آزادلیک و عدالت حرکتینینگ حربی مسؤولی حامد سیفی بیلن مخصوص صحبت
۸صبح
۸صبح اېسلتمهسی: افغانستان اسلام جمهوریتینینگ قولهشینینگ و طالباننینگ حاکمیتگه قَیتیشینینگ بېش ییللیگی عرفهسیده، ۸صبح مخصوص صحبتلر تورکومینی نشر قیلماقده. اوشبو تورکوم دایرهسیده قوییدهگی صحبت آزادلیک و عدالت حرکتینینگ حربی مسؤولی حامد سیفی بیلن یازمه روشده اۉتکزیلدی. اوشبو صحبت سواللرینی ۸صبحدهگی بیر قطار عیال ژورنالیستلر و یازووچیلر ایلگری سورگن. ۸صبح ژورنالیستلری و یازووچیلرینینگ اسملری افغانستان ایچیده بۉلیشی و فعالیت یوریتیشی سببلی مستعار بیلن کېلتیریلگن.
۸صبح ژورنالیستی، ایلیا
ایلیا: جبههلر حاکمیتده رۉل اۉینهگن تقدیرده، عیاللر ینه رهبرلیک و سیاسی قرارلر قبول قیلیشدن چېتلشتیریلمسلیگیگه قندهی کفالت بار؟
سیفی: عیاللر اېرککلر کبی برچه سیاسی، اقتصادی، مدنی ساحهلرده، اینیقسه مملکت رهبریتیده مهم رۉل اۉینهیدیلر. طالباندن کېینگی تیزیمده هېچ قندهی کمسیتیش و جنسی فرقی بۉلمهیدی.
ایلیا: طالبانگه قرشی جبههلرنینگ اۉتمیشدهگی حکومتلر و انحصاری توزیلمهلردن قندهی فرقی بار و اولر اۉتمیشدهگی خطالرنینگ تکرارلنیشیگه قندهی یۉل قۉیمهیدیلر؟
سیفی: بیز افغانستان تاریخیدن سبق آلگن حالده، مرکزلشمهگن، سیلنهدیگن و عدالتگه اساسلنگن تیزیمگه ایشانهمیز؛ برچه فقرالر اۉزلرینی اونینگ اېگهسیدېک حس قیلهدیگن و کتّه مسؤولیتلر شخصلرنینگ قابلیتی و استعدادیگه کۉره، ملتی، تیلی، منصبیگه و …گه قرهب اېمس، تاپشیریلهدیگن تیزیمگه.
ایلیا: جبههلرنینگ افغانستان کېلهجگی اوچون انیق سیاسی رېجهسی قندهی؟ اولر قندهی سیاسی تیزیم، سیلاو تیزیمی و حاکمیتنی تقسیملشنی تکلیف قیلماقدهلر؟
سیفی: کېلهجکدهگی تیزیم تورینی افغانستان اېرککلری و عیاللری اۉز آوازلری بیلن بېلگیلهیدیلر. بو سفر مېزانی شخص و ملت اېمس، بلکه صلاحیت، خدمت قیلیش و حلاللیک بۉلگن تیزیمگه گواه بۉلهمیز.
ایلیا: حاکمیتگه کېلگن تقدیرینگیزده، مکتبلر و بیلیم یورتیلرنی قَیته آچیش و عیاللرنی، اینیقسه دستلبکی ۱۰۰ کون ایچیده، ایشگه قَیتریش اوچون قندهی انیق چارهلرنی عملگه آشیرهسیز؟
سیفی: طالبان مغلوبیتگه اوچرهگن تقدیرده، بیزنینگ بیرینچی استوار وظیفهمیز مکتبلر و بیلیم یورتیلرنی قَیته آچیش همده عیاللرنی ایشگه قَیتریش بۉلهدی. شونینگدېک، طالبان دوریدهگی علمی چېکلاولر طفیلی یېتکزیلگن ضررلرنی قاپلش اوچون بار کوچیمیز بیلن حرکت قیلهمیز. خلقارا علمی تشکیلاتلردن هم تعلیم گرهنتلرینی تقدیم اېتیش آرقهلی افغانستان تعلیم مؤسسهلریده صلاحیتنی آشیریش امکانیتینی ینه یرهتیشلرینی سۉرهیمیز.
