بیرلشگن ملتلر تشکیلاتی ترقیات دستوری افغانستانده ۱۶ مینگته ایش اۉرنی یره‌تدی
۸صبح، کابل: بیرلشگن ملتلر تشکیلاتی نینگ ترقیات دستوری (UNDP) معلوم قیلیشیچه، افغانستاندهگی اقتصادی انقراضگه قره‌مه‌ی، اوشبو تشکیلات نینگ ینگی اعتبار کفالت دستوری، مینگلب کارخانه‌لرنی قۉللب-قوتلش و مینگلب ایش ا‌ۉرینلرینی یره‌تیش امکانینی بېرگن.
تشکیلات،۳- عقرب، شنبه کونی، اعلان قیلگن گزارشیده بیلدیریشیچه، ترقیات دستوری و بیرلشگن ملتلر تشکیلاتی نینگ بیر میلیون دالرلیک دستوری آرقه‌لی ییتی مینگ و ۵۰۰ کیچیک و اۉرته تجارتنی قۉللب-قوتلش اوچون قریب ۲۰ میلیون دالر مقداریده اعتبار اجره‌تیلگن.
حساباتگه کۉره، اوشبو تشبث نتیجه‌سیده بوتون افغانستان بۉیلب ۱۶ مینگته ینگی ایش اۉرنی یره‌تیلگن.
معلوماتده ایتیلیشیچه، بو کارخانه‌لر نینگ ایکی مینگ و ۲۵۰ دن آرتیغی عیاللرگه تېگیشلی بۉلیب، ینگی ایشگه قبول قیلینگنلر آره‌سیده قریب بیش مینگ نفر عیال هم بار.
اعتبار کفالت دستوری، افغانستان نینگ اعتبارات کفالت جمغرمه‌سی (ACGF) آرقه‌لی عملگه آشیریلماقده. اونینگ مقصدی بانکلر اوچون خطرنی کمه‌یتیریش و اولرنی کیچیک کارخانه‌لرگه اعتبار بېریشگه اونده‌شدیر.
مذکور دستور دایره‌سیده بیرلشگن ملتلر تشکیلاتی بانکلرگه قیتریلمه‌گن اعتبارلر بۉییچه ضررلر نینگ بیر قسمینی قاپله‌یدی، بو اېسه مالی نهادلر گه خصوصی سکتورگه ینه‌ده ایشانچ بیلن سرمایه کیریتیش امکانینی بېره‌دی.
بیرلشگن ملتلر تشکیلاتی ترقیات دستوری تأکیدله‌گنیچه، اوشبو تشبث افغانستان اقتصادینی تیکلش و برقرارلیگینی مستحکملش بۉییچه کېنگراق سعی-حرکتلر نینگ بیر قسمیدیر. او تخنیکی تعلیم، مالی محصولاتلرنی رواجلنتیریش و رقملی اعتبار خدمتلرینی کېنگه‌یتیریشنی هم اۉز ایچیگه آله‌دی.
تشکیلات قید اېتیشیچه، افغانستان تجربه‌سی شونی کۉرسه‌ته‌دیکی، تۉغری ایشلب چیقیلگن و محلی مؤسسه‌لر بیلن همکارلیکده عملگه آشیریلگن اعتبار کفالت میکانیسم‍لری خصوصی سرمایه‌نی سېزیلرلی درجه‌ده فعاللشتیریب، انقراض شرایطیده اقتصادی اۉسیشنی تېزلشتیریشی ممکن.
معلومکی، طالبان نینگ حاکمیتگه قیتیشیدن کېین اقتصادی تیزیم نینگ قوله‌شی و تجارت فعالیتی نینگ کېسکین پسه‌ییشی عاقبتیده افغانستاندهگی کۉپلب کیچیک و اۉرته کارخانه‌لر نقدیلر یېتیشمسلیگی، طلب نینگ پسه‌ییشی و مالی منبعلرگه چېکلنگن کیریش معمالری بیلن یوزلشگن.
