منبعلر: قندوزده طالبان اعضالری مخدره مادّهلر سوداسیگه علاقهسی بار
نیما
قندوز ولایتینینگ بیر قطار اهالیسی، اینیقسه عیاللر، طالباننینگ اَیریم اعضالرینی مخدره مادّهلرنی ساتیش و ترقهتیشده عیبلهماقده. اولرنینگ اَیتیشیچه، بو شخصلر اَیریم عیاللر بیلن باغلنیب، اولردن تابلتلر و الکوللی ایچیملیکلرنی ساتیشده همکارلیک قیلیشنی سۉرهیدی. اوشبو گزارشده طالبان اعضالری تامانیدن باغلنیش و همکارلیک تکلیفی بۉییچه تجربهسی حقیده سۉزلهگن ایکّی عیال بیلن صحبت قیلینگن.
طالبان سۉنگگی بېش ییل دوامیده بیر نېچه بار فسادگه قرشی کورهشگنینی دعوا قیلگن، بیراق دله کوزهتوولری اوشبو گروهنینگ اَیریم اعضالری قاچاق، خدمت وکالتلرینی سوءاستعمال قیلیش همده طالبان نظارتیدهگی دولت امکانیتلریدن فایدهلنیشده کېنگ مقیاسده اشتراک اېتهیاتگنینی کۉرسهتماقده.
قندوز ولایتیدهگی منبعلر طالباننینگ استخبارات و مخدره مادّهلرگه قرشی کورهش کوچلرینینگ اَیریم اعضالری عیاللرنی تعقیب قیلهیاتگنینی تصدیقلهیدی. اَیریم عیاللرنینگ اَیتیشیچه، طالبان اعضالری اولر بیلن باغلنیب، مخدره مادّهلرنی ساتیشده همکارلیک قیلیشنی سۉرهگن.
اسمی حساباتده کېلتیریلیشینی ایستهمهگن عیاللردن بیری ۸صبح گزېتهسیگه شوندهی دېیدی: «بیر کونی طالبان اعضالریدن بیری، بیلمهیمن رقمیمنی قهیېردن تاپگن اېدی، مېنگه قۉنغیراق قیلیب، مېن بیلن مناسبتده بۉلیشنی خواهلشینی و شونگه اۉخشهش گپلرنی اَیتدی. مېن اونگه ادهشگنینی اَیتدیم. کېین او: «هېچقیسی یۉق، قۉنغیراقنی اوزمنگ. مېن [خوفسیزلیک نقطه نظریدن اۉچیریلدی] ادارهسیدنمن. بو رقمنی سقلب قۉیینگ؛ اگر اۉزینگیز یاکه دوگانهلرینگیز بیرار نرسهگه محتاج بۉلسه، مېنگه اَیتینگ»، دېدی.»
بو عیال تأکیدلشیچه، طالبان اعضاسی همکارلیک حقیدهگی سۉراوگه جوابا، اگر اولرگه الکوللی ایچیملیک، نشه یاکه تابلتلر کېرهک بۉلسه، او بیلن باغلنیشنی اَیتگن. اونینگ سۉزلریگه کۉره، قندوزدهگی اوشبو طالبان اعضاسی اوندن بیر نېچه بار الکوللی ایچیملیک یاکه تابلتلر ساتیب آلیشنی ایستهگن عیاللرنی اونگه تنیشتیریشنی سۉرهگن.
بو عیال شوندهی دېیدی: «اوندن سۉرهدیم، مثلاً مېنگه یاکه آپه-سینگیللریمگه قندهی یاردم بېره آلهسن؟ او: «تابلت و الکوللی ایچیملیک»، دېدی. کېین ینه اگر اونگه تابلت ساتیب آلهدیگن عیال مزاج تاپسم، مېنگه یخشی پول بېریشینی اَیتدی. شونینگدېک، اَیریم عیال گوزهللیک سالونلرگه هم یشیرینچه ایشلهسهلر، اولرنینگ تابلتلرینی عیاللرگه ساتیشلری ممکنلیگینی اَیتیشگنینی اېشیتگنمن.»
ینه بیر عیالنینگ اَیتیشیچه، طالبان اعضالریدن بیری رمضان آییده ۲۰۰ دانه تابلت بیلن بیر شخصنی قۉلگه آلگن اېدی، بیراق اونینگ اَیتیشیچه، اۉشه مادّهلر کېینچهلیک ینه اۉشه شخصگه ساتیلگن و ینه بازارگه چیقریلگن.