ایلیا: حاضرده عیاللرنینگ جبههلر رهبریتی و قرارلر قبول قیلیش درجهسیده حقیقی و ثمرهلی اشتراکی بارمی؟
سیفی: حاضرگی شرایطده عیاللر عدالت طلب قیلووچی آوازلری بیلن طالبان جنایتلرینی، اینیقسه طالبان قماقخانهلریدهگی قییناقلر، زۉرآورلیک و تجاوزلرنی فاش اېتیشده مهم رۉل اۉینهماقده. بو آوازلر باشقه جبههلر بیلن بیر قطارده آزادلیک و عدالت اوچون کورهشهیاتگن قوراللی جنگچیلر و پارتیزانلرنینگ روحیتینی مستحکملهیدی و جوده قدرلشگه لایق.
ایلیا: سیاسی مخالفلرنینگ حقوق و اېرکینلیکلری قندهی کفالتلنهدی و اوروشنی توگهتیش اوچون جبههلر اۉز مخالفلری بیلن مذاکره و کېنگ قمراولی سیاسی کېلیشووگه تیّارمی؟
سیفی: کېلهجکدهگی تیزیمده برچه شخصلرنینگ حقوق و اېرکینلیکلری دخلسیز بۉلهدی و هر بیر شخص یاکه سیاسی آقیم ایجابی اۉزگریشلرنی عملگه آشیریش اوچون تینچ سیاسی کورهشلر آرقهلی سیاسی میدانده اشتراک اېتیش حقوقیگه اېگه بۉلهدی.
ایلیا: طالبان چېتلشتیریلگن تقدیرده، جبههلر حاکمیتنی وقتینچهلیک حکومتگه، اوندن سۉنگ سیلنهدیگن و کینگ قمراولی تیزیمگه تاپشیرهدیلرمی یاکه اۉزلرینی حکومت یوریتیشگه حقلی دېب حسابلهیدیلرمی؟
سیفی: طالبان چېتلشتیریلگن تقدیرده، جبههلر وقتینچهلیک حکومت توزیلیشی اوچون شرایط یرهتیشگه و تیزیم توری، قانون، بیراق همده محاکمه قیلینیشی ممکن بۉلگن باشقه مسألهلرنی بېلگیلش اوچون سیلاولر اۉتکزیش امکانیتینی تینچ یۉل بیلن تأمینلشگه مجبوردیرلر.
۸صبح ژورنالیستی، مینه
مینه: قرشیلیک جبههلرینینگ قرار قبول قیلیش و رهبریت توزیلمهسیده عیاللر حقیقی اشتراک اېتماقدهلر-می؟ اگر هه بۉلسه، قَیسی درجهده و قندهی وکالتلرگه اېگه؟
سیفی: هه، عیاللر قرشیلیک جبههلرینینگ قرار قبول قیلیش و رهبریت توزیلمهسیده حقیقی اشتراک اېتماقدهلر. اولر رهبریت درجهسیده باشقه جنگچیلر بیلن یېلکهمه-یېلکه توریبدیلر. بوگون باشقه کورهشچیلر بیلن بیرگه تورگنلری کبی، غلبه کونیده هم خودّی شو موقعده بۉلهدیلر.
مینه: اگر سیز افغانستانده یشاوچی، تۉرت ییل دوامیده تعلیم، ایش و کۉپلب اساسی حقوقلریدن محروم بۉلگن بیر قیزنینگ اۉرنیده بۉلگنینگیزده، اۉزینگیزدن نیمهنی طلب قیلگن بۉلردینگیز؟
سیفی: افغانستاننینگ غرورلی عیاللری شو بېش ییل دوامیده قیلگن ایشنی: یعنی سکوت سقلب اۉتیرمسلیک، عدالت طلب قیلووچی آوازلرینی بلند کۉتریش و تاریخ یرهتیش. اولرنینگ جسارتی تاریخگه مُهرلندی و اولر کېلهجک اولادلر اوچون هېچ قندهی زۉرآورلیک و ظلمگه بۉیین اېگمسلیک همده سکوت سقلب اۉتیرمسلیک اوچون نمونه بۉلدیلر.
