فایو: ایسّیقخانهلر سوو مصرفینی ۶۰ فایزگه کمهیتیرهدی
۸صبح، قندهار: بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (فایو) ایسّیقخانهلردن تامچیلهتیب سوغاریش تیزیمی بیلن فایدهلنیش اېکینچیلیک ساحهسیده سوو مصرفینی ۶۰ فایزگچه کمهیتیریشی ممکنلیگینی اَیتدی.
فایو دوشنبه کونی، ۳۰ سنبله، ایکس صحیفهسیده اروپا اتفاقینینگ یاردمیده و بیرلشگن ملتلر تشکیلاتی ترقیات دستوری (UNDP) همکارلیگیده قندهاردهگی دهقانلر اوچون تامچیلهتیب سوغاریش تیزیمی بیلن جهازلنگن ایسّیقخانهلر قوریلگنینی یازدی.
اوشبو تشکیلات ایسّیقخانهلر سوودن ثمرهلیراق فایدهلنیش آرقهلی موسمدن تشقری محصولات یېتیشتیریش همده عایلهلر و بازار اوچون تۉییملی سبزهواتلر بیلن تأمینلش امکانینی بېریشینی قۉشیمچه قیلدی.
فایونینگ افغانستاندهگی تخنیکی مصلحتچیسی اشرف الهواومدهنینگ اَیتیشیچه: «سوو اوشبو حدوددهگی دهقانلر اوچون اساسی چېکلاولردن بیری دیر. ایسّیقخانهلرده سبزهوات یېتیشتیریش، تامچیلهتیب سوغاریش و تېگیشلی اېکینچیلیک اصوللری کبی اقلیمگه ماس عقللی تکنالوژیلر دهقانلرگه چېکلنگن سوو و یېر منبعلریدن یخشیراق فایدهلنیشگه یاردم بېریشی ممکن.»
فایو معلوماتیگه کۉره، اوشبو ایسّیقخانهلردن بیرینینگ میدانی قریب ۴۰۰ متر مربع بۉلیب، او آلتی نفر دهقان اۉرتهسیده عمومی فایدهلنیلهدی.
فایو دهقانلر اوچون اوروغ، اۉغیت، اسباب-اسکونهلر و تخنیکی تعلیم هم تقدیم اېتیلگنینی قۉشیمچه قیلدی.
اوشبو بیرلشگن ملتلر تشکیلاتی ادارهسی دهقانلرگه کۉچتلرنی باشقریش، سوغاریش، اۉغیتلش، اۉسیملیکلرنی کېسیش همده آفتلر و کسللیکلرگه قرشی کورهش بۉییچه تعلیم بېریلهیاتگنینی تأکیدلهدی.
اوشبو دستور «افغانستان جماعهلرینینگ برقرارلیگی» لایحهسینینگ بیر قِسمی بۉلیب، اروپا اتفاقینینگ مالیوی یاردمی همده فایو، بیرلشگن ملتلر تشکیلاتی ترقیات دستوری، خلقارا مهاجرت تشکیلاتی (IOM) و بیرلشگن ملتلر تشکیلاتینینگ مخدره مادّهلر و جنایتچیلیککه قرشی کورهش باشقرمهسی (UNODC) همکارلیگیده قندهار، هلمند و بادغیس ولایتلریده عملگه آشیریلماقده.
