طالباننینگ یېتکرمهلرگه آگاهلنتیریشی؛ حکمرانلیکنینگ بېشینچی ییللیگی مجبوری ترغیبات بیلن
مملکت مرکزی و ولایتلریدهگی اَیریم یېتکرمهلر مسؤوللری همده یوتیوب کاناللری یوریتووچیلری طالباننینگ کابلدهگی اخبارات و مدنیت وزیرلیگی مسؤوللری همده اوشبو گروهنینگ ولایتلردهگی اخبارات و مدنیت باشقرمهلری مسؤوللری یېتکرمهلر و یوتیوبرلرنی طالبان حکمرانلیگینینگ ۲۴-اسد کونی نشانلنهدیگن ییللیگی مناسبتی بیلن اوشبو گروه جنگریلری و طرفدارلرینینگ دستورلری، ییغیلیشلری و تدبیرلرینی علیحده طرزده یاریتیش همده شو کونی یایینلرینی طالبانگه عاید دستورلرگه بغیشلش حقیده آگاهلنتیرگنینی تصدیقلهدی.
مرکز و ولایتلرده علیحده اوچرهشوولرده طالبان اخبارات و مدنیت وزیرلیگی منصبدارلری بیلن اوچرهشگن اَیریم یېتکرمهلر مدیرلری و یوتیوب کاناللری یوریتووچیلری ۸ صبح گزېتهسیگه بېرگن صحبتلریده طالبان اولرگه بو بارهده اوشبو گروه فایدهسیگه کېنگ کۉلمده ترغیبات آلیب باریش حقیده آگاهلنتیرگنینی تصدیقلهدی. اولرنینگ اَیتیشیچه، یېتکرمهلرنینگ یایینی طالبان استخباراتی تامانیدن نظارت قیلینهدی و بو بویروققه بۉیسونمهگن تقدیرده جزاگه دچار بۉلهدیلر.
کابلدهگی یېتکرمهلردن بیرینینگ یایین بۉلیمی مسؤولی احمد (مستعار)، ۸صبح گزېتهسیگه بېرگن صحبتیده جاری هفتهنینگ یکشنبه کونی طالبان اخبارات و مدنیت وزیرلیگیگه چقیریلگنینی تصدیقلهدی. او شوندهی دېیدی: «وزیرلیک مطبوعات کاتبی ادارهسیگه یېتیب کېلگنیمده، بیر نېچته یېتکرمه مسؤوللری، تورلی یېتکرمهلردن ژورنالیستلر و یوتیوبرلر هم بارلیگینی کۉردیم. اوچرهشوو باشلنیشی بیلن برچهگه آچیقچهسیگه آگاهلنتیریش بېریلدی که طالباننینگ حاکمیتگه قَیتیشی ییللیگی کونی یېتکرمهلرنینگ ۲۴ ساعتلیک یایینی مخصوص طرزده اوشبو گروه دستورلریگه بغیشلنیشی و اونده توزوم فایدهسیگه ترغیبات آلیب باریلیشی کېرهک. یوتیوبرلر هم تدبیرلرنی شوندهی یاریتیشی کېرهکلیگی، طالبان امیرلیگیگه قرشی بیرار گپ یایینگه اوزهتیلمسلیگی اَیتیلدی.»
شو بیلن بیرگه، غزنی، بلخ، بدخشان و هرات ولایتلریدهگی محلی ژورنالیستلر هم ۸صبح گزېتهسیگه بېرگن صحبتلریده اخبارات و مدنیت باشقرمهلری همده طالبان استخباراتی وکیللری تامانیدن چقیریلگنینی و اولرگه اوشبو گروه فایدهسیگه ترغیبات آلیب باریش بویوریلگنینی تصدیقلهدی.
طالبان مملکت ایچیدهگی میدیا جماعهسی اوشبو گروه فایدهسیگه ترغیبات آلیب باریش حقیده آگاهلنتیرگن بیر پیتده، افغانستان اوستیدن حکمرانلیگینینگ بېشینچی ییللیگیگه یقینلشماقده.
طالبان بو دورده جمعیتنینگ باشقه قتلملری قطاری یېتکرمه و ژورنالیستلرگه هم قتّیق چېکلاولر جاری اېتیب، سۉز اېرکینلیگینی چېکلهدی و اخبارات ایلنیشی جریانینی ایزدن چیقردی. طالبان نقطه نظریدن، فقط اوشبو گروه توزومیگه خدمت قیلهدیگن و اولرنینگ ترغیبات واسطهسی صفتیده فعالیت یوریتهدیگن یېتکرمه مقبول حسابلنهدی.
یقینده چېگره بیلمس ژورنالیستلر تشکیلاتی طالبان سۉنگگی بېش ییل دوامیده یېتکرمهگه قرشی کمیده ۲۰ ته فرمان، یۉریقنامه و نظام جاری قیلگنینی معلوم قیلدی. اولر یېتکرمه فعالیتینی باسقیچمه-باسقیچ چېکلب کېلگن.
اوشبو حساباتگه کۉره، افغانستانده یېتکرمه و ژورنالیستلر فعالیتیگه قۉییلگن چېکلاولر ترقاق و آغزهکی بویروقلردن اوشبو گروهنینگ رسمی سیاستیگه ایلنگن. چېگره بیلمس ژورنالیستلر تشکیلاتینینگ اَیتیشیچه، عمومی یۉریقنامهلردن تشقری، طالباننینگ ولایتلرگه عاید فرمانلری هم مطبوعات اېرکینلیگی اوچون موجود محیطنی یۉق قیلیش جریانینی ینهده کوچهیتیرگن.
چېگره بیلمس ژورنالیستلر تشکیلاتی افغانستانده یېتکرمهنی بېش ییل دوامیده چېکلش جریانیگه اشاره قیلیب، طالباندن یېتکرمه فعالیتینی ناانیق دینی، اخلاقی یاکه ملی منفعتلر توشونچهلری اساسیده چېکلهیدیگن برچه قاعدهلرنی بېکار قیلیشنی سۉرهگن.
اوشبو تشکیلات مذکور قاعدهلر مجموعهسی مستقل یېتکرمه فعالیتی اوچون شرایطنی ینهده تارهیتیرگنی و افغانستانده مطبوعات اېرکینلیگینی جدّی معمالرگه دچار قیلگنیدن آگاهلنتیردی.