۸صبح ژورنالیستی، خورشید
خورشید: طالبانگه قرشی جبههلر اۉزلرینینگ قوراللی کورهشی تینچ اهالیگه ضرر یېتکزمسلیگینی قندهی کفالتلهیدیلر و طالباننینگ خلقدن قصاص آلیشلری آلدیده قندهی مسؤولیتنی اۉز ذمّهلریگه آلهدیلر؟
سیفی: حاضرگچه برچه سعی-حرکتیمیزنی پارتیزانلیک هجوملریمیزده هېچ قندهی فقراوی تلفات بۉلمهسلیگیگه قرهتدیک؛ بونینگ اۉزی کتّه یوتوق دیر و آخریگچه بو تمایلگه عمل قیلهمیز. طالبانگه قرشی قندهی عملیات عملگه آشیریلیشیدن یاکه آشیریلمسلیگیدن قطعی نظر، اولر باشیدناق خلق اوستیدن استبداد و ظلم بیلن حکمرانلیک قیلیب کېلگنلر و بو گروهنینگ تمل تاشی ظلمگه قۉییلگن. شونینگ اوچون عملیاتلریمیزنینگ مقصدی خلق ظلم، کمسیتیش و استبدادیدن بېزار بۉلگن ظالم دشمننی مغلوب اېتیش دیر.
خورشید: طالبانگه قرشی جبههلر عمومی مقصدگه اېگه بۉلیشلریگه قرهمهی، نېگه حاضرگچه بیرلشه آلمهدیلر و بو اتفاقنینگ اساسی تۉسیقلری نیمهلردن عبارت؟
سیفی: جبههلر بیر-بیریگه قرشی اېمس، بلکه ایجابی رقابت دایرهسیده طالبان گروهیگه قرشی کورهشماقدهلر. بو ایجابی رقابت مملکتنینگ هر بیر بورچهگیده پارتیزانلیک عملیاتلرینینگ کۉپهییشیگه سبب بۉلدی.
خورشید: طالبان چېتلشتیریلگن تقدیرده، بو جبههلر بیر-بیری بیلن قوراللی تۉقنهشووگه کیریشمسلیگی و افغانستان ینه فقرالر اوروشی همده ملکدارلرارا بۉلینیشلر گِردابیگه توشیب قالمسلیگیگه قندهی کفالت بار؟
سیفی: ۱۳۷۱-ییلدن طالبان تامانیدن کابل ۱۳۷۵-ییلده اېگهللنگونیگه قدَر بیزگه مجبورا یوکلهتیلگن اوروشلر شونی اۉرگهتدی که هېچ قچان بوندهی اوروشگه کیرمسلیگیمیز کېرهک؛ خلقیمیز اونینگ بدلینی تۉلهیدیگن و فایدهسینی افغانستان خلقینینگ دشمنلری قۉلگه کیریتهدیگن اوروشگه.
خورشید: جبههلرنینگ عمومی مقصدگه کمراق تلفات و کۉپراق یوتوق بیلن اېریشیشی اوچون یگانه و انیق سیاسی دستوری همده استراتیژیسی بارمی؟
سیفی: پارتیزانلیک عملیاتلری باسقیچیده اېکنمیز، بو عملیاتلرنی مخفی طرزده رېجهلشتیریش و عملگه آشیریش ضرور. اما هجومکار و جبهه عملیاتلری باسقیچیگه یېتگنیمیزده، برچه تامانلر موافقلشتیریش ضرورلیگیگه ایشانهدیلر و عینی پیتده موافقلشتیریش غلبه اوچون هم دالضرب احتیاج حسابلنهدی.
۸صبح ژورنالیستی، آدرینا بهزاد
آدرینا: جبههلر رهبرلری ییگیرمه ییل دوامیده امکانیت، وکالت و کېنگ ایچکی همده تشقی قۉللب-قوّتلشگه اېگه بۉلگنلریگه قرهمهی، نېگه طالباننینگ قَیتیشیگه و بو گروه زۉرآورلیکلرینینگ تکرارلنیشیگه تۉسقینلیک قیله آلمهدیلر؟
سیفی: جمهوریت قولهگنیدن کېین توزیلگن جبههلر جمهوریت دوریده هېچ قندهی کتّه وکالت و موقعگه اېگه بۉلمهگن یاشلردن تشکیل تاپگن بۉلیب، اولر طالباننینگ قَیتیشیگه تۉسقینلیک قیله آلهدیگن درجهده وکالتگه اېگه اېمس اېدیلر. حتا بو یاشلرنینگ اَیریملری جمهوریت قولهشیدن آلدین اۉز لوازملریدن چېتلهتیلگن اېدیلر. شونگه قرهمهی، عیناً شو یاشلر جمهوریت دوریده هم جبهه چیزیقلریده بار کوچلری بیلن دشمنگه قرشی جنگ قیلگنلر و افغانستان خلقی اولرنینگ فداییلیکلرینینگ کۉپلب نمونهلریگه گواه بۉلگن.
