حبس گه آلیش کوپه‌یشی و باج آلیش دوامی؛ طالبان محبوس‌لر نینگ قویېب یوباریش اۉرنیده پول سوره‌یدی
کابل و مملکت پایتختی نینگ شمالی ولایت‌لریده‌گی محلی منبع‌لر، اوشبو ولایت‌لرده طالبان تامانیدن سابق حکومت حربی کوچلری و عادی اهالی قۉلگه آلینه‌یاتگنیدن شکایت قیله‌دیلر. اولر گه کوره، طالبان سۉنگی هفته‌لرده مملکت نینگ شمالی ولایت‌لریدن اۉنلب کیشینی حبس گه آلیب و نامعلوم جای گه آلیب کیتگن. منبع‌لر نینگ ایتیشلریچه، طالبان بو کیشی‌لر نی «تورلی بهانه‌لر» بیلن قۉلگه آلیب و پول و قورال اۉرنیده قوییب یوباره‌دیلر. طالبان حبس گه آلینگن کیشی‌لرنی پول تولش گه مجبور قیلیش اوچون تورمه‌خانه‌لریده کوپ قییناق‌لشینی اۉرغوله‌یدی، منبع‌لر. عین‌حالده، مدنی جماعه‌چیلیک فعاللریدن بیرقطاری طالبان نی «باج آلیش» و «عقده‌مندلیک» یانده‌شوو گه عیبلب ایتیشلریچه، بو گروه هر کونی مملکت یشاوچیلری گه حرمت‌سیزلیک قیله‌دی. اولر گه کوره، طالبان نینگ باسیم‌لری باعث اولکه یشاوچلری مملکت نی ترک قیلماقده یا که ترک قیلیش اوچون سعی‌وحرکت قیلماقده‌لر. باشقه تاماندن سیاسی ایش بیلرمان‌لر طالبان نینگ بو اقدامینی «قومی و مذهبی تعصب‌لر گه قول اوریش» عنوان قیلیب ایتیشلریچه، مذکور گروه بیرینچی حاکمیت‌لریده هم بو گَل اقدام‌لر گه قول اۉرگن.
کابل، پنجشیر، کاپیسا و پروان ولایت‌لریده‌گی منبع‌لر، طالبان سۉنگی ایکّی یریم ییل اېچیده اوشبو ولایت‌لر نینگ مینگلب اهالیسینی قۉلگه آلیب و زندانی قیلگنلر.
منبع‌لر قولگه آلینگنلر نینگ رقمی حقیده هیچ نرسه دیمسه‌لرده، بیراق طالبان نینگ زندانی‌لر ایشلرینی ترتیب گه سالیش اداره نینگ حربی اۉرین باسری حبیب‌الله بدری نیچه کون آلدین طلوع‌نیوز بیلن اۉتکزگن صحبتیده، حاضرگی کونده بو گروه نینگ تورمه‌خانه‌لریده ۱۹ مینگ کیشی زندانی‌لیگینی ایتگن اېدی. اونینگ سوزلری گه کوره، طالبان تورمه‌خانه‌لریده ۸۰۰ عیال و چیت‌ایللیک ۲۵ کیشی زندانی دیر.
شو بیلن بیرگه، مملکت یشاوچیلریدن بیرقطاری نینگ ایتیشلریچه، طالبان تورمه‌خانه‌لریده‌گی محبوس‌لر نینگ کوپینچه‌سینی سابق حکومت حربی‌لری و پایتخت نینگ شمالی ولایت‌لر اهالیسی تشکیل بیره‌دی. اولر گه کوره، طالبان یالغیز سونگی هفته‌لرده بیر قطار ولایت‌لردن اونلب کیشینی قولگه آلیب و نامعلم جای گه آلیب کیتگنلر. طالبان بو کیشی‌لرنی «تورلی عیبلاولر» بیلن قولگه آلگن و پول و قورال اۉرنیده قوییب یوباره‌دیلر.