بو عیال طالباننینگ استخبارات و مخدره مادّهلرگه قرشی کورهش بۉلینمهلرینینگ اَیریم اعضالری یاشلر و عیاللر آرهسیده مخدره مادّهلرنی ساتیش همده ترقهتیشده اشتراک اېتهیاتگنینی تصدیقلهیدی.
بوندن بیر مدت آلدین کابلنینگ بیر قطار اهالیسی بنگیوار تابلتلرینینگ آلدی-ساتدیسی کېنگهییب بارهیاتگنیدن جدّی خواطر بیلدیریب، قشّاقلیک، ایشسیزلیک، ایش اۉرینلرینینگ یۉقلیگی و ناانیق کېلهجک کۉپلب یاشلر همده اۉسمیرلرنی معمالرنی وقتینچه یېنگیللشتیریش اوچون اوشبو مادّهلرنی استعمال قیلیشگه اوندهیاتگنینی اَیتگن اېدی.
شو بیلن بیرگه، منبعلر حاضرده کابلده تورلی خیل نشهقیلووچی تابلتلری ایشلب چیقریلهیاتگنی و ارزان نرخ همده آسان قۉل تاپیش امکانیتی بیلن شهر بۉیلب ساتیلهیاتگنینی تصدیقلهگن اېدی. اوشبو منبعلرگه کۉره، طالباننینگ اَیریم جنگچیلری بو مادّهلرنی ساتووچیلردن تاولمچیلیک قیلیب، شو طریقه اولرنینگ آلدی-ساتدیسی کېنگهییشیگه زمین یرهتماقده.
بوندن آلدین ۸ صبح گزېتهسی سوریشتیروو حساباتیده طالباننینگ محلی مسؤوللری فقط بدخشان ولایتیدهگی سکّیز قیشلاق کۉکناری حاصلیدن «عشر» نامی آستیده ۵۰ سِردن آرتیق تریاک ییغیب آلگنینی انیقلهگن اېدی. شونینگدېک، مخدره مادّهلر سوداسی بازارلرینی نظارت قیلهیاتگن طالبان اعضالری افیون شیرهسی آلدی-ساتدیسی عوضیگه هم سالیق آلگن.
شونینگدېک، ۸ صبح گزېتهسی ینه بیر سوریشتیروو حساباتیده طالباننینگ کابلدهگی باشلنغیچ سودی ۱۳ کیلوگرامدن آرتیق مخدره مادّهنی قاچاق اېتیشگه قَیتریش حقیده حکم چیقرگنینی انیقلهگن اېدی. اوشبو مخدره مادّه طالبان اعضالری تامانیدن پایتختده مصادره قیلینگن «شیشه» توریدهگی مادّه اېدی.
۸صبح اختیاریگه کېلیب توشگن حجتلر طالبان باجخانهلرده مخدره مادّهلر اوچون سالیق آلهیاتگنینی کۉرسهتگن اېدی. اوشبو حسابات خلاصهلریگه کۉره، بو یوک قاچاققه اشتراک اېتگن شخص قۉلگه آلینیشیدن آلدین مخدره مادّهلر اوچون باجخانه تۉلاوینی عملگه آشیرگن و «باجخانه ورقهسی»نی هم آلگن اېدی. طالبان محکمهسی عیناً شو باجخانه ورقهسی و قاچاقچی تقدیم اېتگن دلیللرگه تیهنیب، اونی قۉلگه آلینگنیدن ۲۶ کون اۉتیب قماقدن آزاد قیلگن همده مصادره قیلینگن مخدره مادّهلرنی هم اونگه قَیتریب بېرگن.
بیرلشگن ملتلر تشکیلاتینینگ گیاهوند مادّهلر و جنایتچیلیک بۉییچه باشقرمهسی (UNODC) اوّلراق افغانستانده کۉکنار اېکینلری کېسکین کمهیگنی بیلن بیر وقتده، صناعت اصولیده ایشلب چیقریلهدیگن مخدره مادّهلر، اینیقسه تآمفتامین (شیشه) ایشلب چیقریش و قاچاق اېتیش آرتیب بارهیاتگنیدن آگاهلنتیرگن اېدی.
