اسراییل نینگ لبنان ده حزب‌الله قرارگاه‌لری گه ینگی هجومی
اسراییل لبنان شرقیده حزب‌الله نینگ قرارگاه‌لری گه ینگی هجوم اۉیوشتیرگن.
رویترز آژانسی لبنان خوفسیزلیک ایکّی منبع‌دن نقل قیلیب یازیشیچه، اسراییل ۶ اپریل، شنبه کونی شام پیتی اوشبو مملکت نینگ سوریه یقینیده‌گی چېگره ده «جنتا» قیشلاغیده حزب‌الله گه عاید تعلیمی بیر قرارگاه‌نی نشانگه آلگن.
منبعلر گه کوره، اسراییل لبنان شرقی بعلبک شهری یقینیده صفری شهر ده هم هجوم قیلگن.
اوشبو هجوملر نینگ احتمالی تلفاتی حقیده حاضرگچه معلومات بیریلمه‌گن.
حزب‌الله لبنان، اسراییل نینگ «هرمس» پهپادینی اوشبو مملکت فضاسیده اۉریب توشیرگنینی ادعا قیلگندن نیچه ساعت اۉتگچ، بو هجوملر اۉیوشتیریلگن.
بوندن آلدین، رویترز منبعلریدن نقل قیلیب، فرانسه بیروت گه کتبی مکتوب یوللب، اسراییل و حزب‌الله لبنان آره‌سیده‌گی چېگره تارتیشوولری گه چېک قویلیشینی تکلیف قیلگنینی اېتگن اېدی.
بو گزارش اساسیده، اوشبو تکلیف فرانسه تشقی ایشلر وزیری استفان سژورن آرقه‌لی لبنان دولت ییریک رسمی‌لری جمله دن اوشبو مملکت نینگ باش وزیری نجیب میقاتی گه تاپشیریلگن.
اوشبو تکلیف ده «کنترول قیلیب بولمس» توقنشوو آلدی آلینیشی، آتیش کېسین برقرار اېتیلیشی و نهایت لبنان و اسراییل آره‌سیده چېگره تعیینلنیشی طلب قیلینگن.