آدرینا: نېگه افغانستان عیاللری و قیزلری بوگون قرشیلیک جبههلریگه ایشانیشلری کېرهک و سیزلرنینگ قرهشلرینگیز همده فعالیتینگیز بیلن اۉتمیشدهگی سیاسی تجربهلر اۉرتهسیده قندهی فرق بار؟
سیفی: بیز طالبان مغلوبیتگه اوچرهگنیدن کېین برچه خلق افغانستاننینگ اېگهسی بۉلهدی و برچهگه خدمت قیلیش امکانیتی یرهتیلهدی، دېب حسابلهیمیز. بیز هېچ قچان مجبورا یوکلهتیلگن اوروشلر و استبدادچی حکومتلر تاریخیگه قَیتمهیمیز.
آدرینا: افغانستان عیاللری و قیزلرینینگ آزادلیگی و کېلهجگی اوچون عیناً قندهی دستور و عملی چارهلر رېجهنگیز بار؟
سیفی: کورهشیمیزدن مقصد افغانستان عیاللری و اېرککلریگه آزادلیک و عدالت آلیب کېلیش، اولر لایق بۉلگن برچه حقوقلرگه، جملهدن، حرمت بیلن یشهش حقوقی، تعلیم و تحصیل آلیش حقوقی، ایشلش حقوقی همده ملتی، تیلی، منصبی و …گه اېمس، صلاحیتی و علمی لیاقتیگه اساسلنگن حالده یوقاری مرتبهلرگه اېریشیش حقوقیگه اېگه بۉلیشلرینی تأمینلش دیر.
آدرینا: افغانستاننینگ رهبریتی، قرار قبول قیلیش جریانی و سیاسی کېلهجگیده عیاللر اوچون قندهی اۉرین کۉزده توتیلگن و اولرنینگ حقوقلری ینه سیاسی منفعتلر یۉلیده قربان قیلینمسلیگیگه قندهی کفالت بېرهسیز؟
سیفی: بوگون عیاللر اېرککلر بیلن بیرگه استبدادگه قرشی کورهش صفیده تورگنلری کبی، غلبه کونیده هم مملکت تقدیرینی بېلگیلشده عیناً شو حقوققه اېگه بۉلهدیلر.
آدرینا: جبههلر مقصدلریگه اېریشیش اوچون قندهی عملی و انیق دستورینگیز بار و خلق اونینگ انیق نتیجهلرینی قچان کۉریشی ممکن؟
سیفی: بیز مملکت ایچیده و تشقریسیده یورتداشلریمیز بیلن علاقهدهمیز. طالبان گروهینی مغلوب اېتیش اوچون خلقنینگ روحیتی حقیقتاً هم تحسینگه لایق و افغانستان خلقینینگ اکثریتی بو بارهده بیز بیلن هماهنگدیر. اېرتهمی-کېچمی طالبان گروهینینگ مغلوبیتی و خلقیمیزنینگ غلبهسیگه گواه بۉلهمیز.
۸صبح ژورنالیستی، بهنیا
بهنیا: طالبان حاکمیتیگه برهم بېریش اوچون انیق و اوزاق مدتلی استراتیژینگیز قندهی؟ یقیندهگی هجوملر دستور و اوزاق مدتلی استراتیژینینگ بیر قِسمیمی یاکه شونچهکه وقتینچهلیک عملیاتلرمی؟
سیفی: بیزنینگ انیق استراتیژیمیز پارتیزانلیک، هجومکار، نفوذی و استخباراتی عملیاتلرینینگ تورلی شکللرینی اۉز ایچیگه آلهدی. اوشبو عملیاتلر بیلن بیر وقتده، طالبان مغلوبیتگه اوچرهگنیدن سۉنگ، مناسبلیککه اساسلنگن حکومت دستورلرینی کېچیکتیرمسدن عملگه آشیره آلیشیمیز اوچون مملکت ایچیدهگی و تشقریسیدهگی تأثیرچن شخصلر بیلن علاقهدهمیز. یقیندهگی تورلی خیل عملیاتلر طالبان گروهی تۉلیق مغلوبیتگه اوچرهگونیگه قدَر دوام اېتهدی.
