امریکا و روسیه فلسطین نینگ باسیب آلینگن منطقه‌لری حقیده بحث ایته‌دیلر
امریکا و روسیه نینگ وکیللری فلسطین نینگ اسراییل تامانیدن باسیب آلینگن منطقه‌لری قانونی بولیشینی خلق‌ارا لاهه محکمه‌سیده بحث گه آلیشلری کوتیله‌دی.
رویترز نینگ گزارشی گه کوره، ایکّی تامان ۲۱ فبروری چهارشنبه کونی بو حقده بحث ایتیش‌لری ممکن.
واشنگتن ۲۰۲۲-ییل ده محکمه نینگ بوتوغریده‌گی قراری گه قرشی‌لیک کورستگن اېدی.
۱۰ دن آرتیق مملکت جمله دن جنوبی افریقا، اسراییل نینگ اشغالی منطقه‌لرده‌گی حرکت‌لریدن تنقید قیلیب و لاهه محکمه‌سیدن بو اشغال نی ناقانونی اعلام قیلیشینی سۉره‌گنلر.
معلومات‌لر اساسیده، بیرلشگن ملتلر تشکیلاتی نینگ عمومی مجمع‌‌سی ۲۰۲۲ ییل ده خلق‌ارا لاهه محکمه‌سی (ICJ) دن اشغالی حقوق عاقبت‌لری توغریسیده خلاصه چیقریشنی سۉره‌گن.
معلومات‌لر اساسیده، ۵۰ دن آرتیق مملکت هم فلسطین نینگ اسراییل تامانیدن باسیب آلینگن منطقه‌لرینی ناقانونی اعلام قیلیش خصوصیده‌گی فکر-ملاحظه‌لرینی میلادی اوشبو آی نینگ ۲۶ گه قدر مذکور محکمه گه یوللشی ممکن.
اسراییل بو حرکتلر گه مناسبت بیلدیریب، مذاکره‌لر بیلن ییچیم یول تاپیلیشی ممکن بولگن ایش گه محکمه نینگ اره‌لشووی زیانلی بولیشیدن آگاه‌لنتیرگن.
شو بیلن بیرگه، فلسطین وکیللری قاضی‌لردن اسراییل تامانیدن اوشبو مملکت نینگ باسیب آلینگن منطقه‌لرینی ناقانونی اعلام قیلیشینی سوره‌گنلر.
بوتوغریده لاهه محکمه‌سی اۉز قرارینی آلتی آی دن سۉنگ اعلام قیلیشی کوتیله‌دی.
عین‌حالده اسراییل ۲۰۰۴ ییل ده فلسطین نینگ باسیب آلینگن منطقه‌لرینی قیتیریش اوچون جهانی محکمه نینگ قرارینی رد قیلگن اېدی.
او زمان لاهه محکمه‌سی اسراییل و کرانه باختری آره‌سیده چېگره دیواری قوریلیشینی ناقانونی دیب بو معما حل بولیشی اوستیگه تاکید ایتگندی.
کرانه باختری، غزه و شرقی اورشلیم، فلسطین نینگ اشغالی منطقه‌لریدن سنله‌دی. اسراییل بو منطقه‌لرنی ۱۹۶۷ ییل ده باسیب آلگن.
