اوروش میدانیدن انسانی مجبوریتلرگچه؛ «وطن ساهیلری» جبهه‌سی حربی نظامینی اعلان قیلدی
نیما
وطن سپاهیلری جبهه‌سی اۉزی‌نینگ حربی نظامینی تنیشتیریب، انسان حقوقلری، انسانپرورلیک تمایللری و قوراللی ماجرالر بیلن باغلیق خلق‌ارا معیارلرگه رعایه اېتیشنی اۉزی‌نینگ اساسی مجبوریتلریدن بیری دېب بیلیشینی معلوم قیلدی. اوشبو جبهه مذکور نظام اساسیده اۉزینی جېنوا کنوانسیونلری‌نینگ تۉرتته‌سیگه رعایه اېتیش، تینچ اهالی، اوروش اسیرلری، یره‌دارلر، ژورنالیستلر و قوتقروو خادملرینی حمایه قیلیشگه صادق دېب بیلیشینی، شونینگدېک هر قنده‌ی قییناق، گروگه آلیش، تحقیرلش و انسان قدر-قیمتیگه تجاوزنی تقیقلشینی بیلدیردی. جبهه اۉزی‌نینگ اوچ باب و ۲۰ مادّه‌دن عبارت نظامیده تینچ اهالی هېچ قچان حربی عملیاتلر نشانی بۉلمسلیگینی، سۉز اېرکینلیگی و عامه‌وی اخبارات واسطه‌لری فعالیتینی قۉللب-قوّتلشینی همده ژورنالیستلر و محلی همده خلق‌ارا یاردم تشکیلاتلرینی حمایه قیلیشنی اۉز مسؤولیتلریدن بیری دېب بیلیشینی تأکیدله‌دی. شونینگدېک، او جماعت منفعتیگه خدمت قیلووچی انشااتلر و مدنی میراثلر‌نینگ ویران قیلینیشی‌نینگ آلدینی آلیشینی همده اۉز اعضالری تامانیدن قاعده‌بوزرلیک صادر اېتیلگنی اثباتلنگن تقدیرده، اولرنی خلق و نظارت ارگانلری آلدیده جوابگر قیلیشینی معلوم قیلدی.
وطن سپاهیلری جبهه‌سی اۉزی‌نینگ حربی نظامینی تقدیم اېتدی. جبهه یازیشیچه، اوروش انسانیت اوچون اچّیق و ایسته‌لمه‌گن حادثه‌دیر، بیراق یورتنی حمایه قیلیش و ترورچی همده باسقینچی کوچلرگه قرشی توریش آخرگی چاره صفتیده مقرر حسابلنه‌دی. جبهه اېنگ آغیر شرایطلرده هم شرعی چېگره‌لر، انسانپرورلیک تمایللری و انسان حقوقلری معیارلریگه رعایه قیلیش اخلاقی همده استراتژیک ضرورت اېکنینی تأکیدله‌دی.
وطن سپاهیلری جبهه‌سی اۉزی‌نینگ جنگاور نظامینی انسان قدر-قیمتینی اسره‌ش بیلن بیرگه جماعتچیلیک وجدانی، دینی قدریتلر و خلق‌ارا معیارلر آلدیده هم جوابگر بۉلیش مقصدیده ایشانچلی حجت و عملی خُلق-اطوار مېزانی صفتیده ایشلب چیققنینی قید اېتدی.
جبهه خلق آره‌سیدن چیققنینی و اۉزینی اولرنی حمایه قیلیشگه مسؤول دېب بیلیشینی بیلدیردی. جبهه‌‌نینگ جنگاور نظامیده اېتنیک، مدنی، تیل و دینی خیلمه-خیللیککه حرمت بیلن قره‌شی همده خلقنی ظلم و استبداددن آزاد اېتیش فقط هم‌جهتلیک، بیردملیک و تینچ-تاتوو یشه‌ش آرقه‌لی ممکنلیگی تأکیدلنگن.
نظام‌نینگ ایکّینچی بندیده شونده‌ی دېیله‌دی: «وطن سپاهیلری جبهه‌سی قیمتلی دینی تعلیماتلر اساسیده قوراللی کوره‌ش آلیب بارر اېکن، کوره‌ش‌نینگ شرَفی زۉرآورلیکده اېمس، بلکه زۉرآورلیک‌نینگ تیزیملی توس آلیشی‌نینگ آلدینی آلیش و یوکسک اخلاققه صادقلیکده دېب بیله‌دی همده بو یۉلدن هر قنده‌ی آغیشنی وطن سپاهیلری جبهه‌سی‌نینگ برچه تمایللری و اساسلریگه ضد دېب بهاله‌یدی.»
