فاتح قۉلگه آلینگنیدن سۉنگ؛ طالبان اونینگ آدملری و کوچلری بیلن نیمه قیله‌دی؟
محلی منبعلر بدخشانده جمعه‌خان فاتح‌گه یقین بۉلگن شخصلرنی حبسگه آلیش، اویمه-اوی تینتوو اۉتکزیش همده طالبان‌نینگ مخصوص کوچلری تامانیدن یوزلب دانه قورال و اۉق-دارو قوتیلری ییغیب آلینیشی دوام اېته‌یاتگنینی خبر قیلماقده. منبعلرگه کۉره، عینی پیتده اَیریم تومنلرده کانچیلیک فعالیتیگه قۉییلگن چېکلاولر کوچه‌یتیریلگن و محلی طالبلر پشتون ملتیگه منسوب کوچلر بیلن المشتیریلیشی رېجه‌لشتیریلماقده. منبعلر، شونینگدېک، نسی تومنی چېگره کوچلری قرارگاهیده ۲۰ نفردن آرتیق خارجی جنگری، جمله‌دن انصارالله اعضالری، اویغورلر و پاکستان طالبان حرکتی اعضالری بارلیگینی دعوا قیلماقده. اولر فارسچه و پشتو تیللرینی بیلمه‌یدی. منبعلرگه کۉره، اولردن تۉرت نفری تاجیکستان شېوه‌سیده گپلشه‌دی و خارجلیک بۉلیشلریگه قره‌مه‌ی، برچه‌سیده افغانستان شخصی گواهنامه‌سی بار.
منبعلر اَیریم تومنلرده جمعه‌خان فاتح حبسگه آلینگنیدن سۉنگ، اونینگ اوکه‌سی عبدالفتاح هم حبسگه آلینیب، قماققه تشلنگنینی اَیتماقده. او نسی تومنیده‌گی کانلر اوچون مسؤول بۉلگن و قاچیشگه اورینگن.
منبعلرگه کۉره، فاتح‌گه یقین شخصلردن بۉلگن مولوی اقرارالدین و اونینگ اۉغلی فیض‌آبادگه باریشنی رېجه‌لشتیرگن پیتده یۉلده طالبان تامانیدن داعش بیلن علاقه‌لری بارلیگی عیبلاوی بیلن حبسگه آلینگن. شونینگدېک، منبعلر جمعه‌خان فاتح‌نینگ مالیوی همکارلریدن بیری بۉلگن تاج‌ولی شکی تومنی‌نینگ خواه قیشلاغیده خان‌الدین اسملی شخص‌نینگ اوییده یشیرینگن پیتده طالبان جنگریلری تامانیدن حبسگه آلینیب، قماققه تشلنگنینی قۉشیمچه قیلماقده.
منبعلر نسی تومنی‌نینگ جوی، شوریان‌دره و شاخ دره قیشلاقلری همده باشقه اَیریم حدودلرده طالبان مخصوص کوچلری تامانیدن اویمه-اوی تینتوولر هنوز دوام اېته‌یاتگنینی اَیتماقده. منبعلرگه کۉره، حاضرگچه ۶۵۰ دانه‌دن آرتیق یېنگیل قورال و ۳۵ دانه آغیر قورال ییغیب آلینیب، مرکزگه آلیب کېتیلگن، شونینگدېک، تورلی خیل ۵۰۰ دن آرتیق قوتی اۉق-دارو تاپیلگن.
شونینگدېک، منبعلر طالبان‌نینگ شکی تومنیده‌گی مخصوص بۉلینمه‌لری جمعه‌خان فاتح‌گه یقین شخصلردن بیری بۉلگن محراب‌الدیننی اوشبو تومن‌نینگ غمی قیشلاغیدن حبسگه آلگنی و اوندن ۳۵ دانه قورال ییغیب آلینگچ، اونی آزاد قیلگنینی اَیتماقده.
منبعلر بدخشانده‌گی طالبان کانلر باشقرمه‌سی رخصتیسیز محلی اهالی اوچون کانچیلیک بیلن شغللنیش تقیقلنگنینی، فقط آدملر اوّل قزیب آلگن ماتریاللرنی یوویشگه رخصت بېریلیشینی اَیتماقده. منبعلرگه کۉره، مایمی و خواهان تومنلریگه پشتون ملتیگه منسوب شخصلردن تشکیل تاپگن طالبان مخصوص بۉلینمه‌لری جایلشتیریلگن و اولر محلی طالبلرگه ایشانمه‌یدی.
