بیرلشگن ملتلر تشکیلاتی: قوراللی تۉقنه‌شوولرده هر کونی ۲۵ نفر عیال و قیز قربان بۉلماقده
بیرلشگن ملتلر تشکیلاتی هر کونی قوراللی تۉقنه‌شوولرده کمیده ۲۵ نفر عیال و قیز قربان بۉله‌یاتگنینی معلوم قیلدی. شونینگدېک، ۲۰۲۱-ییلگه نسبتاً تینچ اهالی آره‌سیده‌گی قربانلر ترکیبیده عیاللر اولوشی ایکّی برابر آشگن.
اوشبو تشکیلات چهارشنبه کونی، ۲۸-اکتوبرده، ایکس صحیفه‌سیده عیاللر اوروش‌نینگ آغیر عاقبتلرینی باشدن کېچیره‌یاتگنینی، بیراق تینچلیک اۉرنه‌تیش جریانلریدن همان کتّه درجه‌ده چېتده قالدیریله‌یاتگنینی یازدی.
بیرلشگن ملتلر تشکیلاتی عیاللر و قیزلر‌نینگ تینچ اهالی آره‌سیده‌گی قربانلر اولوشی آرتیب باره‌یاتگنی قوراللی تۉقنه‌شوولر‌نینگ اولر‌نینگ حیاتیگه آغیر تأثیر کۉرسه‌ته‌یاتگنیدن دلالت بېریشینی تأکیدله‌دی.
تشکیلات، شونینگدېک، عیاللر‌نینگ تینچلیک جریانلریده‌گی اشتراکینی تأمینلش ضرورلیگینی قید اېتدی. چونکه عیاللر اوروش عاقبتلریگه دوچ کېله‌یاتگن بۉلسه-ده، تینچلیک اۉرنه‌تیشگه قره‌تیلگن سعی-حرکتلرده فعال رۉل اۉینه‌ش امکانیتیدن هنوز محروم قالماقده.
بیرلشگن ملتلر تشکیلاتی‌نینگ عیاللر توزیلمه‌سی هم اوّلراق قریب ۷۵۰ میلیون نفر عیال و قیز حاضرده فعال قوراللی تۉقنه‌شوولر حدودلریدن ۵۰ کیلومتر مصافه‌ده یشه‌یاتگنینی معلوم قیلگن اېدی. بو کۉرسه‌تکیچ ۲۰۲۴-ییلگه نسبتاً قریب ۴۰ میلیون نفرگه آشگن بۉلیب، ۱۹۹۰-ییلدن بویان کوزه‌تیلمه‌گن درجه‌گه یېتگن.
