بیرلشگن ملتلر تشکیلاتی: افغانستانده آنه‌لر و چقه‌لاقلر اۉلیمینی کمه‌یتیریش اوچون یېترلی طبی امکانیتلر ضرور بۉلماقده
۸صبح، کابل: بیرلشگن ملتلر تشکیلاتی نینگ انسان مسنکنلنتیریش دستوری (UN-Habitat) معلوم قیلگنیچه، افغانستانده آنه‌لر، چقه‌لاقلر و باشقه بېمارلر نینگ اۉلیمی نینگ آلدینی آلیش اوچون یېترلی و ماس طبی امکانیتلرگه کېسکین احتیاج موجود بۉلگن.
تشکیلات، ۱۳- قوس، پنجشنبه کونی، ایکس صحیفه‌سیده اعلان قیلگن بیاناتیده، آنه‌لر و چقه‌لاقلر اوچون ضرور بۉلگن طبی خدمتلرنی قۉللب-قوتلش و اولرنی تقدیم اېتیشگه اعتبار قره‌تگنینی تأکیدله‌گن.
مذکور تشکیلات قۉشیمچه قیلیشیچه، اۉز همکارلری بیلن بیرگه اساسی توزیلمه‌لرنی یخشیلش اوستیده ایشله‌ماقده، شونده آنه‌لر، چقه‌لاقلر و باشقه بېمارلر حیاتی و نجاتکار خدمتلردن فایده‌لنیش امکانیگه اېگه بۉلیشی ممکن. بو آره‌ده افغانستان نینگ کۉپلب حدودلریده آنه‌لر نینگ طبی خدمتلرگه کیریش امکانی چېکلنگن بۉلیب قالماقده و جهازلر نینگ یېتیشمسلیگی همده ملکه‌لی متخصصلر کملیگی اۉلیم خوفینی آشیریب بېرماقده.
بوندن تشقری، یېترلی درجه‌ده جهازلنگن طبی مرکزلر نینگ تنقیصلیگی و قیشلاقلر بیلن شفاخانه‌لر اۉرته‌سیده‌گی اوزاق مصافه‌لر، آنه‌لر نینگ دوالنیش خدمتلرینی آلیش جریانیده جدی قیینچیلیکلرگه دوچ کېلیشیگه سبب بۉلماقده.
