۸صبح، کابل: خبرگزاری رویترز به نقل از پارلمان تاجیکستان گزارش داده که قرار است چین هزینه ساخت یک پایگاه برای واحد نیروهای ویژه پولیس این کشور را در نزدیکی مرز تاجیکستان و افغانستان تامین کند.
رویترز روز پنج‌شنبه، ششم عقرب گفته است که این پایگاه در ولایت خودمختار گورنو-بدخشان، در کوه‌های پامیر ساخته خواهد شد. این منطقه با ایالت سین‌کیانگ چین و ولایت بدخشان افغانستان نیز هم سرحد است.
سخنگوی پارلمان تاجیکستان اما تأکید کرده است که هیچ نیروی چینی در این پایگاه مستقر نخواهد شد. این پایگاه در حالی در نوار مرزی افغانستان و تاجیکستان ساخته خواهد شد که هنوز هم تنش‌ها میان دوشنبه و حکومت طالبان پابرجاست.
این تنش‌ها پس از آن اوج گرفت که امام علی رحمان، رییس جمهور تاجیکستان از حکومت تک قومی طالبان انتقاد کرده و از آنان خواسته که به تمامی گروه‌های قومی در حکومت سهم دهند.
طالبان به نوبه خود تاجیکستان را به مداخله در امور داخلی افغانستان متهم کرده و یک نیروی ویژه را در مناطق شمالی کشور مستقر کرده‌اند.
