طالبان بیراغی؛ مزار شریف عیاللری اوچون قۉرقوو و امیدسیزلیک رمزی همده خلققه باسیم واسطهسی
نیما
۲۴ اسد افغانستاننینگ طالبان قۉلیگه تۉلیق قولهگن کونی ییللیگی یقینلشیشی و بو گروه بیراقلری نینگ اویلر، دوکانلر و شهرلرگه مجبورا اۉرنهتیلیشی بیلن بیر وقتده، بلخ ولایتی مرکزی مزارشریف شهریدهگی اَیریم عیاللر طالبان بیراغینی کۉرگنلریده، اولرنینگ وجودینی قۉرقوو، واهمه و امیدسیزلیک قمرهب آلیشینی اَیتماقده. کۉپلب عیاللر بو بیراقلرنی کۉریش اولردهگی امیدسیزلیک و توشکونلیکنی ینهده کوچهیتیریشینی ایتهدی. شونینگدېک، مزارشریفنینگ اَیریم اهالیسی طالبان آدملرنی بو گروه بیراقلرینی دوکانلری اوستیگه اۉرنهتیش اوچون اولرنی زۉرلیک بیلن ساتیب آلیشگه مجبور قیلهیاتگنینی اَیتماقده. اولرنینگ سۉزلریگه کۉره، حتا بیراق ساتیب آلیشگه قُربی یېتمهگنلر هم کلتکلنگن.
۲۴ اسد افغانستان نینگ طالبان قۉلیگه قولهگن کونی ییللیگی یقینلشیشی بیلن اوشبو گروه مملکت نینگ برچه ولایتلریده اۉز بیراقلرینی آدملرگه زۉرلیک بیلن ساتماقده و اولرگه بو بیراقلرنی دوکانلر، اویلر همده جماعتچیلیک کۉزیگه تشلنهدیگن باشقه جایلرنینگ تېپهسیگه اۉرنهتیب، اوشبو گروهنی قۉللب-قوّتلشلرینی اعلان قیلیشنی بویورماقده.
بلخ ولایتی مرکزی مزارشریف شهریدهگی اَیریم عیاللر و قیزلر طالبان بیراغینی کۉرگنلریده اۉزلرینی ناخوش حس قیلیشلرینی و بو بیراقنی عیاللر نینگ عذاب-عقوبتی، قتغان قیلینیشی و امیدسیزلیگی نینگ رمزی دېب بیلیشلرینی اَیتماقده.
زهرا (مستعار) شوندهی دېیدی: «طالبان بیراغینی کۉرسم، باشیم اطرافیگه کفن اۉرهلیب، مېنی بۉغایاتگندېک حس قیلهمن.»
سارینا (مستعار) شوندهی دېیدی: «طالبان بیراغینی کۉرسم، بو بیراق نینگ کېلیشی بیلن بیز درس و تعلیمدن قالیب کېتگنیمیزنی اۉیلهیمن.»
گلپری (مستعار) شوندهی دېیدی: «مېن تعلیمدن قالگن قیزمن. طالبان بیراغیگه قرهگنیمده، برچه آرزولریم شو بیراق آستیده کۉمِیلگنینی حس قیلهمن.»
پریسان شوندهی دېیدی: «طالبان بیراغینی کۉرسم، قلبیمگه قۉرقوو و واهمه توشهدی و اۉزیمنی محبوسدېک حس قیلهمن.»
نسترن شوندهی دېیدی: «طالبان بیراغینی کۉرسم، باشیمدن اۉتکزگن آغیر کونلریمنی اېسلهیمن. اولر قیزلر و عیاللرنی اساسی حقوقلریدن محروم قیلیشدی و مېن هم فرزندلریمنی اۉز مملکتیمدن آلیب چیقیب، مهاجرلیککه کېتیشگه، سرسان و باشپناهسیز بۉلیشگه مجبور بۉلدیم.»
