عزیزی بانک مشتری‌لری: حساب آچیشده تۉلاولر حقیده هېچ نرسه اَیتیلمه‌یدی
نیما
عزیزی بانک ایریم مشتری‌لری اوشبو بانک حساب آچیش وقتیده اولرنی اَیریم شرطلردن انیق و روشن خبردار قیلمه‌گنینی اَیتماقده. اولر‌نینگ دعوا قیلیشیچه، بانک خدمتلریدن فایده‌لنگنلریدن کېین تۉلاو اسکونه‌لردن پول یېچیب آلیش اوچون حسابلریدن مبلغ اوشلب قالینیشی و بانک خدمتلری اوچون آیلیک تۉلاولر موجودلیگیدن خبردار بۉلگن. بو مشتری‌لر بانکلردن خدمت کۉرسه‌تیش عوضیگه هر قنده‌ی تۉلاو اوندیریشدن آلدین اولرنی بو حقده شفّاف طرزده خبردار قیلیشنی سۉره‌ماقده، تاکه اولر پوللرینی قنده‌ی باشقریش و صرفلش حقیده ینه‌ده آنگلیراق قرار قبول قیله آلسینلر. مزاجلر، شونینگدېک، اوشبو بانک‌نینگ اَیریم نماینده‌لیکلریده بانک حسابلرینی آچیش اوچون مسؤول بۉلگن خادملر مشتری‌لرگه حساب شرطلری و تفصیلاتلرینی توشونتیریشده یېترلی درجه‌ده معلومات بېره آلمه‌یاتگنینی اَیتماقده. اولر‌نینگ سۉزلریگه کۉره، عیناً شو حالت حساب آچیلگندن کېین مشتری‌لرده جدّی سواللر و ناانیقلیکلر پیدا بۉلیشیگه سبب بۉله‌دی و اولر بو سواللرگه انیق جواب هم آلالمه‌یدی.
مزاجلر‌نینگ بانکلر، خصوصاً، عزیزی بانک بیلن معامله قیلیش و تۉلاو اوندیریش ترتیبیدن شکایتلری دوام اېتر اېکن، اَیریم مشتری‌لر آیلیک تۉلاولر همده ماشینلردن فایده‌لنیش اوچون کمیشن اوندیریله‌یاتگنیدن شکایت قیلماقده. اولر حساب آچیشدن آلدین بانک خدمتلریگه تېگیشلی شرطلر و تۉلاولر اولرگه شفّاف و انیق طرزده توشونتیریلمه‌گنینی تأکیدله‌ماقده.
اسمی حساباتده آشکار اېتیلیشینی ایسته‌مه‌گن عزیزی بانک مشتری‌لریدن بیری دالر و افغانی حسابلرینی آچیش وقتیده بانک خادملری اونگه فقط افغانی حسابیدن هر آی ۲۵ افغانی و دالر حسابیدن ۷۰ سېنت مقداریده مبلغ اوشلب قالینیشی حقیده توشونتیریش بېرگنینی، حسابنی آلتی آی ایچیده یاپیش چېکلاوی و طلب قیلینه‌دیگن مینیمال قالدیق حقیده اېسه هېچ قنده‌ی معلومات بېرمه‌گنینی اَیته‌دی. اونینگ سۉزلریگه کۉره، عزیزی بانک نماینده‌لیگیگه حسابینی یاپیش اوچون مراجعت قیلگنیده، بانک خادیمی ینگی قاعده‌لرگه کۉره حساب آلتی آی تۉلمسدن یاپیلمسلیگینی و مشتری دالر حسابیده کمیده ۱۰۰ دالر، افغانی حسابیده اېسه کمیده ۱ مینگ افغانی سقلشی کېره‌کلیگینی اَیتگن.
بو مشتری شونده‌ی دېیدی: «حساب آچگن کونیم هېچ کیم مېنگه آلتی آی دوامیده حسابیمنی یاپالمسلیگیمنی یاکه حسابده معلوم مقدارده پول سقلشیم کېره‌کلیگینی اَیتمه‌دی. حسابنی یاپیش اوچون مراجعت قیلگنیمده‌‌گینه بو حقده خبر تاپدیم.» او بو مسأله‌نی حل قیلیش اوچون عزیزی بانک نماینده‌سیگه ایکّی مرته مراجعت قیلگنینی، بیراق بانک خادملری اونگه اوشبو قاعده‌لر یقینده جاری اېتیلگنی و اولر‌نینگ قۉلیدن هېچ نرسه کېلمسلیگینی اَیتگنینی قۉشیمچه قیله‌دی.
