مارمل اهالیسی اوچون تونگی دهشت؛ طالبان‌نینگ تعقیب و تضییقلری ینگی توس آلدی
نیما
بلخ ولایتی‌نینگ مارمل اولسواللیگی اهالیسی سۉنگگی بیر نېچه کېچه‌دن بویان طالبان اولر‌نینگ اویلریگه باستیریب کیره‌‌یاتگنی و بو اولسواللیک اهالیسی آره‌سیده قۉرقوو همده واهمه اویغاته‌یاتگنینی اَیتماقده. مارمل اهالیسی‌نینگ سۉزلریگه کۉره، طالبان اوّلراق اولردن اویلری‌نینگ تشقریسیگه اۉرنه‌تیلگن چیراقلرنی اۉچیریب قۉییشنی طلب قیلگن اېدی. بیراق اېندیلیکده برق جنراتوریگه اېگه بۉلمه‌گن اوی اېگه‌لری طالبان‌نینگ تعقیب و تضییقلریگه دوچ کېلماقده. اهالی‌نینگ تأکیدلشیچه، طالبان آدملردن برق جنراتوری اۉرنه‌تیشنی طلب قیلگن، اما کۉپچیلیک‌نینگ نه برقی بار، نه جنراتور ساتیب آلیش و اۉرنه‌تیش خرجتینی قاپلش امکانیتی موجود. شونگه قره‌مه‌ی، اَیریم اهالی وکیللری طالبان‌نینگ باستیریب کیریشی عاقبتیده بیر حامله‌دار عیال قۉرقوو سبب حامله‌سینی یۉقاتگنینی، ینه بیر کېکسه عیال اېسه کوچلی قۉرقوودن کسللنیب، حاضر تۉشککه میخلنیب قالگنینی دعوا قیلماقده. اَیریم عیاللر‌نینگ اَیتیشیچه، ییل‌نینگ بو فصلیده عایله‌لریده‌گی اېرککلر‌نینگ کۉپچیلیگی اویده بۉلمه‌یدی و طالبان‌نینگ اویمه-اوی باستیریب کیریشی عیاللر آره‌سیده قۉرقوو همده جدّی خواطرنی ینه‌ده کوچه‌یتیرگن.
بلخ ولایتی‌نینگ مارمل اولسواللیگی اهالیسیدن اَیریملری ۸صبح گزېته‌سیگه بېرگن صحبتیده طالبان‌نینگ تعقیب و تضییقلریدن شکایت قیلگن. اولر‌نینگ اَیتیشیچه، طالبان سۉنگگی بیر نېچه کېچه‌دن بویان آدملر‌نینگ اویلریگه باستیریب کیریب، اولردن قارانغو پیتده اویلری‌نینگ تشقریسیگه چیراق یاکه یاریتیش واسطه‌سی اۉرنه‌تیشنی طلب قیلماقده.
اسمی اوشبو گزارش‌ده تیلگه آلینیشینی ایسته‌مه‌گن عیاللردن بیری ۸صبح گزېته‌سیگه بېرگن صحبتیده بیر نېچه کېچه‌دن بېری طالبان آدملر‌نینگ اویلریگه باستیریب کیریب، شاوقین-سوران کۉتره‌یاتگنی و شو آرقه‌لی اهالی آره‌سیده قۉرقوو همده واهمه اویغاته‌یاتگنینی اَیتدی. اونینگ دعواسیگه کۉره، اۉتگن کېچه حامله‌دار عیاللردن بیری طالبان باستیریب کیریشی عاقبتیده یوزه‌گه کېلگن قۉرقوو سبب حامله‌سینی یۉقاتگن.
