۸صبح: کابل: منابع محلی می‌گویند که در پی درگیری مسلحانه میان گروهی از قاچاق‌بران مواد مخدر از باشندگان ولسوالی چاه‌آب ولایت تخار و مرزبانان تاجیکستان، ۱۰ تن از قاچاق‌بران کشته شده‌اند.
منابع روز پنج‌شنبه، ۷ عقرب، در گفت‌وگو با روزنامه ۸صبح گفته‌اند که این درگیری شامگاه ۲۷ اکتوبر ۲۰۲۶ در مناطق سرچشمه و قواق، در نزدیکی مرز تاجیکستان، رخ داده است.
به گفته منابع، این افراد هنگام عبور غیرقانونی از مرز و انتقال مواد مخدر، در منطقه سرچشمه، در ولسوالی شمس‌الدین شاهین تاجیکستان، با مرزبانان این کشور روبه‌رو شدند و میان دو طرف درگیری مسلحانه صورت گرفت.
منابع می‌افزایند که در نتیجه این درگیری، افراد یادشده کشته شده‌اند و جسدهای آنان به سمت افغانستان انتقال داده شده است.
به گفته منابع، افراد دخیل در این رویداد با شبکه قاچاق مواد مخدر مرتبط بوده‌اند که به گفته آنان، با «حاجی بشر نورزی» ارتباط دارد و از سوی «حاجی غلام حیدر لنگ» مدیریت می‌شود.
