فائو و جهان بانکی افغانستانده اېکینچیلیک بیزنسلرینی مالیوی قۉللب-قوّتلش بۉییچه قۉشمه دستورنی باشله‌دی
۸صبح، کابل: بیرلشگن ملتلر تشکیلاتی‌نینگ آزیق-آوقت و اېکینچیلیک تشکیلاتی (فائو) همده جهان بانکی افغانستانده اېکینچیلیک بیزنسلرینی مالیوی قۉللب-قوّتلش، ایش ا‌ۉرینلری یره‌تیش و قیشلاق اقتصادیاتینی مستحکملش اوچون قۉشمه دستور باشله‌دی.
فائو چهارشنبه کونی، ۳۰ ثور، اوشبو دستور دایره‌سیده بېش ته اېکینچیلیک بیزنسی ایشلب چیقریشنی کېنگه‌یتیریش اوچون مالیوی یاردم‌نینگ ایلک آلووچیلری صفتیده تنلنگنینی معلوم قیلدی.
حساباتگه کۉره، اوشبو دستور افغانستان اېکینچیلیک سکتورینی تیکلش مقصدیده یۉلگه قۉییلگن بۉلیب، تنلنگن بیزنسلر هرات، کاپیسا، قندوز، لوگر و تخار ولایتلریده فعالیت یوریته‌دی.
اوشبو کمپنیلر اېکینچیلیک اوروغلری، زعفران، سوت محصولاتلری، سویا قَیته ایشلش و آزیق-آوقت محصولاتلری ساحه‌لریده ایشله‌یدی همده اۉز سرمایه‌لریدن تشقری، قَیته ایشلش قوّتینی و بازارگه کیریش امکانیتلرینی آشیریش اوچون اوشبو دستور مالیوی یاردمیدن هم فایده‌لنه‌دی.
دستلبکی سرمایه‌لر کاپیساده سویا یاغینی تازه‌لش، تخارده «قویاش انرژیسیگه اساسلنگن سوت فعالیتلری» و قندوزده زعفراننی قَیته ایشلش مرکزلرینی جهازلشنی اۉز ایچیگه آله‌دی.
فائونینگ ایتیشیچه، اوشبو دستور عملگه آشیریلیشی ایشلب چیقریش، قَیته ایشلش، لوجستیک و مارکیتینگ ساحه‌لریده تۉغریدن-تۉغری همده بالواسطه ایش ا‌ۉرینلری یره‌تیلیشیگه سبب بۉله‌دی و تنلنگن بېش بیزنسدن اوچته‌سیگه عیاللر رهبرلیک قیله‌دی.
حساباتگه کۉره، اوشبو دستور جهان بانکی نینگ مالیوی همکارلیگیده‌گی فوق العاده آزیق-آوقت خوفسیزلیگی لایحه‌سی آرقه‌لی عملگه آشیریلماقده و اونینگ مقصدی افغانستاندهگی کیچیک و اۉرته اېکینچیلیک بیزنسلری نینگ رۉلینی مستحکملش دیر.
