ملا هبت‌الله نینگ بیاناتی گه مناسبت‌لر؛ طالبان نینگ بشر حقلری بیلن اۉروشی کوچه‌یماقده
طالبان ییتکچیسی ملا هبت‌الله آخوندزاده نینگ عام حضوری ده عیاللر نی سنگ‌سار قیلیش و دُره اۉریشی و دموکراتیک ارزش‌لرنی یوق قیلیش گه دایر ینگی بیاناتی، مملکت یشاوچیلری، سیاسی و مدنی فعاللردن بیرقطاری نینگ جدی مناسبتی بیلن دوچ بولگن. اولر گه کوره، طالبان رهبری نینگ سۉنگی بیاناتی انسان حقلری اېنیقسه عیاللر حقوقینی مملکتده کېنگ کولمده نقض قیلیشی ممکن. شونینگدیک عیال فعاللریدن بیرقطاری نینگ ایتیشلریچه، طالبان رهبری نینگ سۉنگی بیاناتی، افغانستانده جنسیتی آپارتاید تصدیقی دیر. طالبان غایب رهبری نینگ بیاناتینی تنقید قیلووچیلر بو گروه نینگ مملکت خلقی و عیاللر حقوقی گه قره‌ش طرزینی فاجعه‌لی دیب تاکیدله‌یدیلر. اولر نینگ ایشانچی گه کوره، طالبان رژیمی ده یشاوچیلر نینگ اېنگ دستلبکی حقوقی رعایت بولمه‌یدی.
طالبان حاکمیتیده ملی تلویزیون ینگی‌لیکده طالبان نینگ غایب رهبری ملا هبت‌الله آخوندزاده گه منسوب نطقی فایل‌نی ترقه‌تدی که اونده عام حضوری ده عیاللر نینگ سنگ‌سار قیلیش و دُره اۉروش تاکیدلنگن. او دموکراسی‌خواه‌لر گه خطاب ایتیشیچه: «بیز اېرته عام حضوری ده سنگ‌سار قیلیب و دُره اۉره‌میز. بولر نینگ برچه‌سی سیزلر نینگ دموکراسی‌لرینگیز گه قرشی دیر.»
طالبان رهبری اوشبو نطقی فایلی ده «غرب‌لر» گه خطاب ایتیشیچه: «سین هم انسانیت نجابتینی ادعا قیله‌سنگ، مین هم بو ادعانی قیله‌من.» او کیین اېسه غرب‌لر نینگ شیطان توصیف قیلیب کوپه‌یتیریشیچه: «مین الله وکیلی اوله‌راق بونده‌ی ادعا قیله‌من و سین اېسه شیطان وکیل‌لیگیدن.»
ملا هبت‌الله اوشبو بیاناتیده، غرب‌لر «حیوان» و «عیال» آره‌سیده فرق قایل اېمس‌لیگینی ادعا قیلگن. اونینگ ایتیشیچه، «عالملر» دموکراسی گه قرشی کوره‌شه‌دی. طالبان رهبری نینگ ادعاسی اساسیده، افغانستانده دموکراسی «عالملر» نینگ حضوری طفیلی عملگه آشیریلمه‌گن. طالبان «افغانستانده شرعی حد» نی عملگه آشیریب و هېچ کیمگه اعتبار بیرمسلیگینی تاکیدله‌گن، طالبان ییتکچیسی ملا هبت‌الله.
او اوشبو نطقی فایلی ده ېنه بیر بار غرب‌لر گه خطاب ایتیشیچه: ییر یوزیده شریعت نی عملگه آشیریش اوچون «سیلر بیلن ۲۰ ییل اۉروشدیک، باشقه ۲۰ ییل یا که کوپراق اۉروشیمیز ممکن.» او اۉز بیاناتیده طالبان اۉروشی پایتخت کابل طالبان نظارتی گه اۉتیشی و دولت چوکی‌لری گه صاحب بولیش بیلن توگه مه‌گن، بلکه بو گروه افغانستانده «شریعت نی عملگه» آشیریشینی بیلدیرگن.
ملا هبت‌الله نینگ بو بیاناتی اعتراضچی عیاللر، عیال حقوقی فعاللری و طالبان مخالف سیاسی سیمالری نینگ کېنگ کولمده مناسبتی بیلن دوچ بولگن. طالبان غایب رهبری نینگ بیاناتینی تنقید قیلووچیلر گه کوره، بو گروه نینگ مملکت خلقی اېنیقسه عیاللر حقوقی گه قره‌شی فاجعه‌لی و جنسیتی آپارتاید تصدیقی دیر. اولر نینگ ایشانچی گه کوره، طالبان یشاوچیلر نینگ حتا دستلبکی حقوقینی رعایت قیلمه‌یدی.