فریبا (مستعار) شوندهی دېیدی: «طالبان بیراغیگه قرهگنیمده، امیدسیزلیک و ساغینچ حسسی پیدا بۉلهدی. اۉیلهیمنکی، بیز اېریشگن برچه ترقیات و آدملر اېگه بۉله باشلهگن یخشیراق حیات بیردنیگه یۉق بۉلدی.»
سروناز شوندهی دېیدی: «طالبان بیراغینی کۉرسم، امیدسیزلیک و بختسیزلیکنی حس قیلهمن؛ درسلریمیز تۉختهدی و اېندی ایشلهی آلمهیمیز.»
مزارشریف شهریدهگی ینه بیر عیال عدالتخواه شوندهی دېیدی: «خرید قیلیش اوچون شهرگه بارگن اېدیم، بیردن بوتون شهر کفنگه اۉرهلگندېک بۉلیب، شهرنینگ همه جاییده طالبان بیراقلری آسیلگنینی کۉردیم. یورهگیم تیترهدی و کۉز یاشلریمنی تیه آلمهدیم. اۉزیمنی یامان حس قیلدیم و خَیالیمده مینگلب سواللر پیدا بۉلدی؛ اۉضمناً: «بو اۉشه بیراقمی، او کۉتریلیشی بیلن مملکتیمدهگی برچه قیزلر درس و تعلیمدن محروم بۉلگن؟» دېب سۉرردیم.»
بو عیال ینه قۉشیمچه قیلهدی: «بو اۉشه بیراقمی، اونینگ حکمرانلیگی آستیده عیاللرنی انسان دېب حسابلهمهیدیلر و عیاللر نینگ ایشلش حقوقی، تعلیم آلیش حقوقی، گپیریش حقوقی و حتا نفس آلیش حقوقینی هم حرام دېب بیلیب، بیر یورت نینگ عیاللرینی قماققه سالیب، اسیر قیلگنلر؟ بو اۉشه بیراقمی، اوندن قاچیش اوچون یاشلریمیز اوچاق قناتلریگه آسیلیب، قوتولیشنی ایستهگن، اما افسوس که جانلرینی یۉقاتگنلر؟ بو اۉشه بیراقمی، اېرککلرگه باش ساچلری، سقاللری و کییملری نینگ اوزونلیگینی اۉزلری بېلگیلشگه رخصت بېرمهیدی؟ بو اۉشه بیراقمی، اونینگ آستیده آدملر ایشسیزلیک و بختسیزلیک سببلی دشت و چۉللرده تشنهلیک و آچلیکدن جان بېرگنلر و او بیلن مینگلب باشقه بختسیزلیک و عذاب-عقوبتلر کېلهدی.»
اونینگ ایتیشیچه، «بو بیراق آستیده مملکتیم خلقیگه عذاب-عقوبت، زۉرآورلیک، قۉرقوو و واهمه، ظلم و عدالتسیزلیکدن باشقه هېچ نرسه نصیب اېتمهدی.» او کېلهسی ییل افغانستان خلقی طالبان نینگ عذاب-عقوبتلری و ظلمیدن آزاد بۉلیشینی آرزو قیلهدی.
شو بیلن بیرگه، مزارشریف شهری نینگ اَیریم اهالیسی طالبان بیراقلری نینگ مجبورا ساتیلیشیدن خواطر بیلدیریب، بو گروه اۉز بیراقلرینی اولرگه زۉرلیک بیلن ساتهیاتگنی و بیراقلرنی دوکانلری همده اویلری نینگ تېپهسیگه اۉرنهتیشگه مجبور قیلهیاتگنینی اَیتماقده.
بلخلیک بیر وطنداش شوندهی دېیدی: «بیر کیشی بیراق ساتیب آلیشگه مالیوی امکانیتی یۉقلیگی سببلی عذر سۉرب، اونی ساتیب آلیشگه پولیم یۉق، دېدی. اما عیناً شو سببلی اونینگ یوزیگه ترسهکی اوریشدی.»
