خلق‌ارا مهاجرت تشکیلاتی: ۲۰۲۵-ییلده ۱ میلیوندن آرتیق کیشی پاکستاندن افغانستانگه قَیتگن
۸صبح، کابل: خلق‌ارا مهاجرت تشکیلاتی (IOM) ۲۰۲۵-ییلده ۱ میلیوندن آرتیق افغان پاکستاندن افغانستانگه قَیتگنینی معلوم قیلدی.
اوشبو تشکیلات یک‌شنبه کونی، ۲۸-سرطان، قَیتیب کېله‌یاتگن مهاجرلر آقیمی بوتون مملکت بۉیلب مېزبان جمعیتلر و انسانپرورلیک خدمتلریگه ینه‌ده کتّه باسیم اۉتکزه‌یاتگنینی خبر قیلدی.
مهاجرلر قَیتیشی‌نینگ آرتیشی افغانستاندهگی انسانپرورلیک احتیاجلرینی سېزیلرلی درجه‌ده آشیردی و قَیتگن عایله‌لر‌نینگ کۉپچیلیگی باش‌پناه، طبی خدمتلر، کییم-کېچک همده تیریکچیلیکنی تأمینلش امکانیتلری یېتیشمسلیگی بیلن یوزمه-یوز قالماقده.
حساباتگه کۉره، قَیتگنلر‌نینگ کۉپچیلیگی پاکستانده ییللر دوامیده یشه‌گنیدن سۉنگ مال-ملکی، درآمد منبعلری و تورموشینی یۉقاتگن همده اېندی افغانستانده حیاتینی ینگیدن باشلشگه مجبور.
خلق‌ارا مهاجرت تشکیلاتی اَیتیشیچه، چېگره یۉللری و ترانزیت مرکزلریده قَیتگن عایله‌لرگه آزیق-آوقت، وقتینچه‌لیک باش‌پناه، نقد پول یاردمی، ترانسپورت خدمتلری، طبی یاردم، حمایه خدمتلری و ضرور انسانپرورلیک بویوملر تقدیم اېتماقده.
اوشبو تشکیلات تأکیدلشیچه، مهاجرلر‌نینگ قَیتیش جریانی دوام اېتر اېکن، قَیتگنلر‌نینگ احوالیگه جواب بېریش اوچون انسانپرورلیک یاردمی و خلق‌ارا هم‌جمعیتی همکارلیگیگه بۉلگن احتیاج تاباره آرتیب بارماقده.