اعتراضچی عیاللردن بیرقطاری بیر بیانیه ترقه‌تیب و ویدیولرنی ثبت قیلیش بیلن،طالبان رهبری نینگ بیاناتی گه مناسبت بیلدیرگنلر. اولر نینگ ایتیشلریچه، طالبان عیاللر گه حقارت بیلن قره‌یدی و دنیا بوندن آرتیق بو گروه گه وقت بیریش بیلن انسان قدریت‌لری و انسان حقلری کېنگ کولمده نقض اېتیلیشی گه زمینه یره‌تمسلیگی کېره‌ک.
عیاللر اېرکین‌لیگی حرکتی ناراضی‌لیک همایش ده هبت‌الله آخوندزاده نینگ بیاناتی گه مناسبت بیلدیریب ایتیشیچه، بو بیانات طالبان نینگ «جهالتی» و اصلی سیماسینی کورسه‌تیشیدن درک بیره‌دی. مذکور حرکت اعضالری گه کوره، هېچ بیر گروه زور و سرکوب قیلیش بیلن عیاللر حقوقینی آلالمه‌یدی. اولر انسان حقلری نهادلری و دنیا همجمعیت افغانستان عیاللرینی یالغیز قویمسلیک‌لرینی طلب قیلگنلر.
طالبان رهبری نینگ بیاناتی گه مناسبت‌لر دوام اېتر اېکن، انسان حقلری فعاللری اتفاقی دنیا همجمعیتدن بو بیانات گه بی‌فرق بولمسلیگینی سۉره‌گن. اوشبو اتفاق ایکس صحیفه‌سیده یازیشیچه، طالبان اۉتمیش ده‌هم بو گل «جنایت»لرنی قیلگن. انسان حقلری فعاللری اتفاقی نینگ کوپه‌یتیریشیچه: «طالبان ترورچی گروه اوله‌راق یوق اېتیلیش گه محکوم» دیر.
اعتراضچی عیاللردن تمنا زریاب پریانی که طالبان تامانیدن حبس گه آلینیش و قییناق‌لش تجربه‌سی بار، طالبان رهبری نینگ بیاناتی گه مناسبت بیلدیریب ایتیشیچه: «افغانستانده طالبان اېستک‌لری نهادینه بولیش گه اېزین بیرمه‌یدیک.» او ترقه‌تگن پیامیده طالبان افغانستانده جنسیتی آپارتاید نی حاکم قیلیب و مملکتلر بو گروه گه مالی یاردم بیرمسلیکلرینی اۉرغوله‌گن.
افغانستانده انسان حقلری مستقل کمیسیون سابق باشلیغی شهرزاد اکبر، طالبان رهبری نینگ بیاناتی خصوصیده ایتیشیچه: «غرب بیلن دشمنلیک بیر حکایت دیر؛ بو حکایت مخاطب‌لری منطقه مملکتلر و القاعده و داعش کبی گروه‌لر دیر. طالبان نینگ اصلی دشمن‌لیگی افغانستان خلقی بیلن دیر؛ چونکه طالبان جهالت، سوادسیزلیک و خرافات عملگه آشیریلیشینی اۉیله‌یدی، اولر بومی مدنیت و تاریخ نی تحریف قیلیش مقصدیده سعی‌وحرکت قیلماقده‌لر.»
عیال حقوقی فعالی میترا مهران، طالبان رهبری نینگ بیاناتی گه مناسبت بیلدیریب یازیشیچه: «طالبان امیری ینگی ییل پیامیده انسان حقلری و دموکراسی گه قرشی کوره‌شنی اعلام قیلدی و عیاللر نی عام حضوری ده سنگ‌سار قیلیش گه متعهدلیگینی بیلدیردی.»
عین‌حالده، سیاسی سیمالر و سابق حکومت ییریک رسمی‌لریدن بیرقطاری، طالبان غایب رهبری گه منسوب بیانات نی بو گروه نینگ انسان‌لر نینگ اساسی حقوق‌لری گه ضد دیب بهاله‌گنلر.
