منبعلر: طالبان کابل بیلیم یورتیده‌گی یۉنه‌لیشلر و فنلرنی بېکار قیلگن همده چېکله‌گن
آدرینا بهزاد
کابل بیلیم یورتینینگ اَیریم خادملری تعلیم فعالیتیگه چېکلاولر جاری اېتیلگنی، اَیریم یۉنه‌لیشلر و فاکولته‌لرده درس بېریش تۉخته‌تیلگنی حقیده خبر بېرماقده. اولر‌نینگ اَیتیشیچه، طالبانگه علاقه‌دار بیر گروه دینی علمالردن تشکیل تاپگن هیات، منبعلرگه کۉره، قندهار و باشقه اَیریم ولایتلردن کابلگه کېلگن و بیر نېچه آی دوامیده بیلیم یورتیده بۉلیب، فاکولته‌لر‌نینگ اۉقوو مضمونینی اۉز قره‌شلری اساسیده قَیته کۉریب چیققن.
بو خادملر ۸صبح گزېته‌سیگه بېرگن صحبتیده اَیتیشیچه، طالبان اَیریم بیلیم یورتی یۉنه‌لیشلریده درس بېریشنی تۉخته‌تگن، بعضی فنلرنی اېسه اۉقوو دستورلریدن چیقریب تشله‌گن یاکه اۉزگرتیرگن. شو بیلن بیرگه، کابل بیلیم یورتینینگ اَیریم طلبه‌لری هم طلبه‌لر اۉقیش یۉنه‌لیشلرینی هېچ قنده‌ی چېکلاولرسیز تنلش و دوام اېتتیریش اېرکینلیگینی تأکیدله‌ماقده.
کابل بیلیم یورتینینگ خادملریدن بیری امین (مستعار)، طالبان تامانیدن اوشبو بیلیم یورتیده کېنگ کۉلملی چېکلاولر جاری اېتیلگنی همده اَیریم یۉنه‌لیش و فنلر آلیب تشلنگنینی اَیته‌دی. اونینگ سۉزلریگه کۉره، طالبان تامانیدن جاری اېتیلگن قاعده‌لر اساسیده اَیریم بیلیم یورتی یۉنه‌لیشلری و فنلری جدّی چېکلاولرگه دوچ کېلگن.
او شونده‌ی دېیدی: «تصویری صنعت یۉنه‌لیشلری، جمله‌دن موسیقه، تیاتر و صحنه صنعتی‌نینگ اَیریم ترماقلریگه اېنگ کۉپ چېکلاولر قۉییلگن. کۉپلب بیلیم یورتیده اوشبو یۉنه‌لیشلرده تعلیم فعالیتی و طلبه‌لر قبول قیلیش تۉخته‌تیلگن یاکه کېسکین چېکلنگن».
اونینگ اَیتیشیچه، افغانستان‌نینگ کۉپلب بیلیم یورتلریده‌گی تصویری صنعت فاکولته‌لری هم فعالیتینی تۉخته‌تگن یاکه کېسکین چېکلاولر آستیده ایشلشده دوام اېتماقده.
امین قۉشیمچه قیله‌دی: «شونینگدېک، حقوق، سیاسی فنلر، سوسیالوژی، انسان حقوقلری، دېموکراسی، اخلاق فلسفه‌سی و عیاللر تدقیقاتلری ساحه‌لریده‌گی اَیریم یۉنه‌لیش و فنلر آلیب تشلنگن یاکه توبدن قَیته کۉریب چیقیلگن».
کابل بیلیم یورتینینگ ینه بیر خادیمی روح‌الله (مستعار)، طالبان اَیریم بیلیم یورتی یۉنه‌لیشلریده درس بېریشنی تۉخته‌تگنی و بعضی فنلرنی اۉقوو دستورلریدن چیقریب تشله‌گنی یاکه اۉزگرتیرگنینی اَیته‌دی.
او شونده‌ی دېیدی: «موسیقه یۉنه‌لیشی عملده تۉخته‌تیلگن. تیاتر و صحنه صنعتلری هم کۉپلب تعلیم مرکزلریده تۉخته‌تیلگن یاکه کېسکین چېکلاولرگه دوچ کېلگن. حقوق و سیاسی فنلر فاکولته‌سیده اۉقوو دستورلری‌نینگ اَیریم قِسملری آلیب تشلنگن یاکه اۉزگرتیریلگن، سوسیالوژی یۉنه‌لیشیده اېسه اَیریم فنلر اۉقوو رېجه‌سیدن چیقریب تشلنگن».