او شونده‌ی دېدی: «قۉرقوو عاقبتیده حامله‌سینی یۉقاتگن عیال [خوفسیزلیک نقطه نظریدن اسمی آلیب تشلندی] مارمل اولسواللیگی‌نینگ لب‌حوض قیشلاغیدن اېدی. اېشیکلرنی قتّیق اوریش آوازلری ینگره‌دی؛ طالبان اویلر‌نینگ دروازه‌لرینی تقیلله‌تردی. بو آوازلرنی اېشیتیب، همه‌میز اویده خواطرگه توشدیک و کۉزیمیزگه اویقو کېلمه‌دی. اوّلدن یوره‌ک خسته‌لیگیگه چلینگن بیر کېکسه عیال اېسه جوده قۉرقیب کېتگنی سبب کسللیگی ینه‌ده آغیرلشدی.»
مارمل اولسواللیگی‌نینگ ینه بیر اهالیسی شونده‌ی دېدی: «طالبان بیر نېچه کېچه‌دن بېری تونگی پیتده آدملرنی تعقیب و تضییق قیلماقده. برق جنراتوری یۉقلیگی سبب اویلر‌نینگ دروازه‌لرینی قتّیق تقیلله‌تماقده. حاکمیتی‌نینگ بیرینچی ییلیده اولر اوی تشقریسیده جنراتوری بۉلگن هر بیر اویده‌گی جنراتورنی بوزیب تشلشردی، اما اېندی اېسه آدملردن البته جنراتور اۉرنه‌تیشنی طلب قیلماقده.»
ینه بیر اهالی وکیلی شونده‌ی دېدی: «طالبان حاکمیت تېپه‌سیگه کېلگنیدن بېری بو گروه تورلی بهانه‌لر بیلن آدملرنی شفقتسیزلرچه قیینه‌ب، قماققه تشله‌ماقده. قماقدن تیریک چیققنلر هم کۉپ حاللرده آغیر جسمانی جراحتلر و معلوللیک بیلن یوزلشماقده.»
مارمل تومنی‌نینگ ینه بیر اهالیسی شونده‌ی دېدی: «بیز، مارمل تومنی اهالیسی، طالبان‌نینگ تونگی اَیلنیش‌لریدن حالدن تایگنمیز. اولر اَیلنیش بهانه‌سیده یریم تونده آدملر‌نینگ اویلریگه کېله‌دی و دروازه تشقریسیده جنراتور بۉلمه‌گنی اوچون اویلر‌نینگ دروازه‌لرینی دهشتلی طرزده اوره‌دی. نتیجه‌ده اَیریم حامله‌دار عیاللر حامله‌سینی یۉقاتگن، یوره‌ک خسته‌لیگیگه چلینگن بیر قنچه آدملر اېسه شفاخانه‌گه یاتقیزیلگن.»
بوندن آلدین منبعلر ۸صبح گزېته‌سیگه طالبان ایکّی کوندن بویان اوشبو تومن اهالیسیدن اۉنلب کیشینی حبسگه آلیب، نامعلوم جایگه آلیب کېتگنینی تصدیقله‌گن اېدی. اوشبو منبعلر ۱۷-سرطان کونی تومنده پارتلش صادر بۉلگنیدن کېین طالبان اویمه-اوی تینتوو عملیاتینی باشله‌گنی و بیر قنچه اېرککلرنی حبسگه آلگنینی بیلدیرگن اېدی. محلی منبعلر‌نینگ دعواسیگه کۉره، اۉشه پیتده تخمیناً ۳۰ کیشی حبسگه آلینگن.
شونینگدېک، طالبان اوشبو اولسواللیکده کېچه‌سی ایکّی نفر تینچ اهالینی آتیب اۉلدیرگن اېدی. منبعلر ۱۴۰۱-ییل ۲۱-سور، پنج‌شنبه کونی ۸صبح گزېته‌سیگه بو شخصلر برات‌نینگ اۉغلی شریف‌شاه و حبیب‌الرحمان مهاجر اېکنینی اَیتگن اېدی. منبعلرگه کۉره، بو ایکّی شخص‌نینگ هېچ قنده‌ی دولت لوازمی بۉلمه‌گن و هېچ کیم بیلن شخصی عداوتی هم یۉق اېدی. بیراق طالبان اولرنی کېچه‌سی اویلریدن آلیب چیقیب، آتیب تشله‌گن اېدی.
