آزادلیک جبهه‌سی دعواسی: کابل-بدخشان یۉنه‌لیشیده یېتّی نفر طالبان جنگچیسی اۉلدیریلدی
۸صبح، کابل: افغانستان آزادلیک جبهه‌سی کابل–بدخشان یۉنه‌لیشیده طالبان‌نینگ حربی کاروانیگه اویوشتیریلگن راکت هجومی عاقبتیده اوشبو گروه‌نینگ یېتّی نفر جنگچیسی اۉلدیریلگنی، ینه آلتی نفری یره‌لنگنینی دعوا قیلدی.
مذکور جبهه یک‌شنبه کونی، ۴-اسد، اعلان قیلگن بیاناتیده اوشبو هجوم اۉتگن آقشام بغلان ولایتی‌نینگ دوشی تومنی حدودیده عملگه آشیریلگنینی معلوم قیلدی.
بیاناتگه کۉره، نشانگه آلینگن کاروان طالبان‌نینگ قۉشیمچه کوچلری و حربی جهازلرینی آلیب کېته‌یاتگن بۉلیب، کابلدن بدخشان ولایتی تامان حرکتلنه‌یاتگن اېدی.
آزادلیک جبهه‌سی قۉشیمچه قیلیشیچه، اولر‌نینگ کوچلری اوشبو کارواننی کابلدن یۉلگه چیققن پیتدن باشلب کوزه‌تیب بارگن و شمالی سالنگ یۉلیده اونگه راکت هجومینی اویوشتیرگن.
مذکور جبهه، شونینگدېک، اوشبو عملیات دوامیده اۉز کوچلریگه هېچ قنده‌ی ضرر یېتمه‌گنینی هم بیلدیرگن.
افغانستان آزادلیک جبهه‌سی اۉتگن کون هم بدخشان‌نینگ زیباک تومنیده طالبان‌نینگ ایکّیته حربی درونینی نشانگه آلیب، یۉق قیلگنینی دعوا قیلگن اېدی.