جبهه اۉزینی جېنوا کنوانسیونلری‌نینگ تۉرت‌ته کنوانسیونی همده قوراللی ماجرالر بیلن باغلیق باشقه خلق‌ارا بیتیملر قاعده‌لریگه رعایه اېتیشگه مجبور دېب بیلیشینی تأکیدله‌دی. نظامده اَیتیلیشیچه، اوروش اسیرلری، یره‌دارلر، تینچ اهالی، ژورنالیستلر و قوتقروو خادملرینی حمایه قیلیش، شونینگدېک گروگه آلیش، قییناق و مدنی میراثلرنی ویران قیلیشنی تقیقلش عمومې اعتراف اېتیلگن خلق‌ارا تمایللر حسابلنه‌دی. شو سببلی، جبهه اوشبو قدریتلردن هر قنده‌ی چېتگه چیقیشنی اۉزی‌نینگ اساسی تمایللری و انسانی مجبوریتلرینی پایمال اېتیش دېب حسابله‌یدی.
نظام‌نینگ تۉرتینچی بندیده وطن سپاهیلری جبهه‌سی خلققه خدمت قیلیش، کوره‌ش یۉلیده حلاللیک و امانتدارلیک، تشکیلی انتظامگه حرمت، دولت ملکینی حمایه قیلیش، کۉپچیلیک، مسؤولیت و جوابگرلیکنی اۉزی‌نینگ کوره‌شده‌گی استوار یۉنه‌لیشلری دېب بیلیشی قید اېتیلگن.
جبهه اۉزی‌نینگ جنگاور نظامی اوروش تمایللری، یره‌دارلر و اسیرلرگه مناسبت، اسلامی قدریتلرگه رعایه قیلیش، انسان حقوقلری، عدالتنی تأمینلش همده انسان شأنی و قدر-قیمتینی حمایه قیلیشگه عاید تمایللرنی اۉز ایچیگه آلیشینی بیلدیردی. جبهه معلوماتیگه کۉره، مذکور نظام اوچ باب و ۲۰ مادّه‌دن عبارت.
نظام‌نینگ بیرینچی مادّه‌سیده وطن سپاهیلری جبهه‌سی اۉزینی اجتماعی عدالتنی تأمینلش و وطنداشلیک حقوقلریگه رعایه اېتیشگه صادق دېب بیلیشی قید اېتیلگن. ایکّینچی مادّه‌ده اېسه جبهه وطنداشلر‌نینگ مال-ملکی، آبروسی و شأنینی حمایه قیلیشی، مال-ملکنی تارتیب آلیش، تحقیرلش و شخصی دخلسیزلیککه هر قنده‌ی تجاوزنی اۉزی‌نینگ اساسی قدریتلریگه ضد دېب بیلیشی تأکیدلنگن.
اوچینچی مادّه‌ده تینچ اهالی هېچ قچان حربی عملیاتلر نشانی بۉلمسلیگی قید اېتیلگن. تۉرتینچی مادّه‌ده اېسه جبهه احتیاط چاره‌لرینی کۉریش آرقه‌لی وطنداشلر‌نینگ حیاتی، مال-ملکی، آبروسی و شأنینی حمایه قیلیشنی اۉز وظیفه‌لریدن بیری دېب بیلیشی اَیتیلگن.
بېشینچی مادّه‌ده مملکتده‌گی دینی اعتقادلرگه حرمت، برچه اجتماعی گروهلر‌نینگ مدنی قدریتلری و دینی آزچیلیکلر‌نینگ انسانی حقوقلریگه رعایه اېتیش وطن سپاهیلری جبهه‌سی‌نینگ اساسی تمایللریدن بیری اېکنی قید اېتیلگن.
آلتینچی مادّه‌ده جبهه مملکت‌نینگ مادّی و ناماددی مدنی میراثینی حرمت قیلیشی همده اولرنی ویران قیلیش، ناقانونی آلیب چیقیش یاکه یۉق قیلیش‌نینگ آلدینی آلیشی اَیتیلگن.
یېتّینچی مادّه اساسیده وطن سپاهیلری جبهه‌سی حربی عملیاتلر دوامیده جماعت انشااتلری، انشااتلر و عمومی خدمت کۉرسه‌تیش قوریلمه‌لریگه قرشی هر قنده‌ی ویرانکار حرکتلردن تیییله‌دی و قاعده‌بوزرلرگه جبهه‌‌نینگ اساسی تمایللری دایره‌سیده چاره کۉریله‌دی.
سکّیزینچی مادّه‌ده جبهه سیاسی و وطنداشلیک تنقیدچیلریگه حرمت بیلن قره‌شی، سۉز اېرکینلیگینی ترقیات و رواجلنیش عاملی دېب بیلیشی همده سۉز اېرکینلیگی‌نینگ اساسی تمایللرینی انابتگه آلگن حالده کمچیلیکلرنی برطرف اېتیشگه قره‌تیلگن اونملی تنقیدلرنی قۉللب-قوّتلشی اَیتیلگن.
نظام‌نینگ ایکّینچی بابیده قوراللی ماجرالر حقوقی و جنگ میدانیده‌گی خُلق-اطوار قاعده‌لری بیان قیلینگن. اوشبو بابده وطن سپاهیلری جبهه‌سی اوروش اسیرلریگه خلق‌ارا کنوانسیونلر همده اسلامی و انسانپرورلیک قدریتلریگه موافق مناسبتده بۉلیشی تأکیدلنگن.
