۉسیشیگه همده مملکتده‌گی محنت صلاحیتیدن فایده‌لنیشگه تۉسقینلیک قیلیشینی بیر نېچه بار تأکیدله‌گن.
عیاللر‌نینگ ایش امکانیتلریدن محروم اېتیلیشی عایله‌لر‌نینگ اقتصادی قره‌ملیگینی آشیریب، اولر‌نینگ آزیق-طعام، تعلیم و ساغلیقنی سقلش خدمتلری کبی اساسی احتیاجلرینی تأمینلش امکانیتلرینی ینه‌ده چېکلب قۉیماقده.