ینگی‌لیکده، طالبان پنجشیر یشاوچیسی بولگن بیر آته و اوغلینی ۱۴ دلو، شنبه کونی، کابل شهری نینگ تورتینچی حوزه حدودلریدن قولگه آلگنلر.
منبع‌لر گه کوره، محمدنجیم پنجشیری و اوغلی آغاشیرین، اوتمیش دن حاضرگچه هیچ بیر گروه بیلن علاقه‌لری بولمه‌گن، لېکن طالبان رسمی‌لریدن بیری نینگ بویروغی بیلن قولگه آلینگنلر. منبع‌لر نینگ ایتیشلریچه، طالبان نینگ اوشبو رسمی‌سی قولگه آلینگن مذکور ایکّی کیشی نینگ قوییب یوباریش اوچون بیر میلیون افغانی نقد پول و نیچه میل قورال طلب قیلگن.
منبع‌لر نینگ کوپه‌یتیریشیچه، طالبا بوندن آلدین محمدنجیم پنجشیرینی قیسقه مدت قولگه آلگن اېدیلر، لېکن کفالت بیلن قوییب یوبارگندی. شو بیلن بیرگه، بو ایکّی کیشی طالبان تامانیدن قوییب یوباریلگن می یا یوق بیللی اېمس.
شونینگدیک طالبان، پنجشیر ولایتی رخه تومنیده سابق حکومت ملی خوفسیزلیک ریاستی نینگ بیر عسکرینی قولگه آلگنلر. شاه‌محمود اسملی اوشبو حربی ۱۴ دلو، شنبه کونی، طالبان تامانیدن قولگه آلینگن. شاه‌محمود پنجشیر ده سابق حکومت ملی خوفسیزلیک ریاستی عسکری اېکن و طالبان اونی «قورالی بارلیگی» عیبی بیلن قولگه آلگن. شاه‌محمود بوندن آلدین قورالینی طالبان گه تاپشیرگن و حاضر هیچ قورالی یوق‌لیگینی معلوم قیله‌دی، منبع‌لر.
بونگه قوشیمچه، پنجشیر ده‌گی محلی منبع‌لر ۲۰ دلو، جمعه کونی ۸صبح کونده‌لیگی گه ایتیشلریچه، طالبان اوشبو ولایت ده تورت کیشینی قولگه آلگنلر. بو کیشی‌لر اتگن هفته رخه و عنابه تومن‌لری مرکزی دن قولگه آلینگنلر. قولگه آلینگنلردن ایکّی کیشی نینگ آتی ثناءالله و سیدانصار دیر، لېکن باشقه ایکّی کیشی نینگ کیم‌لیگی همان نامعلوم.
باشقه تاماندن، طالبان کابل-دایکندی یۉنه‌لیشیده سابق حکومت ایکّی عسکرینی قولگه آلگنلر. رضا مجاهدزاده اسملی اوشبو کیشی‌لر دن بیری ۲۰ دلو، جمعه کونی میدان‌وردک ولایتی نینگ کیریش ایشیگیده طالبان تامانیدن قولگه آلینگن. رضا دایکندی ولایتی اصلی یشاوچیسی دیر و سابق حکومت قولشیدن سۉنگ کابل-دایکندی یونه‌لیشیده «هیداوچیلیک» قیلر اېدی.
بو واقعه دن بیر کون آلدین، طالبان دایکندی ولایتی شهرستان تومنیده سابق حکومت جنایی جرم‌لر گه قرشی کوره‌ش آمری محمدرضا حکمت‌یارنی اوشبو ولایت گه باریش پیتیده میدان‌وردک ولایتی جلریز تومنی حدودلریده قولگه آلگن.
منبع‌لر گه کوره، طالبان قولگه آلینگن کیشی‌لرنی پول تولش گه مجبور قیلیش اوچون تورمه‌خانه‌لریده قییناقله‌یدیلر.