افغانستان سابق تشقی ایشلر وزیری و ملی خوفسیزلیک مصلحتچیسی رنگین دادفر سپنتا، ملا هبت‌الله گه منسوب بیانات خصوصیده ایتیشیچه: «طالبان هبت‌الله آخوندزاده اېته‌دیگن نرسه دیر، بو گروه نینگ لابی‌گرلری اېته دیگنده‌ی اېمس.» اونگه کوره، افغان لابی‌گرلری و خارجی دیپلمات‌لردن بیرقطاری حقیقت نی اېتمه‌یدیلر. سپتنا جنابلری ایکس صحیفه‌سیده یازیشیچه: «طالبان رهبری مملکت سیاستچیلری گه نسبتن بیر امتیازی بار که برچه ایشانچ‌لرینی آچیق طرزده بیان قیله‌دی. طالبان نی قنچه آق‌له‌منگ جناب ملا هبت‌الله اېتگنده‌ی دیر.»
افغانستان ملی خوفسیزلیک سابق عمومی باشلیغی رحمت‌الله نبیل ایکس صحیفه‌سیده یازیشیچه، طالبان رهبری نینگ بیاناتی بو گروه نینگ انسان حقلری بیلن ضدلیگیدن درک بیره‌دی. اونگه کوره، هبت‌الله نینگ دنیا گه پیامی بو که اولر نینگ حمایتیدن فایده‌لنه‌دی و مناسب وقتده دنیا نینگ حسابی گه اېریشه‌دی. ملی خوفسیزلیک سابق باشلیغی نینگ کوپه‌یتیریشیچه، افغانستان خلقی بو گروه نینگ افراطی ایدیولوژی‌‌لری اۉزگرمسلیگینی اۉیله‌یدیلر.» نبیل جنابلری گه کوره، طالبان رهبری نینگ بیاناتی بو گروه نینگ اصلاح قیلیش و اولر گه باسیم کېلتیریش» اوچون اۉرینه‌یاتگن ایچکی و خارجی لابی‌گرلری گه آچیق پیام دیر.
سابق حکومت عدلیه وزیری فضل‌احمد معنوی نینگ یازیشیچه: «ملا هبت‌الله نینگ بیاناتی حیرت‌لنرلی اېمس بلکه بو ملا اېتگن سۉزلرنی کوتمه‌گن‌لر نینگ تبصره‌لری حیرت‌لنرلی دیر.» اونینگ کوپه‌یتیریشیچه: «طالب یامان فکر قیلیب و قییناقلشنی اۉیله‌یدی. طالب گروهی نینگ باشقه تعریفی یوق، طالبان نصحیت و ناراضی‌لیک حرکت‌لر بیلن اۉزگریشنی اۉیله‌سک بی‌معنا دیر. ییچیم یول یالغیز مقاومت دیر.»
سابق حکومت ده صلح ایشلری بوییچه دولت وزیرلیگی نینگ معینی عبدالله خنجانی طالبان نی ایکّی قسمت گه بولگن. اونینگ یازیشیچه: «ایکّی تور طالب بار؛ بولر کبی فکرلرینی آچیقله‌یدیگنلر و اونی عملگه کورسته دیگنلر.» اونگه کوره، طالبان نینگ باشقه بیر توری، دیپلمات‌لر و تحلیل مرکزلری آنگیده قوریلگن.
عین‌حالده، طالبان سۉنگی ایکّی یریم ییل ایچیده دایم خاتین قیزلر و برچه فقرالرنی عام حضوری ده دُره اۉریب و صحرایی محکمه قیلگنلر. بیرلشگن ملتلر تشکیلاتی نینگ گزارش‌لری اساسیده، بو گروه خاتین قیزلر گه قرشی کمیده ۵۰ فرمان صادر قیلگن که خاتین قیزلرنی برچه ساحه‌لردن حذف قیلگن.
طالبان حاضرگه قدر یوزلب کیشی جمله دن عیاللرنی ناقانونی علاقه عیبی بیلن مینگلب کیشی نینگ حضوری ده سپورت میدان‌لریده دُره اۉرگن. مذکور گروه حاضرگچه تورت اېرکک‌نی طالبان رسمی‌لری حضوری بیلن عام حضوری ده آتیب اۉلدیرگنلر.
آلتینچی صنف دن یوقاری قیز اوقووچیلر نینگ اوقیشدن منع قیلینیشی و قیز طلبه‌لر یوزی گه بیلیم یورت‌لر و عالی تحصیلات موسسه‌لر ایشیگینی یاپیش، بیرلشگن ملتلر تشکیلاتی شامل دولت و خصوصی نهادلر ده عیاللر نینگ ایشلشی گه اېزین بیرمسلیک، عیاللر گه عاید حمام‌لر یاپیلیشی، پارک‌لر و سپورت میدان‌لری گه عیاللر نینگ باریشی گه رخصت بیرمسلیک، طالبان نینگ عیاللر گه یره‌تگن چېکلاو‌لریدن سنله‌دی.