محلی منبعلر پشتون ملتیگه منسوب طالبلر محلی طالبلرگه ایشانمسلیگینی و یقین آره‌ده برچه محلی طالبلر المشتیریلیب، اولر‌نینگ اۉرنیگه پشتون ملتیگه منسوب طالبلر جایلشتیریلیشی رېجه‌لشتیریله‌یاتگنینی اَیتماقده. منبعلر، شونینگدېک، بدخشان‌نینگ زیبا‌ک تومنیده آزادلیک جبهه‌سی‌نینگ هجوملری دوام اېته‌یاتگنینی و حاضرگچه تۉرت نفر طالب اۉلدیریلیب، یېتّی نفری یره‌لنگنینی قۉشیمچه قیلماقده. منبعلر دعواسیگه کۉره، تۉقنه‌شوولر دوامیده آزادلیک جبهه‌سی‌نینگ بیر اعضاسی هم یره‌لنگن.
منبعلر تورلی دروازه‌ها حدودلری و چېگره منطقه‌لریده قتنه‌ب یورگن پشتون ملتیگه منسوب طالبلر آره‌سیده انصارالله جنگریلری، اویغورلر و پاکستان طالبان حرکتی (تی‌تی‌پی) اعضالری هم بارلیگینی تصدیقله‌ماقده. محلی منبعلر طالبان صفیده‌گی ۲۰ نفردن آرتیق خارجی جنگری نسی تومنی‌نینگ چېگره کوچلری قرارگاهیده بارلیگینی اَیتماقده. منبعلرگه کۉره، بو شخصلر فارسچه و پشتو تیللرینی بیلمه‌یدی، اولردن تۉرت نفری تاجیکستان شېوه‌سیده گپلشه‌دی و برچه‌سیده افغانستان شخصی گواهنامه‌سی بار.
عینی پیتده، نسی تومنی اهالیسی‌نینگ اَیریملری طالبان جمعه‌خان فاتح‌گه علاقه‌دار بیر قطار شخصلر‌نینگ اویلرینی مخصوص اۉرگه‌تیلگن ایتلردن فایده‌لنیب تینتوو قیلگنینی تصدیقله‌ماقده. بو حرکت اوشبو گروه‌نینگ اوّلگی حکومت دوریده‌گی قراریگه ضد. طالبان اۉشه پیتده اویلرنی تینتوو قیلیشده ایتلردن فایده‌لنیشنی افغانستان‌نینگ اسلامی و خلق قدریتلریگه ضد دېب اته‌گن همده بو مسأله‌دن خوفسیزلیک و خلق‌ارا کوچلرگه قرشی ترغیباتیده فایده‌لنگن.
طالبان‌نینگ ناراضی قوماندانی جمعه‌خان فاتح پشتون ملتیگه منسوب طالبان جنگریلری بیلن بیر هفته دوام اېتگن تۉقنه‌شوولردن سۉنگ اوشبو گروهگه تسلیم بۉلگن. او طالبان اوردوسی باشلیغی تامانیدن کابلگه آلیب کېتیلگن. طالبان اونی حبسگه آلگنیدن سۉنگ، اونینگ بیر قطار کوچلرینی آتیب تشله‌گن و اولر‌نینگ جسدلرینی هم تحقیرله‌گن. عینی پیتده فاتح‌گه علاقه‌دار جنگریلر‌نینگ قوراللرینی ییغیش و قورالسیزلنتیریش جریانی دوام اېتماقده.
فاتح جاری ییل‌نینگ ۲۶-اسد کونی طالبان اوردوسی باشلیغی فصیح‌الدین فطرت‌نینگ واسطه‌چیلیگی بیلن جنگنی تۉخته‌تیب، اوشبو گروهگه تسلیم بۉلگن.
اوّلراق بدخشان‌نینگ نسی تومنی اهالیسی طالباننی «اوروش جنایتی» صادر اېتیش و تینچ اهالیگه نسبتاً یامان مناسبتده بۉلیشده عیبله‌گن اېدی. اولر طالبان «۸۲-تۉپ»دن فایده‌لنیب، قیشلاقلر تامان اۉق اوزگنی و تینچ اهالینی نشانگه آلگنینی دعوا قیلگن. شونینگدېک، اولر‌نینگ اَیتیشیچه، طالبان اۉز جانیگه قصد قیلووچی درانلردن فایده‌لنگن و بو‌نینگ عاقبتیده کانلر‌نینگ بیر نېچه ایشچیسی هلاک بۉلگن و یره‌لنگن.
