ایران عامه‌وی اخبارات واسطه‌لری فارس کۉرفزیده «امریکاگه تېگیشلی» بیر کېمهنینگ تۉخته‌تیلگنی حقیده خبر بېردی
ایران عامه‌وی اخبارات واسطه‌لری بیر سودا کېمهنینگ تصویرلرینی ترقه‌تیب، اوشبو کېمه اسلامی انقلاب قوریقچیلری کوچلری تامانیدن قۉلگه آلینگنی حقیده خبر بېردی.
فارس اخبارات آژانسی شنبه کونی، ۶ جون، خبر بېریشیچه، امریکالیک «آریستا» کمپنیسیگه تېگیشلی بیر یوک کېمه‌سی هرمز بۉغازیده «اۉتیش قاعده‌لری و یۉریق‌نامه‌لرینی بوزگنی» سببلی تۉخته‌تیلگن.
حساباتگه کۉره، ایران اسلامی انقلاب قوریقچیلری کوچلری تۉرت ته نفت تانکرینی امریکا اوردوسی‌نینگ «تشویقاتی و باشقرووی» آستیده هرمز بۉغازیدن چیقیشگه اورینگنینی ایتگن.
حساباتده ایتیلیشیچه، تانکرلرنینگ بیری نشانگه آلینیب تۉخته‌تیلگن، قالگن اوچ ته کېمه اېسه آرتگه قَیتگن.
حاضرچه امریکا اوشبو کېمه اۉزیگه تېگیشلی اېکنی یاکه یۉقلیگی حقیده هېچ قنده‌ی ایضاح بېرمه‌گن.
سۉنگگی هفته‌لرده امریکا اوردوسی و ایران اسلامی انقلاب قوریقچیلری کوچلری فارس کۉرفزیده وقتی-وقتی بیلن آتیشمه‌لر اویوشتیریب کېلماقده.
هرمز بۉغازی اسراییل و امریکانینگ ایرانگه قرشی هجوملری باشلنگندن بېری ایران کوچلری تامانیدن یاپیلگن بۉلیب، مملکت رخصتسیز کېمه‌لرنینگ بو بۉغازدن اۉتیشیگه یۉل قۉییلمسلیگینی بیلدیرگن.
شو بیلن بیرگه ایران و امریکا، پاکستان واسطه‌چیلیگیده اوروشنی یکونلش بۉییچه مذاکره‌لر آلیب بارماقده، اما حاضرچه کېلیشووگه اېریشیله‌دیمی یاکه یۉقمی بیللی اېمس.