تۉقّیزینچی مادّه اساسیده اوروش اسیرلریگه نسبتاً هر قنده‌ی قییناق، تهدید یاکه حقارتلی مناسبت قطعی تقیقلنه‌دی همده یره‌دار اسیرلر دوالنیش خدمتلرینی آلیشده استوار حسابلنه‌دی.
اۉنینچی مادّه‌ده جبهه اوروش اسیرلریدن مجبوری اقرارلیک آلیشنی دینی تعلیماتلر و انسان حقوقلری معیارلریگه ضد دېب بیلیشی قید اېتیلگن.
جبهه اۉز نظامی‌نینگ اۉن بیرینچی مادّه‌سیده حربی تامانلر‌نینگ بیرار-بیر تینچ وطنداشینی نشانگه آلمسلیگینی همده اولرگه نسبتاً باسیم اۉتکزیش، تهدید قیلیش یاکه گروگه آلیش‌نینگ آلدینی آلیشینی بیلدیرگن.
اۉن ایکّینچی مادّه اساسیده اوروش اسیرلری، اوّلا، اولر‌نینگ انسانی حقوقلری تأمینلنگن حالده المشیله‌دی.
اۉن اوچینچی مادّه‌ده جبهه فایده‌سیگه جاسوسلیک عیبلاوی اثباتلنگن تقدیرده، ایشانچلی حجتلر و دلیللر تقدیم اېتیلیشی شرطی بیلن عیبلنووچی عامه‌وی، خلق اشتراکیده‌گی و شفّاف محکمه‌ده همده یېتکرمه‌لر وکیللری حضوریده محکمه قیلینیشی قید اېتیلگن. اوشبو مادّه‌ده جنایت اثباتلنگن تقدیرده عیبلنووچی اۉلیم جزاسیدن تشقری آغیر جزاگه تارتیلیشی هم تأکیدلنگن.
اۉن تۉرتینچی مادّه‌ده وطن سپاهیلری جبهه‌سی خلق‌ارا تشکیلاتلر‌نینگ اوروش اسیرلری حالتینی کوزه‌تیشینی آلقیشلشی همده اوروش اسیرلری حقیده معلومات آلیش و اولر بیلن اوچره‌شیش امکانیتینی یره‌تیشی اَیتیلگن.
اۉن بېشینچی مادّه‌ده اېسه وطن سپاهیلری جبهه‌سی محلی و خارجی شخص‌لرنی گروگه آلیشدن تیییلیشی قید اېتیلگن.
اۉن آلتینچی مادّه‌ده وطن سپاهیلری جبهه‌سی ژورنالیستلر و عامه‌وی اخبارات واسطه‌لرینی حمایه قیلیشنی اۉز مسؤولیتی دېب بیلیشی همده اولرنی قۉریقلشنی اۉز وظیفه‌لریدن بیری دېب حسابله‌یدی.
اۉن یېتّینچی مادّه‌ده وطن سپاهیلری جبهه‌سی اوروش و انقراض دوریده انسان حقوقلری تشکیلاتلری همده محلی و خلق‌ارا یاردم تشکیلاتلرینی قۉللب-قوّتلشگه اۉزینی مجبور و صادق دېب بیلیشی اَیتیلگن.
نظام‌نینگ اوچینچی بابی و اۉن سکّیزینچی مادّه‌سیده وطن سپاهیلری جبهه‌سی اعضالری تامانیدن مال-ملکنی تارتیب آلیش، تحقیرلش، زۉرآورلیک بیلن ملک طلب قیلیش، تهدید، زۉرلش، قییناق یاکه وطنداشلر‌نینگ انسانی قدر-قیمتیگه قرشی هر قنده‌ی حرکت صادر اېتیلگنی اثباتلنگن تقدیرده، قاعده‌بوزر شخص خلق اشتراکیده‌گی، شفّاف و مستقل محکمه قیلینیشی همده جنگاور نظامگه موافق جزالنیشی قید اېتیلگن.
اۉن تۉقّیزینچی مادّه‌ده وطن سپاهیلری جبهه‌سی اۉزینی خلق و انسان حقوقلرینی نظارت قیلووچی محکمه‌لر آلدیده جوابگر دېب بیلیشی اَیتیلگن.
ییگیرمه‌نچی مادّه‌ده وطن سپاهیلری جبهه‌سی‌نینگ برچه کوچلری اوشبو نظام قاعده‌لرینی عملگه آشیریش و اولرگه رعایه اېتیشگه مجبور اېکنی قید اېتیلگن.
مذکور جبهه جمعه آقشامی، ۲۶-سرطان، تخمیناً ساعت ۲:۰۰ ده اۉزی‌نینگ بیر گروه کوچلری بیلن بدخشان ولایتی‌نینگ یفتل پایان تومنیگه هجوم قیلگن و بیر نېچه ساعت دوامیده اوشبو تومن نظارتینی اۉز قۉلیده اوشلب تورگن.
