قوله‌ش‌نینگ بېش ییللیگی؛ رواداری: طالبان حکمرانلیگی‌نینگ بېش ییلیده ۶۹۰۰ دن آرتیق تینچ اهالی اۉلیب و یره‌لنگن
۸صبح، کابل: رواداری انسان حقوقلری تشکیلاتی ۲۰۲۱-ییل ۱۵-اگوست‌دن ۲۰۲۵-ییل ۳۱-دسمبرگچه بۉلگن دورده تورلی حادثه‌لرده کمیده ۶ مینگ ۹۲۹ نفر تینچ اهالی جان بېریب و یره‌لنگنینی معلوم قیلدی.
اوشبو تشکیلات شنبه کونی، ۲۴-اسدده ترقه‌تگن بیاناتیده اَیتیشیچه، بو حادثه‌لر مقصدلی، سِرلی و محکمه‌سیز قاتللیکلر، پارتلشلر و خودکوشلیک هجوملری، اوروشدن قالگن اۉق-دارولر‌نینگ پارتلشی همده پاکستان‌نینگ حربی هجوملرینی اۉز ایچیگه آله‌دی.
بوندن تشقری، بو دورده طالبان محکمه‌لری تورلی عیبلاولر بیلن کمیده ۲ مینگ ۴۲۳ کیشینی قانوندن تشقری، شفقت‌سیز و غیرِ انسانی اصوللر بیلن جزاله‌گن.
بیاناتگه کۉره، بو جزالر قصاص و قتل حکملرینی عامه‌وی روشده اجرا اېتیش، قمچیلش و عیبلنووچیلر‌نینگ یوزینی قاره‌یتیریشنی اۉز ایچیگه آلگن.
بو حسابات افغانستان طالبان حکمرانلیگی‌نینگ بېشینچی ییلیده هم انسان حقوقلری‌نینگ کېنگ کۉلمده بوزیلیشی، وطنداشلر‌نینگ، اینیقسه عیاللر و قیزلر‌نینگ اساسی حقوق و اېرکینلیکلریگه نسبتاً کوچه‌ییب باره‌یاتگن چېکلاولر، شونینگدېک، سۉز اېرکینلیگی و یېتکرمه فعالیتیگه قۉییلگن چېکلاولرگه گواه بۉلیب تورگن بیر پیتده اعلان قیلیندی.