عزیزی بانک‌نینگ باشقه اَیریم مشتری‌لری هم اوشبو بانک ماشینلریدن پول یېچیب آلیش اوچون کمیشن اوندیریله‌یاتگنیدن شکایت قیلماقده. اولر‌نینگ دعواسیگه کۉره، هر آی ۲۵ افغانی اوشلب قالینیشیدن تشقری، هر سفر ماشین آرقه‌لی اۉز حسابلریدن پول یېچیب آلگنلریده ینه ۲۵ افغانی حسابلریدن یېچیب آلینه‌دی. بو مشتری‌لر بانک‌نینگ بونده‌ی عملیاتینی عدالتسیز دېب حسابله‌یدی و اونی تۉخته‌تیشنی یاکه حساب آچیشدن آلدین اوشبو تۉلاولر حقیده شفّاف معلومات بېریلیشینی طلب قیلماقده.
مشتری‌لردن بیری پول یېچیب آلیشدن آلدین حسابیده‌گی مبلغنی تېکشیرگنینی و پول یېچیب آلگچ، حسابیدن کمیشن صفتیده ۲۵ افغانی اوشلب قالینگنینی پَیقه‌گنینی اَیته‌دی. اونینگ سۉزلریگه کۉره، بانککه مراجعت قیلگنیدن سۉنگ، بانک خادیمی اونگه ماشین‌دن هر سفر فایده‌لنیش اوچون ۲۵ افغانی کمیشن آلینیشی حقیده معلوم قیلگن.
بو مشتری شونده‌ی دېیدی: «حساب آچگنیمده ماشین‌دن هر سفر پول آلگنیمده ۲۵ افغانی کمیشن آلینیشی حقیده هېچ قنده‌ی توشونتیریش بېریلمه‌دی. پولنی یېچیب آلگنیمدن کېین حسابیمدن معلوم مقدارده‌گی مبلغ کمه‌یگنینی بیلدیم.» او عزیزی بانک‌نینگ باشقه بیر نېچه مشتری‌لریدن سۉره‌ب-سوریشتیرگچ، اولر هم خودّی شونده‌ی معماگه دوچ کېله‌یاتگنینی انیقله‌گنینی قۉشیمچه قیله‌دی.
اوشبو مشتری‌نینگ اَیتیشیچه، عزیزی بانک سۉنگگی کونلرده تۉلاو ماشینلردن پول یېچیب آلیش اوچون آلینه‌دیگن کمیشننی ۲۵ افغانیدن ۵ افغانیگچه کمه‌یتیرگن. اونینگ اَیتیشیچه، بو اۉزگریش تخمیناً بیر هفته آلدین جاری اېتیلگن، بیراق مشتری‌لر حساب آچیش وقتیده بونده‌ی تۉلاو موجودلیگیدن خبردار قیلینمه‌گن. بو مشتری‌نینگ قۉشیمچه قیلیشیچه، حساب آچیش وقتیده بانک تۉلاولری‌نینگ شفّاف توشونتیریلمسلیگی مشتری‌لر خدمتلردن فایده‌لنگنلریدن کېین‌گینه حقیقی خرجتلر مقداریدن خبردار بۉلیشیگه سبب بۉله‌دی.
مشتری‌لر‌نینگ اَیتیشیچه، بانکلر حساب آچیشدن آلدین بانک خدمتلریگه تېگیشلی برچه شرطلر، چېکلاولر و تۉلاولرنی، جمله‌دن، ماشینلردن پول یېچیب آلیش کمیشنی، حسابنی یوریتیش تۉلاوی و حسابنی یاپیش شرطلرینی مشتری‌لرگه انیق و یازمه روشده توشونتیریشی کېره‌ک. اولر بانک خدمتلرینی کۉرسه‌تیش عوضیگه تۉلاو اوندیریلیشی مشتری خدمتدن فایده‌لنیشدن آلدین اونینگ مقداری و شرطلریدن خبردار بۉلگن تقدیرده‌‌گینه مقبول اېکنینی، بانکلر اېسه مزاج آلدیندن بیلمه‌گن مبلغلرنی اونینگ حسابیدن اوشلب قالیشدن تیییلیشی کېره‌کلیگینی تأکیدله‌ماقده.
بوندن آلدین هم منبعلر عزیزی بانک برچه مشتری‌لری‌نینگ حسابلریدن هر آی «حسابنی یوریتیش اوچون خدمت حقی» (Account Maintenance Fee) نامی آستیده معلوم مقدارده‌گی مبلغنی اوشلب قاله‌یاتگنینی دعوا قیلگن اېدی. منبعلرگه کۉره، بو مبلغ حسابده‌گی قالدیق مقداریدن و مشتری‌لر‌نینگ آلدیندن خبردار قیلینگن-قیلینمه‌گنیدن قطعی نظر، اوشلب قالینه‌دی.
طالبان باشقروویده‌گی مرکزی بانک مملکتده حاضرده ۱۲ ته بانک، جمله‌دن، اوچ ته دولت بانکی، یېتّی ته خصوصی بانک و ایکّیته خارجی بانک وکالت‌خانه‌سی فعالیت یوریته‌یاتگنینی معلوم قیلگن. اوشبو بانک معلوماتلریگه کۉره، مملکت اهالیسی‌نینگ قریب ۱۵ فایزی بانک حسابیگه و مالیوی خدمتلردن فایده‌لنیش امکانیتیگه اېگه.
