جهان ساغلیقنی سقلش تشکیلاتی: معتاد شخصلر دوالنیش خدمتلریدن فایده‌لنیشده تۉسیقلرگه دوچ کېلماقده
۸صبح، کابل: جهان ساغلیقنی سقلش تشکیلاتی (WHO)نینگ اَیتیشیچه، دوالنیش خدمتلری حقیده معلومات‌نینگ چېکلنگنی، اوزاق مدتلی قره‌ملیکدن خلاص بۉلیش‌نینگ قیینلیگی و اجتماعی تمغه‌لش معتاد شخصلر‌نینگ دوالنیش امکانیتلریدن فایده‌لنیشیگه تۉسقینلیک قیله‌یاتگن اساسی عامللردیر.
اوشبو تشکیلات دوشنبه کونی، ۴ عقرب، مخدره مادّه‌لرنی استعمال قیلیش عاقبتیده یوزه‌گه کېلگن بوزیلیشلردن اذیت چېکه‌یاتگن کۉپلب شخصلر دوالنیشگه محتاج بۉلیشلریگه قره‌مه‌ی، اوشبو تۉسیقلر سببلی طبی خدمتلردن آسانلیک بیلن فایده‌لنه آلمه‌یاتگنینی خبر قیلدی.
جهان ساغلیقنی سقلش تشکیلاتی اوشبو شخصلرگه یاردم بېریش مقصدیده کۉچمه ترغیبات و اجتماعی قۉللب-قوّتلش گروهلری فعالیتینی تیلگه آلدی. بو گروهلر یاردمگه محتاج شخصلرنی انیقلب، اولرنی دوالش مرکزلریگه یۉنه‌لتیره‌دی.
تشکیلات‌نینگ اَیتیشیچه، دوالش خدمتلری مصلحت بېریش، طبی کوزه‌توو و روحی-اجتماعی یاردمنی اۉز ایچیگه آله‌دی. بو خدمتلر شخصلرگه ساغه‌ییش و حیاتلرینی قَیته تیکلش جریانیده یاردم بېریشی ممکن.
جهان ساغلیقنی سقلش تشکیلاتی‌نینگ افغانستاندهگی وکیلی مخدره مادّه‌لرگه قره‌ملیکدن اذیت چېکه‌یاتگن برچه شخصلر صفتلی و علمی دلیللرگه اساسلنگن طبی یاردمدن فایده‌لنیش امکانیتیگه اېگه بۉلیشی کېره‌کلیگینی تأکیدله‌دی.
تشکیلات افغانستانده کۉپراق انسانلر و عایله‌لرگه یاردم بېریش اوچون دوالش خدمتلری همده اجتماعی قۉللب-قوّتلشگه برقرار سرمایه کیریتیش ضرورلیگینی قۉشیمچه قیلدی.
