بدخشانده آلتین قزیب آلیش؛ طالبان‌نینگ شریکلری فعال باشقه‌لر‌نینگ سرمایه‌سی اېسه تۉخته‌تیلگن
حبیبه چکری
بیر قطار آلتین قزیب آلووچیلر و بدخشاندهگی آلتین یوویش اوستاخانه‌لری اېگه‌لری اوشبو ولایتده کانچیلیک‌نینگ رسمی فعالیتی ایکّی آیدن بویان تۉخته‌تیلگنینی اَیتماقده. اولر کانلرنی قزیب آلیش اوچون سرمایه کیریتگنینی، بیراق بو جریان تۉخته‌تیلگنی سببلی مبلغلری اوشبو فعالیتده قالیب کېتگنی و ضرر کۉرگنینی بیلدیرماقده. اولر‌نینگ اَیتیشیچه، طالبانگه باج بېره‌دیگن یاکه بو گروه بیلن علاقه و یقینلیککه اېگه بۉلگن شخصلر همان تونده اۉز فعالیتینی دوام اېتتیرماقده.
بیر گروه آلتین قزیب آلووچیلر طالبان ایکّی آی آلدین اوشبو ولایتده آلتین قزیب آلووچیلر‌نینگ فعالیتینی تۉخته‌تگنی و اولر‌نینگ برچه‌سی طالبان‌نینگ کانلر وزیرلیگیدن ایشلش اوچون رخصت‌نامه آلیشی کېره‌کلیگی حقیده بویروق بېرگنینی اَیتماقده. اولر فعالیتنی باشلشدن آلدین اسکونه‌لرنی ساتیب آلیش و تشیش، کان حدودلرینی تیّارلش همده ایشچیلر یاللش اوچون مبلغ صرفله‌گنینی، بیراق حاضر فعالیتنی دوام اېتتیریش و خرجتلرینی قاپلش امکانیگه اېگه اېمسلیگینی بیلدیرماقده.
نعمت‌الله (مستعار) شیوه حدودیگه قره‌شلی گلگدره حدودیده‌گی کانچیلردن بیری، اوشبو کانگه قریب ۵۰ مینگ امریکا دالری سرمایه کیریتگنینی اَیته‌دی. اونینگ قۉشیمچه قیلیشیچه، ایشلر تۉخته‌تیلگنی سببلی سرمایه‌سی قالیب کېتگن.
او شونده‌ی دېیدی: «بیز ایشلش و درآمد آلیش امیدیده سرمایه کیریتدیک، اما حاضر همه نرسه تۉخته‌ب قالگن. قریب ۵۰ مینگ دالر صرفله‌دیم. حاضر نه ایشیمیز بار، نه سرمایه قیلگن پولیمیزنی قَیتریش امکانیمیز بار. هر کونی ایش تۉخته‌ب تورسه، ضرریمیز ینه‌ده آرته‌دی.»
کانچیلر قیش فصلی یقینلشیشی بیلن قار یاغیشی و قتّیق ساووق اولر‌نینگ اسکونه‌لریگه ضرر یېتکزیب، یۉقاتیشلرینی ینه‌ده آشیریشی ممکنلیگینی اَیتماقده.
شهر بزرگ اولسواللیگیده‌گی ینه بیر کانچی رضاشاه (مستعار)، بو ساحه‌ده بیر نېچه شېریگی بیلن بیرگه سرمایه کیریتگنینی و اونینگ شخصی اولوشی قریب ۸۰ مینگ دالر اېکنینی اَیته‌دی.
اونینگ اَیتیشیچه، بو مبلغ‌نینگ بیر قِسمی اسکونه‌لر ساتیب آلیش، کاننی تیّارلش، ایشچیلرگه معاش تۉله‌ش و یېر اجاره‌سی اوچون صرفلنگن.
بو کانچی قۉشیمچه قیله‌دی: «بیز بیر نېچه شریکمیز و اۉزیم قریب ۸۰ مینگ دالر سرمایه کیریتگنمن. بو پول اسکونه‌لر ساتیب آلیش و کاننی تیّارلش اوچون صرفلنگن. اېندی ایش تۉخته‌گن، سرمایه‌میز اۉشه یېرده قالیب کېتدی. بیز‌نینگ طلبیمیز شو که اگر معما بۉلسه، اونگه یېچیم تاپیلسین، تاکه ینه ایشله‌ی آله‌یلیک و هېچ بۉلمه‌گنده سرمایه‌میزنی سقلب قاله‌یلیک.» اولر طلبلرینی کوزه‌تیب باریش اوچون بدخشاندهگی طالبان کانلر باشقرمه‌سیگه بیر نېچه بار مراجعت قیلگنینی، بیراق حاضرگچه قانیقرلی جواب آلمه‌گنینی اَیتماقده.
بیراق منبعلر طالبانگه علاقه‌دار کمپنیلر و بو گروهگه باج بېره‌دیگن شخصلر اکثریت حدودلرده همان کانلرنی ترتیبسیز روشده قزیب آلیشده دوام اېته‌یاتگنینی بیلدیرماقده. اولر‌نینگ قۉشیمچه قیلیشیچه، اوشبو کمپنیلر‌نینگ اکثریتی تونده فعالیت یوریته‌دی، اَیریم حدودلرده اېسه طالبانگه کتّه مقدارده پول تۉله‌ش آرقه‌لی کان قزیش ایشلری کوندوز کونی هم دوام اېتماقده.
بو خواطرلر طالبان‌نینگ بدخشاندهگی وکیللری کانلرده فعالیت یوریتیش اوچون کانلر‌نینگ قَیته آچیلیشیگه امکان یره‌ته‌دیگن ینگی ترتیب ایشلب چیقیلگنینی اَیتگن بیر پیتده بیلدیریلماقده. اولر‌نینگ اَیتیشیچه، اوشبو ترتیب هلی عملده جاری اېتیلمه‌گن و کانچیلیک فعالیتی‌نینگ قچان قَیته باشلنیشی هم انیق اېمس.
بدخشانده کانلرنی قزیب آلیش سۉنگگی ییللرده محلی طالبان وکیللری و اوشبو گروه‌نینگ یوقاری مرتبه‌لی عملدارلری اوچون درآمد کېلتیرووچی منبعلردن بیریگه ایلنگن. ۸صبح‌نینگ بیر قطار حساباتلری نتیجه‌لریگه کۉره، طالبان‌نینگ اَیریم محلی و یوقاری مرتبه‌لی عملدارلری کمپنیلر تشکیل اېتیش و اسکونه‌لر بیلن تأمینلش آرقه‌لی آلتین قزیب آلیش بیلن کېنگ مقیاسده شغللنگن همده کانچیلر و ایشچیلردن باج و اولوش اوندیرگن.
