بیرلشگن ملتلر تشکیلاتی افغانستانده یوزلب ساغلیقنی سقلش خادملری اۉقیتیلگنی و طبی خدمتلر کېنگه‌یتیریلگنی حقیده خبر بېردی
۸صبح، کابل: جهان ساغلیقنی سقلش تشکیلاتی (WHO) ۵۳۱ نفر ساغلیقنی سقلش خادیمینی ۱۴ ته اختصاص‌لشگن یۉنه‌لیشده اۉقیتگنی همده اوشبو تشکیلات قۉللب-قوّتله‌یاتگن دوالش مرکزلری اهالیگه کېنگ کۉلملی طبی خدمتلر کۉرسه‌تگنینی معلوم قیلدی.
مذکور تشکیلات سه‌شنبه کونی، ۳۰-سرطان کونی اعلان قیلگن حساباتیده افغانستان بۉیلب ساغلیقنی سقلش صلاحیتینی آشیریش اوچون سېزیلرلی سرمایه‌لر عملگه آشیریلگنی و ساغلیقنی سقلش خادملرینی اۉقیتیش مملکتده طبی خدمتلرنی یخشیلشگه قره‌تیلگن سعی-حرکتلر‌نینگ بیر قِسمی بۉلگنینی بیلدیردی.
حساباتگه کۉره، جهان ساغلیقنی سقلش تشکیلاتی قۉللب-قوّتله‌یاتگن ساغلیقنی سقلش مرکزلری ۶۴ مینگ ۱۴۶ ته مصلحت خدمتی کۉرسه‌تگن همده بېش یاشدن کیچیک اوچ مینگ‌دن آرتیق باله‌گه واکسین قۉلله‌گن.
بیرلشگن ملتلر تشکیلاتی قۉشیمچه قیلیشیچه، افغانستان‌نینگ چېکّه حدودلریده هم ۴۷ مینگ‌دن آرتیق کیشی اوشبو تشکیلات‌نینگ ساغلیقنی سقلش بۉییچه تعلیم دستورلری و خبردارلیک ماتریاللریدن فایده‌لنگن.
شونگه قره‌مه‌ی، افغانستانده ساغلیقنی سقلش خدمتلریدن فایده‌لنیش هلی هم کۉپلب معمالرگه دوچ کېلماقده و ساغلیقنی سقلش تیزیمینی مستحکملش همده اهالیگه، اینیقسه چېکّه حدودلرده‌گی آدملرگه خدمتلر کۉرسه‌تیشنی تأمینلش اوچون قۉللب-قوّتلشنی دوام اېتتیریش ضرور.