عین‌حالده، مدنی جماعه‌چیلیک فعاللریدن بیرقطاری طالبان نی «باج‌آلیش» و «عقده‌مندلیک» یانده‌شوو گه عیبله‌یدیلر. مدنی جماعه‌چیلیک فعاللریدن بیری هارون مجیدی ۸صبح کونده‌لیگی گه ایتیشیچه، طالبان هر کونی مملکت یشاوچیلری گه حرمت‌سیزلیک قیله‌دی. اونینگ کوپه‌یتیریشیچه: «طالبان یشاوچیلر دن باج آلیشه‌دی و بیرینچی حاکمیت‌لریده هم اهالی دن باج آلیشر اېدی.»
مجیدی گه کوره، طالبان قولگه آلینگنلرنی قوییب یوباریش اورنیده قورال یا که قورال پولی یوز مینگ افغانی بوله‌دی عایله‌لریدن طلبه قیلیشه‌دی.
عین‌حالده، ایش بیلرمان‌لردن بیرقطاری نینگ ایتیشلریچه، طالبان نینگ باسیم‌لری طفیلی مملکت یشاوچیلریدن بیرقطاری مملکت نی ترک قیلگن یا که ترک قیلیش اوچون سعی‌وحرکت قیلماقده‌لر. بیلیم یورت استادی فاروق علیم نینگ ۸صبح کونده‌لیگی گه ایتیشیچه، طالبان تامانیدن یره‌تیلگن چیکلاولر و باسیم‌لر یشاوچیلرنی «زیریکتیرگن.» علیم جنابلری نینگ کوپه‌یتیریشیچه: «طالبان افغانستان فقرالرینی ایریم عیبلاولر بیلن قولگه آله‌دی و قوییب یوباریش اورنیده نقد پول و قورال سوره‌یدیلر. طالبان هیچ قانون و معیار گه ایشانمه‌یدی. بوگون یا که اېرته کیم قولگه آلینیشی هیچ بیللی اېمس.»
سیاسی ایش بیلرمان‌لر طالبان نینگ بو اقدامینی «قومی و مذهبی تعصب گه قول اوریش» عنوان قیلیب ایتیشلریچه، مذکور گروه بیرینچی حاکمیت‌لریده بو گَل اقدام‌لر گه قول اۉرگن. سیاسی ایش بیلرمان ویس ناصری نینگ ۸صبح کونده‌لیگی گه ایتیشیچه: «طالبان رژیمی ده پشتون بولمه‌گنلر بیلن اوروش اسیرلری کبی یانده شیله‌دی. طالبان باشقه‌لر گه نه‌فقط سیاسی، حربی و اقتصادی قدرت گه جای بیرمه‌یدی، بلکیم اولرنی ایکینچی درجه‌لی فقرا صفتیده تانیدیلر.»
عین‌حالده، افغانستانده بیرلشگن ملتلر تشکیلاتی نینگ اۉرین باسرلیک هیات دفتری (یوناما) ۲ دلو، دوشنبه کونی، انسان حقلری وضعیتی گه دایر گزارش ترقه‌تیب ایتیشیچه، اوشبو گروه رهبری تامانیدن عمومی کیچیریم اعلام بولگن بولسه ده، لېکن بو گروه اعضالری سابق حکومت حربی‌لری و دولت رسمی‌لرینی اۉلدیریش، قولگه آلیش، فراقانونی قولگه آلیش، قییناق‌لش گه دوام بیرماقده. مذکور گزارش اساسیده، طالبان عیال حقوقی فعاللری، انسان حقلری مدافعه‌چیلری، خبرچیلر و یېتکیرمه ایشلاوچیلرینی قول گه آلیش گه دوام بیرگن. شو بیلن بیرگه، طالبان سونگی ایکّی ییل ده بیرگن وعده‌لریدن هیچ بیرینی عملی قیلیشمه‌گن.
