بېش ییللیک محروملیک؛ افغانستاندهگی طلبه قیزلر تعلیمسیز کېله‌جکدن خواطرده
۸صبح، هرات: افغانستان طالبان قۉلیگه قوله‌گنیگه بېش ییل تۉلیشی بیلن بیر وقتده، بیر قطار طلبه قیزلر بو دور مابینیده اۉقیشنی دوام اېتتیریش، تعلیم آلیش امکانیتلری و ترقیات‌نینگ کۉپلب ساحه‌لریدن محروم بۉلگنینی اَیتماقده.
بو قیزلر شنبه کونی، ۱۷-اسد، ۸صبح گزېته‌سیگه بېرگن صحبتیده قیزلر تعلیمیگه قۉییلگن تقیق دوام اېته‌یاتگن بیر پیتده، اۉز تقدیرلری هم آنه‌لری و بوویلری کبی تعلیم و اجتماعی امکانیتلردن محروملیک بیلن باغلنیب قالیشیدن خواطرده اېکنینی اَیتدی.
اولر‌نینگ اَیتیشیچه، سۉنگگی بېش ییل دوامیده تعلیمدن محروم بۉلیش اولر‌نینگ مستقل کېله‌جک قوریش امکانیتلرینی چېکله‌گن، مجبوری تورموش قوریشدن خواطر اېسه اولر‌نینگ تشویشلرینی ینه‌ده آشیرگن.
طلبه قیزلر طالباندن عیاللر و قیزلرگه نسبتاً تعلیم چېکلاولرینی بېکار قیلیشنی همده اولر‌نینگ بیلیم یورتلر و تعلیم مرکزلریگه قَیتیشی اوچون شرایط یره‌تیشنی سۉره‌ماقده.
طالبان ۱۴۰۰-ییلده افغانستان اوستیدن نظارتنی قۉلگه کیریتگنیدن سۉنگ، عیاللر و قیزلرگه نسبتاً کېنگ کۉلملی چېکلاولر جاری قیلگن.
قیزلر‌نینگ مکتب و بیلیم یورتلرده اۉقیشنی دوام اېتتیریشیگه یۉل قۉییلمه‌گن و اولر‌نینگ محنت قیلیشی، حرکتلنیشی همده اجتماعی ساحه‌لرده‌گی اشتراکیگه هم باشقه چېکلاولر قۉییلگن.
بو چېکلاولر انسان حقوقلری تشکیلاتلری و خلق‌ارا تشکیلاتلر‌نینگ کېنگ کۉلملی ناراضیلیگیگه سبب بۉلگن و اولر بیر نېچه بار طالباندن عیاللر و قیزلر‌نینگ تعلیم آلیش همده اجتماعی حیاتده اشتراک اېتیش حقوقینی کفالتلشنی سۉره‌گن.
