فایق: پاکستان‌نینگ کابلده‌گی هوا هجومی فاجعه‌لی و قبول قیلیب بۉلمه‌یدیگن
۸صبح، کابل: افغانستان‌نینگ بیرلشگن ملتلر تشکیلاتیده‌گی دایمی وکالت‌خانه‌سی سرپرستی، پاکستان‌نینگ کابلده‌گی «امید» ناملی مخدره ماده‌لرگه چلینگنلرنی دوالش مرکزیگه قیلگن هوا هجومی عاقبتیده تینچ اهالی جان بېریشی و یره‌لنیشینی فاجعه‌لی و قبول قیلیب بۉلمه‌یدیگن دېب اعلام قیلدی.
فایق سه‌شنبه کونی، ۲۶- حوت، ایکس صحیفه‌سیده یازیشیچه، کسلخانه‌لر و تینچ اهالینی نشانگه آلیش خلق‌ارا قانونلرنینگ جدّی بوزیلیشی حسابلنه‌دی و «اوروش جنایتی» صفتیده بهالنیشی ممکن.
او بو مساله یوزه‌سیدن مستقل و شفّاف تېرگاو اۉتکزیلیشینی طلب قیلگن همده بونده‌ی قانون‌بوزرلیکلرنی درحال تۉخته‌تیش و تینچ اهالینی حمایه قیلیش ضرورلیگینی تاکیدله‌گن.
شوندی بیرحالده، افغانستانده بیرلشگن ملتلر تشکیلاتی‌نینگ وکالت‌خانه‌سی (یوناما) هم بوتون افغانستان بۉیلب تینچ اهالی طالبان و پاکستان اۉرته‌سیده‌گی دوام اېته‌یاتگن تۉقنه‌شوولر قربانی بۉلیب قاله‌یاتگنینی معلوم قیلگن.
سۉنگّی هفته‌لرده طالبان و پاکستان اۉرته‌سیده‌گی حربی هجوملر و تۉقنه‌شوولر کوچه‌یگن و نتیجه‌ده افغانستانده کۉپلب تینچ اهالی هلاک بۉلگن، یره‌لنگن و کۉچیریلگن.
