جنسی آپارتاید؛ موضوع بیرلشگن ملتلر تشکیلاتی دهلیزلریگه یېتیب باردی
دنیانینگ طالبلر برابریده‌گی نېچه تامانلمه و گنگ سیاستلری و بو گروه نینگ افغانستاندهگی خط – حرکتیگه قره‌مه‌ی؛ مذکور گروه نینگ جنسیتی آپارتاید رژیمی خصوصیده هیچ قنده‌ی شک و شبهه یۉق و اېنگ آز آدملر بونی تن آلمسلیگی ممکن. اوشبو موضوع بوگونکی دنیاده شونچه‌لیک نادرست که اوشبو حرکت نینگ اېنگ قتیق قولاوچی دوآتشه‌لری هم مساله‌نی آقله‌آلمه‌یدی. طالبلرنینگ افغانستانلیک خاتین – قیزلر تۉغریسیده‌گی تبعیض و بولرنی یۉق اېتیشگه یونلتیریلگن خط – حرکتی، اوزاق وقتلردن بېری بو گروهگه نسبتن اعتراضلر و اولرنینگ سیاستیگه قرشی میلیونلب انسان نینگ غضبله‌نیشیگه سبب بۉلیب کېلگن دیر. اېنگ سۉنگّی موردده بو اعتراضلرنینگ تاووشی بیرلشگن ملتلر تشکیلاتی نینگ دهلیزلریده ینگره‌دی و جمعیت نینگ میلیونلب زیان کۉریب کېله‌یاتگن قتلمی بو سیاست اۉپقانیده توشیب قالگنی اوچون قرشی کوره‌شیشگه ضرورت بارلیگی حقیده تاکیدلندی.
مدنی اعتراضلر کېره‌ک دیر، لېکن یېترلی اېمس. باستیریش گروهلری مدنی اعتراضلر اۉتکزیلیشیگه بها بېرمه‌یدی. تاریخ بو واقعیت نینگ گواهی دیر. زوروانلیک همده قورال اسلحه نینگ کوچی بیلن خلق نینگ اوستیده حکمرانلیک قیله دیگن دستگاه‌لری، نه هم مدنی اعتراض نینگ تیلیگه توشینه‌دیلر و نه هم بونینگ اهمیتیگه بها بېره‌دیلر افسوس.
بو، اعتراض قیلش کېره‌ک اېمسلیگی معنیسیده اېمس البته، بلکه اعتراضلرنی کېنگه‌یتیریب اونینگ شیوه‌لرینی فرقلی روشده ایلگری آلیب باریش معنیسیده دیر. همه‌سیدن اېنگ مهمی یېچیملرنی عملده تطبیق اېتیش بیلن اۉزگریشگه سبب بۉلیشی کېره‌ک. اۉشنده‌یکه طالبلر جمعیت نینگ اېنگ زیان کۉره‌دیگن قتلمینی آماجگه آلرکن، اعتراضلر هم طالبلرنینگ اېنگ زیان کۉره‌دیگن جایینی آماجگه آلیشی ضرور دیر. طالبلر نه هم مردمی رضایتگه اهمیت بېره‌دی و نه هم خلق ارا مشروعیت‌گه اولویت بېره‌دی. بو گروهگه اېنگ مهم نرسه، اولرگه موجود شرایطدن حاصل بۉله‌دیگن پول و منفت دیر. اعتراضلر بولرنینگ اېنگ کتّه تامیرینی نشانگه آلیشی کېره‌ک و بو طرح اېسه بیرلشگن ملتلر تشکیلاتیگه بو گروه نینگ بوتونله‌ی مالی تحریم آستیگه آلیش بیلن ممکن دیر. مملکت یشاوچلرینی سیستماتیک روشده یۉق اېتیش حمکرانلیگی آلغه آلیب باریلمس لیگی کېره‌ک اېدی و بولر خلق ارا برچه کنوانسیونلرنینگ انسان حقوقلری ینه خاتین – قیزلر حقوقی خصوصیده آغزینی بورگنی سبب، هیچ قنده‌ی پول بېریلمه‌سین. اونگه بیر نېچه میلیون دالرلیک پاکتلر بیلن یاردم بېرمسلیک کېره‌ک، شونده او آدملرنی باستیریش و قییناققه سالیشده آچیقراق قۉلی بۉلیشی و جسارت بیلن حرکت قیلیشیگه جرئت اېتمه‌سین. بولرگه قنچه کۉپ پول یاردم قیلینمه‌سین، اونی کۉپراق باستیریش و قیناققه آلیشگه صرفله‌یدیلر. افغانستان خلقی دولتلر حقیده نیمه یامانلیک قیلگن میز، بیزلرنی قیناققه آلیش مقصدیده پول یوباره‌دیلر دېب سۉره‌یدیلر؟ بو سوالنی بیرلشگن ملتلر تشکیلاتی نینگ افغانستان بیلن باغلیق ییغیلیشلریده شو دولت نینگ مظلوم خلقی کۉتریب، تېگیشلی دولتلردن جواب سۉره‌شی کېره‌ک. اگر اعتراضلر مقصدلی و تۉغری بۉلمه‌سه، فقط افغان عیاللری نینگ احوالیدن ناراضیلیک و بو قیلمیشنی قاره‌لش حقیده بیر نېچه عمومی جمله‌لر بیلن چېگره‌لنگن قوروق بیانات بېریش بیلن یکونلنسه، بو اونچه‌لیک کتّه تأثیر کۉرسه‌تمه‌یدی و افغانستانده قملگن میلیونلب عیاللرنینگ هېچ قنده‌ی دردیگه دوا بۉلمه‌یدی.
