بیرلشگن ملتلر تشکیلاتی افغانستانده شهرسازلیکنی رېجه‌لشتیریش و آست-قورمه‌لر‌گه سرمایه کیریتیشنی تأکیدله‌دی
۸صبح، کابل: بیرلشگن ملتلر تشکیلاتی‌نینگ انسان یشه‌ش جایلری دستوری (UN-Habitat)نینگ معلوم قیلیشیچه، شهرلر‌نینگ اۉسیب باریشی بیلن ساغلامراق محله‌لر یره‌تیش و وطنداشلر‌نینگ حیات صفتینی یخشیلش اوچون عاقلانه شهرسازلیکنی رېجه‌لشتیریش همده آست-قورمه‌لر‌گه سرمایه کیریتیش ضرورتگه ایلنگن.
مذکور تشکیلات یکشنبه کونی، ۱۱-اسد کونی، ایکس صحیفه‌سیده یازیشیچه، کاپیسا ولایتی مرکزی بۉلگن محمود راقی، شهری اتیگی ۲۱ ییل ایچیده تۉرت برابر کېنگه‌یگن.
تشکیلات بو اۉزگریشنی افغانستانده شهرلر جدللیک بیلن اۉسه‌یاتگنی‌نینگ نمونه‌سی صفتیده بهالب، شهرلر رواجلنیشی اهالی‌نینگ تاباره آرتیب باره‌یاتگن احتیاجلرینی قاندیره آلیشی اوچون تېگیشلی رېجه‌لشتیریش بیلن بیرگه آلیب باریلیشی کېره‌کلیگینی تأکیدله‌دی.
بیرلشگن ملتلر تشکیلاتی‌نینگ انسان یشه‌ش جایلری دستوری شهرلر برچه وطنداشلر اوچون ثمره‌لی، کینگ قمراولی و یشه‌شگه قوله‌ی طرزده رواجلنتیریلیشی لازملیگینی تأکیدله‌دی.
عینِ پیتده، افغانستان قشّاقلیک، اهالی سانی‌نینگ تېز اۉسیشی، ایچکی مهاجرت، شهر آست-قورمه‌لر‌نینگ یېتیشمسلیگی و شهرلشیش‌نینگ کېنگه‌ییشی سببلی شهرلر‌نینگ برقرار رواجلنیشی، جماعت خدمتلریدن فایده‌لنیش همده مناسب اوی-جای بیلن تأمینلش ساحه‌لریده کېنگ کۉلملی معمالرگه دوچ کېلماقده.
