جهان ساغلیقنی سقلش تشکیلاتی ۲۰۲۵-ییلده افغانستان‌نینگ ۳۴ ولایتیده ساغلیقنی سقلش خدمتلری کۉرسه‌تگنینی معلوم قیلدی
۸صبح، کابل: جهان ساغلیقنی سقلش تشکیلاتی (WHO) معلوم قیلیشیچه، عملیاتده‌گی قیینچیلیکلرگه قره‌مه‌ی، ۲۰۲۵-ییلده افغانستان‌نینگ برچه ۳۴ ولایتیده ضرور و حیاتنی سقلب قالووچی ساغلیقنی سقلش خدمتلرینی دوام اېتتیرگن.
تشکیلات پنج‌شنبه کونی، ۸ اسدده، ۲۰۲۵-ییل بۉییچه ییللیک حساباتینی اعلان قیلیب، بیرینچی طبی یاردمنی مستحکملش، ساغلیقنی سقلش ساحه‌سیده‌گی ملی استوار یۉنه‌لیشلرنی ایلگری سوریش همده ساغلیقنی سقلش تیزیمینی یره‌تیشنی هم قۉللب-قوّتله‌گنینی بیلدیردی.
حساباتگه کۉره، اۉتگن ییلی کلینیکلر، شفاخانه‌لر، شاشیلینچ یاردم بۉلیملری و طبی گروهلر بېمارلر سانی‌نینگ آرتیشی همده ساغلیقنی سقلش خدمتلریگه بۉلگن طلب‌نینگ آشیشیگه دوچ کېلگن.
جهان ساغلیقنی سقلش تشکیلاتی قۉشیمچه قیلیشیچه، ییل‌نینگ اېنگ مهم یوتوقلریدن بیری ملی ساغلیقنی سقلش سیاستی‌نینگ یۉلگه قۉییلیشی همده طالبان ساغلیقنی سقلش وزیرلیگی بیلن «۲۰۲۵–۲۰۳۰-ییللرگه مۉلجللنگن ملی ساغلیقنی سقلش استراتیژیسی»نی ایشلب چیقیش بۉییچه همکارلیک‌نینگ باشلنیشی بۉلگن.
حساباتده اَیتیلیشیچه، اوشبو همکارلیک تخنیکی یاردم، عملیات دستورلر و صلاحیتنی آشیریش فعالیتلرینی ملی استوار یۉنه‌لیشلر بیلن ینه‌ده اویغونلشتیریشگه خدمت قیلگن.
جهان ساغلیقنی سقلش تشکیلاتی تأکیدلشیچه، مذکور چاره-تدبیرلر بیرینچی طبی یاردمنی مستحکملش، خدمتلر صفتینی یخشیلش همده افغانستان خلقی اوچون ینه‌ده برقرار و عدالتلی ساغلیقنی سقلش تیزیمینی یره‌تیشگه یاردم‌لشگن.