بهنیا: خلق، اینیقسه عیاللر، قچان و قندهی رېجه اساسیده توب اۉزگریشلرنی کوتیشلری ممکن؟
سیفی: بیز ینه بیر بار وعده بېرهمیز که افغانستان اېرککلری و عیاللری هېچ قندهی کمسیتیشسیز اۉزلری لایق بۉلگن برچه حقوقلرگه اېگه بۉلهدیلر.
بهنیا: حربی کورهش بیلن بیر قطارده، ایچکی قانونیلیککه اېریشیش اوچون قندهی دستورینگیز بار؟ حاضرده تشکیلات توزیلمهسی و قرار قبول قیلیش جریانیده عیاللر اشتراک اېتماقدهلر-می؟ اگر هه بۉلسه، قندهی رۉلگه اېگه؟ اگر یۉق بۉلسه، نېگه؟
سیفی: قانونیلیککه اېریشیش اوچون بار کوچیمیزنی صرفلهیهپمیز، تاکه طالبان مغلوبیتگه اوچرهگنیدن سۉنگ، افغانستان خلقی قانونی حکومت و تیزیمگه گواه بۉلسین همده هر بیر ساحهده، اینیقسه اقتصادی ساحهده، ایجابی اۉزگریشلرنی باشدن کېچیرسین.
بهنیا: حاضرده تورلی ولایتلرده تورلی جبههلردن هجوملر و فعالیتلرنی کۉرهیاتگنیمیزنی حسابگه آلسهک، طالبانگه قرشی بیرگهلیکده حرکت قیلیشنی رېجهلشتیریهپسیزلرمی؟ یعنی اتفاق موجودمی یاکه یۉقمی؟
سیفی: بیز مخفیلیک اونینگ اساسینی تشکیل اېتهدیگن پارتیزانلیک هجوملری باسقیچیدن اۉتیشیمیز بیلناق، برچه جبههلر موافقلشتیریشگه ایشانهدیلر و بو بارهده بیر فکردهمیز.
۸صبح ژورنالیستی، آیت
آیت: قرشیلیک جبههلرینینگ ایچکی توزیلمهسیده عیاللرنینگ رۉلی قندهی؟ عیاللر فقط اوروش قربانلری و قۉللب-قوّتلش موضوعسی صفتیده کۉریلهدیمی یاکه قرار قبول قیلیش و رهبریتده هم حقیقی رۉلگه اېگهمی؟
سیفی: بیز طالبان اسارتیده بۉلگن برچه افغانستان خلقی، عیاللر و اېرککلر اوچون کورهشماقدهمیز. مقصدیمیز آزادلیک و عدالتنی اۉرنهتیشدیر، تاکه هېچ کیم افغانستان اېرککلری و عیاللرینی کمسیته آلمهسین. بو یۉلده افغانستان اېرککلری و عیاللرینینگ قانونی حققی بۉلگن برچه نرسهلر عملگه آشیریلهدی.
آیت: قرشیلیک جبههلرینینگ افغانستان اوچون یکونی مقصدلری نیمهلردن عبارت؟ مقصد فقط طالبان حکومتینی اۉزگرتیریشمی یاکه ینگی سیاسی تیزیم یرهتیش رېجهسی هم بارمی؟
سیفی: طالباندن کېینگی دور اوچون هم انیق رېجه و دستوریمیز بار؛ بو رېجهده افغانستان خلقیگه اولرنینگ ملتی، جنسی یاکه دینیگه اعتبار بېرمسدن حقوقلری بېریلهدی.
۸صبح یازووچیسی، شمسیه
شمسیه: اگر قرشیلیک جبههلری حاکمیتگه کېلسه، عیاللر و قیزلرنینگ تعلیم، بیلیم یورتی و ایشلش حقوقی اوچون قندهی عملی کفالت بېرهدیلر و اۉتگن بېش ییللیک محروملیکلرنینگ اۉرنینی قاپلش اوچون نیمه قیلهدیلر؟
سیفی: بوگون طالبانگه قرشی کورهشهیاتگن برچه جبههلرنینگ اساسی طلبلریدن بیری قیزلر اوچون مکتبلر و بیلیم یورتلری اېشیکلرینی قَیته آچیشدیر. شونگه قرهمهی، طالبان حکمرانلیگی ییللریدهگی محروملیکلرنینگ اۉرنینی قاپلش اوچون بو بۉشلیقنی تۉلدیریش مقصدیده جدّی چارهلر و تینیمسیز سعی-حرکتلر عملگه آشیریلیشی کېرهک.