روح‌الله قۉشیمچه قیله‌دی: «فلسفه یۉنه‌لیشیده هم اَیریم اۉقوو موضوعلری آلیب تشلنگن یاکه چېکلنگن. ژورنالیست یۉنه‌لیشی هم تعلیم مضمونیده اۉزگریشلر و چېکلاولرگه دوچ کېلگن. شونینگدېک، عیاللر تدقیقاتلری و انسان حقوقلری بیلن باغلیق فنلر کۉپلب بیلیم یورتلرده اۉقوو دستورلریدن چیقریب تشلنگن».
کابل بیلیم یورتینینگ ینه بیر خادمی نوید (مستعار)، اَیتیشیچه، اونینگ سۉزلریگه کۉره، قندهار و باشقه اَیریم ولایتلردن کابلگه کېلگن بیر گروه دینی علمالردن تشکیل تاپگن هیات بیر نېچه آی دوامیده بیلیم یورتیده بۉلیب، فاکولته‌لر‌نینگ اۉقوو مضمونینی قَیته کۉریب چیققن.
او قۉشیمچه قیله‌دی: «بو هیات تعلیم تیزیمینی اۉز قره‌شلری اساسیده ترتیبگه سالدی. کۉپلب درسلیکلرنی اسلام شریعتیگه ماس کېلمه‌یدی دېگن وجه بیلن اۉقوو دستورلریدن چیقریب تشله‌دی و اۉرنیگه اۉزلری ایسته‌گن اۉقوو رېجه و فنلرنی کیریتدی. شونینگدېک، اَیریم اۉقیتووچیلرنی ایشدن بۉشه‌تدی یاکه کمه‌یتیردی و اولر‌نینگ اۉرنیگه، اینیقسه اسلامی مدنیت بیلن باغلیق بۉلیملرده، اۉزلری معقوله‌گن شخصلرنی تعیینله‌دی».
کابل بیلیم یورتی طلبه‌لریدن بیری عبید (مستعار)، طلبه‌لر اۉقیش یۉنه‌لیشلرینی هېچ قنده‌ی چېکلاولرسیز تنلش و دوام اېتتیریش اېرکینلیگینی تأکیدله‌یدی. او شونده‌ی دېیدی: «طلبه صفتیده مېن ایشانه‌من که طلبه‌لر اۉز تعلیم یۉنه‌لیشینی تنلش و دوام اېتتیریشده قنچه‌لیک کۉپراق اېرکینلیککه اېگه بۉلسه، بیلیم یورتیده‌گی تعلیم امکانیتلریدن شونچه‌لیک یخشی فایده‌لنه آله‌دی. چېکلاولر اۉرنیگه، طلبه‌لر اۉقیش دوریده اۉز قیزیقیشی و قابلیتلری اساسیده اېرکین تعلیم آلیشلری اوچون شرایط یره‌تیلیشی کېره‌ک».
بو حالتگه قره‌مه‌ی، کابل بیلیم یورتینینگ اَیریم خادملری اۉتگن کون طالبان‌نینگ اوشبو بیلیم یورتی خادملریگه نسبتاً «ایکّی خیل و کمسیتووچی مناسبتی» دېب اته‌گن حالتلریدن شکایت قیلگن اېدی. اولر طالبان سابق حکومت خادملری بیلن اوشبو گروه حاکمیتگه کېلگنیدن کېین ایشگه آلینگن شخصلر اۉرته‌سیده کمسیتیش قیله‌یاتگنینی و سابق خادملرگه تحقیرلاوچی مناسبتده بۉله‌یاتگنینی اَیتگن اېدی.
بو خادملر‌نینگ اَیتیشیچه، اوّل باشقروو و یوقاری لوازملرده ایشله‌گن اَیریم شخصلر قویی لوازملرگه تعیینلنگن، اولر‌نینگ معاشلری و امتیازلری هم کمه‌یتیریلگن.
