سوریه و عراق امریکا هجوم‌لرینی قاره له‌دیلر
سوریه و عراق وکیللری بو ایکّی مملکت ده امریکا نینگ سۉنگی هجوم‌لری نقطه‌لرینی تیکشیریش خصوصیده یولگه قۉیلگن خۉفسیزلیک کینگشی ییغیلیشیده، بو هجوم‌لرنی قاره له‌دیلر.
الجزیره آژانسی نینگ گزارشی گه کوره، بو ییغیلیش ۵ فبروری، دوشنبه کیچه یولگه قۉییلگن.
سوریه نینگ بیرلشگن ملتلر تشکیلاتیده دایمی وکیلی بسام صباغ نینگ ایتیشیچه: «سوریه ده امریکا نینگ هجومی اۉنلب کیشی نینگ اولیب و یره‌لنیشی و تینچ اهالی گه عاید بنالر و بیر تاریخی مکان بوزیلیشی گه سبب بولگن.»
صباغ خۉفسیزلیک کینگشی دن، امریکا خلق‌ارا قانون-قاعده‌لری گه قرشی سوریه حاکمیتینی نقض قیلگنی اوچون اۉز مسوولیتی گه عمل قیلیشینی سوره‌گن.
او نینگ کوپه‌یتیریشیچه: «امریکا دولتی دن منطقه ده‌گی سیاست‌لرینی چیتده قوییب و بیز نینگ توپراق‌لریمیز ده ناقانونی حضوری گه چېک قۉییشینی اېسته‌یمیز.»
سوریه‌لیک اوشبو دیپلمات، امریکا نی غزه ده اسراییل نینگ «جنایت‌لری» بوییچه خۉفسیزلیک کینگشی نینگ ایشلرینی بجریش گه توسقین‌لیک قیله‌یاتکن‌لیکده عیبله‌گن.
شو بیلن بیرگه، اوشبو ییغیلیش ده بیرلشگن ملتلر تشکیلاتی ده عراق نینگ دایمی نماینده‌سی عباس کاظم عبید، امریکا نینگ عراق ده‌گی سۉنگی هجوم‌لرینی قاره‌لب و بو هجوم‌لر منطقه ده کېسیکن‌لیک‌لر اوج آلیشی گه سبب بولیشیدن آگاه‌لنتیرگن.
عبید نینگ کوپه‌یتیریشیچه: «عراق حربی قرارگاه‌لری گه اۉیوشتیریله‌دیگن هر قنده‌ی هجوم نی رد قیله‌دی و مملکتی‌میز منطقه گواه بولگن کېسیکن‌لیک‌لر گه تارتیلیشی اوچون اېزین بیرمه‌ی میز.»
عین‌حالده، تهران حمایتیده بولگن عراق‌لیک شبه‌نظامی‌لر اردن ده امریکا حربی قرارگاهی گه هجوم قیلیب اوچ عسکر نینگ اولیمی و باشقه ۴۰ دن آرتیق عسکر نینگ یره‌لنیشی گه سبب بولدی، امریکا بو هجوم گه جواب تورت کون آلدین عراق و سوریه ده مذکور شبه‌نظامی‌لر گه قرشی هجوم اۉیوشتیردی.
معلومات‌لر اساسیده، امریکا نینگ اوشبو هجوم‌لریده ۳۹ کیشی اولگن.
آلدینراق چین تشقی ایشلر وزیرلیگی سوزلاوچیسی وانگ ون‌بین، بیجینگ امریکا نینگ سوریه و عراق ده هجوم‌لری گه قرشی‌لیگینی بیلدیردی.
