قشّاقلیکنینگ کوچهییشی؛ کابلدهگی بیر قومی اویوشمه تامانیدن اجتماعی مراسملر خرجتلریگه چېکلاولر جاری اېتیلدی
۸صبح، کابل: افغانستانده ایشسیزلیک و قشّاقلیکنینگ آرتیشی آرتیدن، کابلده استقامت قیلووچی جرمتو خلقی اتفاقی اۉز اعضالرینینگ تۉی، ختم و خیر-احسان، فاتحه اۉقیش همده جنازه مراسملری اوچون صرف-خرجتلریگه چېکلاولر جاری قیلگن.
اوشبو اتفاق تامانیدن اعلان قیلینگن و یکشنبه، ۱۵-سنبله، ۸صبح گزېتهسیگه اختیاریده قۉییلگن قرارده اَیتیلیشیچه، قشّاقلیک، ایشسیزلیک و اقتصادی معمالرنی حسابگه آلگن حالده کتّه خرجتلر خلق اوچون فایدهلی اېمس و قشّاقلیک همده ناچارلیکنینگ کېنگهییشیگه سبب بۉلهدی.
قرارده قید اېتیلیشیچه، بوندهی مراسملرنی کتّه و آرتیقچه خرجتلر بیلن اۉتکزیش شرعی جهتدن قارهلنهدیگن، اجتماعی جهتدن ناتۉغری و اقتصادی جهتدن ضررلی حسابلنهدی.
اوشبو قومی اتفاق قراریده فاتحه اۉقیش مراسمی، مرحومنینگ قیرق و ییللیک مراسملری، نکاح مراسمی، خینه کېچهسی، شیرییخۉرلیک، زیارت مراسمیدن قَیتیش، ختم و خیر-احسان همده اوشبو خلق آرهسیده کېنگ ترقهلگن باشقه اجتماعی عرف-عادتلر خرجتلریگه دایر قاعدهلر بېلگیلنگن.
بو حالت طالبان گروهینینگ افغانستان اوستیدن قَیته حکمرانلیک قیلیشی بیلن جمعیتده ایشسیزلیک، قشّاقلیک و ناچارلیک کون سایین آرتیب بارهیاتگن بیر پیتده یوز بېرماقده.
