بیرلشگن ملتلر تشکیلاتی: ۲۰۲۵-ییلده ۱۳ مینگدن آرتیق باله تۉییب-آوقت‌لنمسلیکنی دوالش دستورلریدن محروم بۉلدی
۸صبح، کابل: جهان آزیق-آوقت دستوری (WFP) ۲۰۲۵-ییلده افغانستان بۉیلب قریب ۱۴۲ ته ساغلیقنی سقلش مرکزی یاپیلگنی و انسانپرورلیک یاردملری قیسقرگنی سبب ۱۳ مینگدن آرتیق باله تۉییب-آوقت‌لنمسلیکنی دوالش دستورلریدن محروم بۉلگنینی معلوم قیلدی.
مذکور تشکیلات سه‌شنبه کونی، ۱۳ اسد، اعلان قیلگن حساباتیده، قوراللی ماجرالر، ایشسیزلیک، آزیق-طعام نرخلری‌نینگ آشیشی و انسانپرورلیک یاردملری اوچون اجره‌تیلگن مبلغلر‌نینگ کمه‌ییشی افغانستانده تۉییب-آوقت‌لنمسلیک معماسی‌نینگ کوچه‌ییشیگه سبب بۉله‌یاتگن اساسی عامللر اېکنینی بیلدیرگن.
جهان آزیق-آوقت دستوری قۉشیمچه قیلیشیچه، جاری ییلده فعالیتینی دوام اېتتیره‌یاتگن آزیقلنتیریش دستورلری هم دوالاوچی آزیق-آوقت محصولاتلری‌نینگ کېسکین تنقیصلیگیگه دوچ کېلگن.
اوشبو تنقیصلیک یقین شرقده‌گی ماجرالر و پاکستان چېگره‌سی‌نینگ یاپیق قالیشی آرتیدن یوزه‌گه کېلگن.
مذکور تشکیلات‌نینگ بیلدیریشیچه، تأمینات یۉللریده‌گی اوزیلیشلر و خرجتلر‌نینگ آشیشی عاقبتیده افغانستاندهگی تۉییب-آوقت‌لنمسلیکدن اذیت چېکه‌یاتگن قریب بیر میلیون آنه و باله بېش آی دوامیده ضرور آزیقلنتیریش خدمتلریدن محروم قالگن.
جهان آزیق-آوقت دستوری آگاهلنتیریشیچه، مبلغ یېتیشماوچیلیگی دوام اېتسه، باله‌لر و آنه‌لر‌نینگ حیاتی اهمیتگه اېگه آزیقلنتیریش خدمتلریدن فایده‌لنیش امکانیتی ینه‌ده چېکلنه‌دی همده افغانستاندهگی تۉییب-آوقت‌لنمسلیک بحرانی ینه‌ده چوقورلشه‌دی.
