تۉییب-آوقت‌لنمسلیک بحرانی؛ جهان آزیق-آوقت دستوری: بازارلرده آزیق-آوقت موجود اما آدملر‌نینگ اونی ساتیب آلیشگه قُربی یېتمه‌یدی
۸صبح، کابل: جهان آزیق-آوقت دستوری جاری ییلده افغانستانده ۳،۷ میلیون باله و ۱،۲ میلیون حامله‌دار همده اېمیزیکلی عیال اۉتکیر تۉییب-آوقت‌لنمسلیک معماسیگه دوچ کېلیشی ممکن‌لیگیدن خبر بېردی.
جهان آزیق-آوقت دستوری‌نینگ افغانستاندهگی مدیری جان آیلیف سویس گزېته‌سیگه بېرگن صبحتیده بازارلرده آزیق-آوقت موجودلیگینی، اما آدملر‌نینگ اونی ساتیب آلیشگه قُربی یېتمسلیگینی اَیتگن.
جهان آزیق-آوقت دستوری افغانستاندهگی آزیق-آوقت بحرانینی کوچه‌یتیره‌یاتگن عامللر قطاریگه قشّاقلیک، ایشسیزلیک، قورغاقچیلیک و آزیق-آوقت نرخلری‌نینگ آشیشینی کیریتگن.
اوشبو دستور ایران و پاکستاندن آلتی میلیوندن آرتیق افغان مهاجری‌نینگ قَیتیشی هم اهالی‌نینگ اقتصادی و تورموش شرایطیگه باسیمنی کوچه‌یتیرگنینی قۉشیمچه قیلگن.
مذکور تشکیلات‌نینگ اَیتیشیچه، ۴۶ میلیونلیک افغانستان اهالیسی‌نینگ قریب اوچدن ایکّی قِسمی قشّاقلیکده یشه‌یدی.
طالبان ۲۰۲۱-ییل اگوستیده حاکمیتگه قَیتگنیدن سۉنگ، افغانستان اقتصادیاتی جدّی انقراضگه دوچ کېلدی و میلیونلب آدملر ایش امکانیتلری و برقرار درآمددن محروم بۉلدی.
