گوترش: حددن تشقری ایسّیقلیک دنیا اوچون اۉلیملی تهدیدگه ایلندی
بیرلشگن ملتلر تشکیلاتی باش کاتبی آنتونیو گوترش، دنیا بۉیلب کوزهتیلهیاتگن حددن تشقری ایسّیقلیک انسانلر حیاتی، اقتصادیاتلر و ترقیات جریانی اوچون جدّی تهدیدگه ایلنگنینی معلوم قیلدی. او اقلیم معماسینینگ اساسی سببلریگه اعتبار قرهتیلمسه، بو وضعیت ینهده اۉلیملی توس آلیشینی تأکیدلهدی.
گوترش شنبه کونی، ۱ آگست، ایکس صحیفهسیده یازیشیچه، حددن تشقری ایسّیقلیک نهفقط انسانلر اۉلیمی سانینی آشیرماقده، بلکه تېنگسیزلیکنی کوچهیتیرهدی، آچرچیلیکنی کېنگهیتیرهدی و اقتصادیاتلرنی ضعیفلشتیرهدی.
او دنیا «عیناً حاضر» آدملرنی حمایه قیلیش و اقلیم معماسینینگ اساسی عامللریگه قرشی کورهشیش اوچون چاره کۉریشی کېرهکلیگینی تأکیدلهدی. عکس حالده، حددن تشقری ایسّیقلیکنینگ عاقبتلری ینهده آغیرلشهدی.
بمت باش کاتبی، شونینگدېک، ایش جایلرینی خوفسیز قیلیش، جوده ایسّیق کونلرده ایش وقتینی ماسلشتیریش همده حددن تشقری ایسّیقلیک سببلی ایشلشنی تۉختهتیشگه مجبور بۉلگن ایشچیلرنینگ درآمدینی قۉللب-قوّتلش ضرورلیگینی تأکیدلهدی.
گوترشنینگ قۉشیمچه قیلیشیچه، شهرلر، اوی-جایلر، مکتبلر و شفاخانهلر ایسّیقلیککه برداشلی حالگه کېلتیریلیشی لازم. او، شونینگدېک، کۉمیر، نفت و گازدن فایدهلنیشنی دوام اېتتیریش اقلیم انقراضینی ینهده کوچهیتیریشی حقیده آگاهلنتیردی.
