بیرلشگن ملتلر تشکیلاتی کابل‌نینگ چهار آسیاب شفاخانه‌سیده کوتیش سالونی قوریلگنی حقیده خبر بېردی
۸صبح، کابل: بیرلشگن ملتلر تشکیلاتی‌نینگ اهالی یشه‌ش جایلری دستوری (UN-Habitat) کابل‌نینگ چهار آسیاب شفاخانه‌سیده بېمارلر و مراجعتچیلر اوچون قوله‌یراق شرایط یره‌تیش مقصدیده کوتیش سالونینی قوریشنی باشله‌گنینی معلوم قیلدی.
مذکور تشکیلات دوشنبه کونی، ۵ اسد، اوشبو سالون صفتلی ساغلیقنی سقلش خدمتلرینی قۉللب-قوّتلش اوچون قوریله‌یاتگن آلتیته کوتیش سالونلردن بیری اېکنینی خبر قیلگن.
بیرلشگن ملتلر تشکیلاتی تأکیدلشیچه، هېچ بیر آنه کسل فرزندی بیلن ایسّیق یاکه ساووقده کوتیشگه مجبور بۉلمسلیگی کېره‌ک و بونده‌ی مسکنلر‌نینگ برپا اېتیلیشی بېمارلر همده اولر‌نینگ عایله اعضالری اوچون کوتیش شرایطلرینی یخشیله‌یدی.
تشکیلات قۉشیمچه قیلیشیچه، ینگی کوتیش سالونلری بېمارلر، اولر‌نینگ همراهلری و شفاخانه‌لرگه مراجعت قیلووچیلر اوچون خوفسیزراق همده انسان قدر-قیمتیگه مناسب محیط یره‌ته‌دی.
بیرلشگن ملتلر تشکیلاتی‌نینگ اهالی یشه‌ش جایلری دستوری اوشبو لایحه جاپان خلق‌ارا همکارلیک آژانسی (JICA) یاردمیده عملگه آشیریله‌یاتگنینی و اونینگ مقصدی ساغلیقنی سقلش انشااتلرینی یخشیلش همده اهالی‌نینگ صفتلی طبی خدمتلردن فایده‌لنیش امکانیتینی کېنگه‌یتیریش اېکنینی بیلدیرگن.
