غزه‌ده‌گی «الشفا» شفاخانه‌سی قمل‌گه آلینیشی تۉغریسیده مارتین نینگ عکس‌العملی
غزه‌ده‌گی «الشفا» شفاخانه‌سی نینگ قمل قیلینیشیگه جوابن بیرلشگن ملتلر تشکیلاتی باش کاتبی‌نینگ انسان پرولیک مسأله‌لر بۉییچه اۉرین‌باسری مارتین گیریفیث ساغلیقنی سقلش مؤسسه‌لریگه قرشی حربی حرکتلرنی توخته‌تیش کېرهکلیگینی ایتدی.
۱۰-نوامبر، جمعه کونی کېچقورون مارتین ایکس نینگ اجتماعی صحیفه‌سیده شفاخانه‌لر خلق‌ارا حقوق دایره‌سیده حمایه قیلینیشی کېرهکلیگینی یازدی.
اونینگ تأکیدلشیچه، غزه‌ده‌گی «الشفا» شفاخانه‌سی نینگ اسراییل کوچلری تامانیدن قمل قیلینیشی بیلن مینگلب بېمارلر، طبیات خادملری و فلسطینلیک قاچقینلرنینگ حیاتی خوف آستیده قالگن.
اېسله‌تیب اۉتمیز، ایسرایل کوچلری غزه‌ده‌گی اېنگ ییریک شفاخانه حسابلنگن «الشفا» کسلخانه‌سینی تۉلیق قورشب آلگن و تېز یاردم مو‌ترلری‌نینگ کیریب-چیقیشیگه تۉسقینلیک قیلماقده.
الجزیره اخبارات خذمتی نینگ خبر بېریشیچه، اسراییل کوچلری «الشفا» شفاخانه‌سی اېشیگینی یاپیب قۉیگن و مینگلب یره‌دارلر و کۉچیریلگنلر اسراییل‌نینگ کوچلی بمباردمانلری آستیده ایچکریده قالیب کېتگن.
خبرگه کۉره، اسراییل تک‌تیراندازلر و توپخانه‌لر اوشبو شفاخانه تشقریسیده‌گی حدودده حرکت قیله‌یاتگن آدملرنی نشانگه آلماقده.
باشقه تاماندن، غزه‌ده‌گی وضعیت‌نینگ یامانلشیشی و قربانلر سانی‌نینگ آرتیشی بیلن بیرلشگن ملتلر تشکیلاتی خوفسیزلیک کېنگشی ۱۰- نوامبر، جمعه کونی اسراییل و حماس اۉرته‌سیده‌گی اوروشنی توخته‌تیش یېچیمی حقیده شاشیلینچ ییغیلیش اۉتکزدی.
بو ییغیلیشده بیر قطار دولت وکیللری غزه‌ده تینچ اهالی حمایه‌سی و آتشکېسین اۉرنه‌تیلیشیگه اورغو بېردی.
سۉنگی معلوماتلرگه کۉره، ایسراییل هجوملریده هلاک بۉلگن فلسطینلیکلر سانی ۱۱ مینگدن آشگن.
