هراتده تینچ اهالینی اۉققه توتیلیشی؛ نبیل: تفاوتلر طالبان تامانیدن بیلگن حالده جنایتگه ایلنتیریله‌دی
۸صبح، کابل: هرات ولایتیده تینچ اهالی، اینیقسه شیعه‌لرنی آتیب اۉلدیریش حادثه‌سیدن سۉنگ، سابق حکومت نینگ ملی خوفسیزلیک باشلیغی رحمت‌الله نبیل، طالبان بیلگن حالده دینی تفاوتلرنی «جنایت»گه ایلنتیرگنینی ایتگن.
نبیل یک‌شنبه کونی، ۲۳- حمل، بو واقعه‌ده کمیده ۲۱ کیشی اۉققه توتیلگنینی قۉشیمچه قیلگن.
او ینه کۉپه‌یتیریشیچه: «اگر تفاوت افغانستان حکمدارلری تامانیدن بیلیب-کۉریب جنایتگه ایلنتیریلسه، شبهه‌سیز انسانیت آیاق‌آستی قیلینه‌دی.»
نبیل تینچ اهالینی تفاوتلر سببلی اۉلدیریش انسانیتگه قرشی جنایت اېکنینی تأکیدله‌گن.
او قۉشیمچه قیلگن: «بیز نینگ یشه‌ب قالیشیمیز بیر-بیریمیزنی قبول قیلیشیمیز و بیرگه یشه‌شیمیزده‌دیر.»
شو بیلن بیرگه، افغانستان نینگ سابق تشقی ایشلر وزیری رنگین دادفر سپنتا هم هراتده تینچ اهالینی آتیب اۉلدیریش دینی تفاوت سببلی عملگه آشیریلگنینی ایتگن.
منبعلر معلوماتیگه کۉره، موتر سایکل مینیب کېلگن هجومچیلر جمعه کونی هرات نینگ انجیل تومنیده‌گی «ده‌میری» قیشلاغیده سَیرگه چیققن تینچ اهالینی اۉققه توتگن.
منبعلرنینگ ایتیشیچه، اۉققه توتیلگنلر نینگ اکثریتی شیعه‌‌لر بۉلگن.
طالبان اېسه بو واقعه‌ده ۱۱ کیشی هلاک بۉلگنینی و بیر نېچه کیشی جراحتلنگنینی دعوا قیلماقده.
