یونیسف بحرانلر یوزهگه کېلیشیدن آلدین چارهلر کۉریشگه اورغو بېردی
۸صبح، کابل: بیرلشگن ملتلر تشکیلاتینینگ بالهلرنی قۉللب-قۉتلش جمغرمهسی (یونیسف)نینگ افغانستاندهگی وکیلی تاجالدین اویواله، «تاثیر ثمرهدارلیگینی بهالش خلقارا فورومی»ده اوشبو تشکیلاتنینگ افغانستانده بحرانلرنینگ آلدینی آلیشگه قرهتیلگن چارهلر ساحهسیدهگی تجربهسی بیلن اۉرتاقلشدی.
اویواله سهشنبه کونی، ۳۱ سنبله، ایکس صحیفهسیده بحران یوزهگه کېلیشیدن آلدین دلیللردن فایدهلنیش، آلدیندن بېلگیلنگن مالیهلشتیریشنی تامینلش و محلی صلاحیتلرنی کوچهیتیریش آرقهلی چاره کۉریش بحرانلرگه نسبتاً چیدملیلیکنی آشیریشگه یاردم بېریشی ممکنلیگینی اَیتدی.
او قۉشیمچه قیلیشیچه، اوشبو ییغیلیش یونیسف، بیرلشگن ملتلر تشکیلاتینینگ قاچقینلر بۉییچه عالی کمیسارلیگی، بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (فایو)، جهان آزیق-آوقت دستوری و بیرلشگن ملتلر تشکیلاتینینگ انسانپرورلیک یاردملرنی موافقلشتیریش باشقرمهسی (اوچا) تامانیدن تشکیل اېتیلگن.
افغانستان سۉنگگی ییللرده تورلی انسانپرورلیک بحرانلر و طبیعی آفتلرگه دوچ کېلماقده. قورغاقچیلیک، سوو تاشقینلری و زلزلهلر مملکتنینگ اَیریم حدودلریده عایلهلرگه ضرر و تلفات یېتکزگن حادثهلر جملهسیدن دیر.
