۸صبح، کابل: به دنبال کشته شدن پنج شهروند چین در پی حملاتی از خاک افغانستان در مرز تاجیکستان، امیرخان متقی، وزیر خارجه طالبان، با بحرالدین مهرالدین، همتای تاجیک خود، درباره این رویداد گفت‌وگوی تلفنی کرده‌اند.
وزارت خارجه طالبان روز سه‌شنبه، ۱۱ قوس، در خبرنامه‌ای مدعی شده که متقی این حمله را محکوم کرده است.
متقی در این گفت‌وگوی تلفنی تأکید کرده است که برخی حلقات به دنبال آسیب‌زدن به روابط میان تاجیکستان و طالبان هستند.
طالبان برای تحقیق و بررسی حمله از خاک افغانستان بر شهروندان چین در مرز تاجیکستان اعلام آماده‌گی کرده‌اند.
طبق خبرنامه طالبان، وزیر خارجه تاجیکستان نیز خواهان هماهنگی و تأمین امنیت مرزی با طالبان شده است.
در خبرنامه آمده است: «دو طرف توافق کردند که تماس‌های منظم میان نیروهای مرزی، کمیته‌های مشترک همکاری‌های امنیتی و نشست‌های تخنیکی ادامه یابد تا منطقه شاهد اعتماد متقابل بیشتر و ثبات افزون‌تر باشد.»
این گفت‌وگو در حالی انجام شده است که دفتر ریاست جمهوری تاجیکستان روز گذشته از کشته‌شدن پنج شهروند چین در مرز با افغانستان خبر داده و افزوده است که پنج تن دیگر زخمی شده‌اند.
رویترز گزارش داده است که سه شهروند چینی توسط هواپیمای بی‌سرنشین از داخل خاک افغانستان هدف قرار گرفته‌اند.
مقام‌های تاجیکستان همواره از حضور گروه‌های تروریستی و افراطی زیر حمایت طالبان در افغانستان هشدار داده است.
