الجزیره: اسراییل‌نینگ غزه‌ده‌گی هوا هجومیده اۉنلب آدملر هلاک بۉلدی
الجزیره تلویزیونی‌نینگ خبر بېریشیچه، اسراییل هوا کوچلری‌نینگ غزه شِمالیده‌گی ایکّیته مکتب‌گه اویوشتیرگن هجومی عاقبتیده اۉنلب تینچ اهالی هلاک بۉلگن.
اوشبو هجوملر ۱۸-نوامبر، شنبه کونی غزه شِمالیده‌گی «الفاخوره» و «تل‌الزعتر» مکتبلریگه اویوشتیریلگن.
بو مکتبلر بیرلشگن ملتلر تشکیلاتی (اونروا) بیلن باغلنگن بۉلیب، کۉچیریلگن آدملر، اولرنینگ اکثریتی باله‌لر جایلشگن.
فلسطین ساغلیقنی سقلش وزیرلیگی الفاخوره مکتبیگه هجومده کمیده ۵۰ کیشی هلاک بۉلگنینی معلوم قیلدی.
اوشبو خبرگه کۉره، بو ایکّی هجومده «یوزلب» آدملر هلاک بۉلگن و یره‌لنگن.
بیراق غزه جَنوبیده‌گی خان یونیس‌دن خبر بېرگن الجزیره خبرچیسی هانی محمود: «هجوملرده دېیرلی ۲۰۰ کیشی هلاک بۉلدی و اولرنینگ سانی آرتیشی کوتیلماقده، چونکه کۉپلری ویرانه‌لر آستیده. «آدملر انسانلرنی آلیب چیقیش اوچون بېل کوره‌کلری و یلنگ قۉللرینی ایشله‌تماقده‌لر.» دېب معلوم قیدی.
عینِ پیتده یونیسف‌نینگ یقین شرق و شمالی افریقا بۉییچه منطقوی مدیری ادیلا خودر ایکس اجتماعی ترماغیده شونده‌ی دېب یازدی: «باله‌لر، مکتبلر و باش‌پناه‌لرنی نشانگه آلمه‌نگلر»
اوّلراق اسراییل اوردوسی «جبالیا» اهالیسینی حدودنی ترک اېتیش حقیده آگاهلنتیرگن اېدی.
اسراییل فقط حماسنی نشانگه آلگنینی ایتیب، ضربه‌لر حقیده کمدن-کم ایضاح بېره‌دی.
شو بیلن بیرگه، واشنگتن پُست کونده‌لیگی منبعلرگه ته‌یه‌نیب، اسراییل، امریکا و حما‌س تخمینی کېلیشووگه اېریشگنینی، اونگه کۉره، جنگلرده بېش کونلیک تنفس عوضیگه غزه‌ده‌گی اسیر آلینگن اۉنلب محبوسلر آزاد قیلینیشینی معلوم قیلدی.