شمسیه: سۉنگگی بېش ییل دوامیده قرشیلیک جبههلرینینگ طالبانگه قرشی عملیاتلری موفقیتسیزلیگینینگ سببلری نیمهده و حاضر غلبهگه اېریشیش اوچون قندهی انیق رېجهنگیز بار؟
سیفی: بیز بوگون جمهوریت تیزیمی و اونینگ اتفاقچیلریگه قرشی ییگیرمه ییل دوامیده پارتیزانلیک تاکیتیکی بیلن کورهشگن، پارتیزانلرنینگ ضعیف نقطهلری و اولرنی توزاققه توشیریش اصوللری بۉییچه کتّه تجربه آرتتیرگن گروه بیلن جنگ قیلماقدهمیز. عیناً شو تجربه اَیریم حاللرده پارتیزانلرنینگ اسیرگه آلینیشی، شهید بۉلیشی یاکه ترقهلیب کېتیشیگه سبب بۉلهدی. اما بو موفقیتسیزلیک دېگنی اېمس؛ عکسینچه، هر بیر شهیدلیک و هر بیر قربان طالبان گروهیگه قرشی کورهشیش ارادهسینی ینهده مستحکملهیدی.
شمسیه: قرشیلیک جبههلری غلبه قازانگن تقدیرده، افغانستان ینه فقرالر اوروشی، حاکمیت انحصاری و اۉتمیشدهگی خطالر گِردابیگه توشیب قالمسلیگیگه قندهی کفالت بار؟
سیفی: جبههلر و اولرنینگ مقصدلری حقیدهگی بیلیمیمگه کۉره، بوندهی حادثهنی احتمالدن ییراق دېب بیلهمن و اونینگ تکرارلنیشیگه ایشانمهیمن.
شمسیه: خوفسیز و آزاد افغانستاننی یرهتیش اوچون جبههلرنینگ عملی رېجهسی قندهی و غلبه قازانگن تقدیرده، حاکمیتنی کېنگ قمراولی سیاسی تیزیم آرقهلی خلققه تاپشیرهدیلرمی؟
سیفی: شبههسیز، کېلهجک تقدیرینی خلقنینگ آوازلری بېلگیلهیدی. شکللنهدیگن تیزیم و توزیلمه توری هم خلقنینگ آوازی و ارادهسیگه باغلیق بۉلهدی.
۸صبح یازووچیسی، شایسته
شایسته: افغانستان عیاللری بوگون اېنگ عادی انسانی و اجتماعی حقوقلریدن محروم. اگر اېرتهگه سیاسی حاکمیت سیزنینگ قۉلینگیزگه اۉتسه، عیاللر ینه سیاسی کېلیشوولر و حاکمیت منفعتلری قربانیگه ایلنمسلیگیگه قندهی انیق کفالت بار؟ عیاللر حقوقلرینی قانون و کېلهجکدهگی سیاسی توزیلمهده مُراسهگه کېلیب بۉلمهیدیگن قیزیل چیزیق صفتیده کفالتلشگه تیّارمیسیز؟
سیفی: افغانستان عیاللرینینگ حقوقلری معاملهگه کېلیب بۉلمهیدیگن قیزیل چیزیق صفتیده قرهلهدی و اونینگ کفالتی قانون همده کېلهجکدهگی سیاسی توزیلمهده انیق قید اېتیلهدی و کۉرینیب تورهدی.
شایسته: افغانستان فقط بیر حکومتنینگ قولهشی بیلن قوریلمهیدی. اگر طالبان اېرتهگه حاکمیتدن چېتلشتیریلسه، کینگ قمراولی سیاسی تیزیم یرهتیش اوچون انیق رېجهنگیز قندهی؟ هېچ بیر ملت، دین، تیل و جنس وکیلی اۉزینی چېتلشتیریلگن حس قیلمهیدیگن تیزیمنی قندهی یرهتهسیز و خلق سیزنینگ دستورینگیز همده فعالیتینگیزدن قندهی حساب سۉرهشی ممکن؟
سیفی: افغانستان خلقی طالباندن کېین هر بیر شخص اۉزینی مملکت اېگهسیدېک حس قیلهدیگن تیزیمگه گواه بۉلیشی اوچون بار کوچیمیز بیلن کورهشهمیز. هر قندهی قومی، مذهبی، تیل و جندر کمسیتیش جنایت دېب حسابلنهدی و خدمت قیلیش مېزانی صلاحیت، علم و قابلیت بۉلهدی، تاکه برچه اۉز خلقیگه خدمت قیله آلسین و تیزیمده اولوشگه اېگه بۉلسین.
