منبعلر: ملا هبت‌الله‌نینگ فرمانلری قندهار یوریتیده اۉقیتیلماقده
۸صبح، قندهار: محلی منبعلر‌نینگ اَیتیشیچه، طالبان رهبری ملا هبت‌الله آخوندزاده‌‌نینگ فرمانلری قندهار بیلیم یورتی طلبه‌لریگه اسلامی فنلر بیلن بیر قطارده اۉقیتیلماقده.
منبعلر چهارشنبه کونی، ۶عقرب ۸صبح گزېته‌سیگه بېرگن صحبتیده قندهار بیلیم یورتی اۉقیتووچیلری اسلامی فنلر و اسلامی مدنیت فنلریگه عاید موضوع‌لر‌نینگ بیر قِسمینی ملا هبت‌الله‌نینگ فرمانلری بیلن المشتیریب، اولرنی طلبه‌لرگه اۉرگه‌ته‌یاتگنینی اَیتیشدی.
منبعلرگه کۉره، طلبه‌لرگه امتحانلرده اسلامی مدنیت فنیگه عاید سواللردن تشقری، ملا هبت‌الله‌نینگ فرمانلری حقیده هم سواللر بېریلیشی معلوم قیلینگن.
طلبه‌لر، شونینگدېک، اسلامی مدنیت فنیدن درس بېره‌یاتگن اۉقیتووچیلر هم طالبان طرفداری بۉلگن دینی علمالردن اېکنینی و اوشبو فننی اۉقیتیش اوچون یېترلی صلاحیتگه اېگه اېمسلیگینی اَیتیشماقده.
عینی پیتده، ینه بیر منبع‌نینگ اَیتیشیچه، طالبان عالی اۉقوو وزیرلیگی دولت و خصوصی بیلیم یورتیلرگه اسلامی فنلر اوچون اجره‌تیلگن درس ساعتلریده اسلامی مدنیت ماتریاللری بیلن بیر قطارده ملا هبت‌الله‌نینگ فرمانلرینی هم اۉقیتیش حقیده کۉرسه‌تمه بېرگن.
منبع‌نینگ سۉزلریگه کۉره، طالبان بو حرکت آرقه‌لی آدملرنی گروه رهبری‌نینگ فرمانلری بیلن تنیشتیریش و اولر‌نینگ اجراسینی تأمینلش اوچون شرایط یره‌تیشنی ایسته‌ماقده.