شایسته: اگر اېرتهگه حاکمیت سیزنینگ قۉلینگیزگه اۉتسه، مکتبلر و بیلیم یورتیلرنی قَیته آچیش همده قیزلرنینگ تعلیم آلیش حقوقینی کفالتلش اوچون بیرینچی عملی قدمینگیز نیمه بۉلهدی؟ اگر بو وعده عملگه آشمسه، خلق آلدیده کیم و قندهی جواب بېرهدی؟
سیفی: بیز عیاللرگه تعلیم آلیش، ایشلش و آواز بېریش حقوقلرینی ینه قَیتریشنی اۉز ذمّهمیزدهگی مسؤولیت دېب بیلهمیز.
۸صبح، تمنا
تمنا: نېگه قرشیلیک جبههلری سۉنگگی بېش ییل دوامیده خلقنینگ اېتنیک منسوبلیکدن تشقری کېنگ ایشانچی و قۉللب-قوّتلشیگه اېریشه آلمهدیلر؟
سیفی: بونینگ اساسی سببی طالبان اۉز روایتینی یرهتیشده بعضاً دینی، بعضاً اېسه اېتنیک مسألهلرنی اوج آلدیریشیدهدیر. افسوس که بو یاندهشوو افغانستان خلقی آنگیگه سلبی تأثیر کۉرسهتدی. مېن خلق تامانیدن کېنگ و ضرور قۉللب-قوّتلشنینگ یۉقلیگینینگ اساسی سببینی کۉپراق طالباننینگ عیناً منه شو روحی اوروش حیلهلریده کۉرهمن.
تمنا: نېگه قرشیلیک جبههلری جبههلر و طالباننینگ باشقه مخالفلری اۉرتهسیده بیرلیک یرهتیش اوچون ثمرهلی حرکت قیلمهدیلر و عمومی همده موافقلشتیریلگن کورهش شکللنمهدی؟
سیفی: جبههلرنینگ کورهشی حاضر یگانه مقصد مملکت آزادلیگی و خلقنی قوتقریش یۉلیده ایجابی رقابت بیلن دوام اېتماقده و مېن بونی افغانستان خلقی فایدهسیگه دېب بیلهمن.
۸صبح یازووچیسی، مهتاب
مهتاب: قرشیلیک جبههلرینینگ افغانستاننینگ کېلهجکدهگی رهبریتی، سیاسی توزیلمهسی و قرارلر قبول قیلیش جریانیده عیاللرنینگ حقیقی و تېنگ اشتراکی اوچون انیق رېجهسی بارمی؟
سیفی: افغانستان عیاللرینینگ اۉرنی اېرککلر کبی، هېچ قندهی جنسی کمسیتیشیسیز، اۉز صلاحیتی، استعدادی و علمیگه اساسلنگن حالده طالباندن کېینگی تیزیمده مستحکملنهدی.
مهتاب: اگر قرشیلیک جبههلری حاکمیتگه کېلسه، عیاللر و قیزلرنینگ اساسی حقوقلری، جملهدن تعلیم، ایش، تنلش اېرکینلیگی و سیاسی اشتراکی منفعتلر و سیاسی قرارلر قربانیگه ایلنمسلیگیگه قندهی عملی و انیق کفالت بار؟
سیفی: برچه جبههلر، اینیقسه آزادلیک و عدالت حرکتی، قوراللی کورهشینینگ اساسی سببلریدن بیرینی افغانستان برچه خلقینینگ، اینیقسه عیاللرنینگ اساسی حقوقلرینی رۉیابگه چیقریش دېب بیلهدی. بو بارهده هېچ قندهی شبهه یۉق که طالباندن کېینگی تیزیمده افغانستان خلقی یخشیراق کېلهجککه گواه بۉلهدی؛ علم-فن و ترقیات کاروانیگه قۉشیلیشگه اساسلنگن، تېز سرعتلرده آلغه بارهیاتگن کېلهجککه.
