سابق حربیلر نینگ مقصدلی قاتللیکلری؛ طالبان تۉرت آی ایچیده ۱۰ کیشینی اۉلدیردی
نیما
سۉنگگی تۉرت آیدن کمراق وقت ایچیده طالبان افغانستان نینگ سکیز ولایتیده، کمیده ۱۰ سابق حربینی اۉلدیرگن. بو شخصلر، غور، هرات، بدخشان، خوست، کابل، بغلان، کندز و تخار ولایتلریده نشانگه آلینگن. گزارش نتیجه‌لری شونی کۉرسه‌ته‌دیکی، اۉلدیریلگنلر نینگ ایریملری یقینده ایراندن قیتگن بۉلگن، اکثریتی اېسه طالبان نینگ استخبارات بۉلیمی تامانیدن مقصدلی روشده یۉق قیلینگن. محلی منبعلر بو قاتللیکلر نینگ مسوولیتینی طالبانگه یوکلب، کۉپلب حالتلرده گروه نینگ اۉز قیلمیشینی «نامعلوم قوراللنگن شخصلر»گه یوکلشگه اورینه‌یاتگنینی تأکیدله‌دی.گزارش نتیجه‌لری ینه شونی قید اېته‌دیکی، سابق حربیلر اسد آییدن جاری ییل نینگ ۲۴ عقربیگچه بۉلگن مدتده غور، هرات، بدخشان، خوست، کابل، بغلان، کندز و تخار ولایتلریده طالبان تامانیدن اۉلدیریلگن. منبعلرگه کۉره، ایریم سابق حربیلر بې‌واسطه آتیب تشلنگن، باشقه‌لری اېسه حبسگه آلینگندن سۉنگ اۉلدیریلگن.
سابق حربیلر نینگ قرینداشلری و محلی منبعلر طالباننی بې‌واسطه مسوول دېب بیلیب، کۉپلب اۉلدیریلگنلر بۉییچه مسوولیتنی نامعلوم قوراللیلرگه یوکلش عملیاتی دوام اېته‌یاتگنینی بیلدیردی. منبعلر تأکیدله‌گنیچه، اۉلدیریلگنلر نینگ ایریملری یقینده ایراندن قیتیب، طالبان اعلان قیلگن «عمومی عفو»گه ایشانیشگن، بیراق گروه اولرگه قرشی قصد آلیش کمپاینینی دوام اېتتیرگن و عادی حیاتگه قیتگن سابق حربیلرنی نشانگه آلگن.
گزارشگه کۉره، اۉتگن هفته تخار ولایتی نینگ تالقان شهریده سابق حربی، وحید اۉلدیریلگن و اونینگ جسدی «مال‌بازار» حدودیدن تاپیلگن. منبعلر نینگ بیلدیریشیچه، او چال تومنی نینگ «ماندره» قیشلاغیده یشه‌گن و بیر آی آلدین اویلنگن اېدی. محلی منبعلر بو قاتللیک اوچون طالباننی مسوول دېب حسابله‌یدی.
محلی منبعلر آلدین معلوم قیلیشیچه: سابق ۳۰۳ پامیر زونی نینگ قوماندانی داوود داوود نینگ سابق قۉریقچیسی «کمین جان» جاری ییل نینگ عقرب آیی باشیده تخار ولایتی نینگ فرخار تومنیده‌گی «چشمه گرمک» حدودیده طالبان تامانیدن اۉلدیریلگن. منبعلر تصدیقلشیچه، او طالبان استخباراتی تامانیدن یۉق قیلینگن و قاتللیک نینگ مسوولیتی نامعلوم قوراللیلرگه یوکلنگن.
گزارش نتیجه‌لری ینه شونی کۉرسه‌ته‌دیکی، غور ولایتیده سابق حربی محسن ایکی مرته حبسگه آلینگنیدن کېین جاری ییل نینگ ۴ – اسد کونی اۉلدیریلگن. منبعلر نینگ بیلدیریشیچه، اونینگ عایله‌سی فقط اوچ کوندن کېین بو واقعه‌دن خبردار بۉلگن. محسن سابق ملی خوفسیزلیک خدمتی اعضاسی بۉلیب، حکومت قوله‌شی آرتیدن طالبان استخباراتی تامانیدن حبسگه آلینگن اېدی. او ۱۴۰۳- ییلده ینه قیته حبسگه آلینیب، آلتی آیلیک قماقدن سۉنگ آزاد قیلینگن.
سابق حربیلرگه قرشی قاتللیکلر دوامیده طالبان «گل‌والدین»نی خوست- گردیز یۉلیده اۉلدیرگن. منبعلرگه کۉره، بو واقعه جاری ییل نینگ ۲۴ سرطان کونی صادر بۉلگن و گروه مسوولیتنی ینه نامعلوم قوراللنگن شخصلرگه یوکله‌گن. منبعلر تأکیدلشیچه، «گل‌والدین» سابق حکومت دوریده چېگره پولیسی خادیمی بۉلگن، بیراق حکومت قوله‌شی آرتیدن تۉرت مینگ افغانی آیلیک عوضیگه تاووغ فارمیده ایشله‌یاتگن اېدی.
گزارشگه کۉره، بغلان مرکزیده‌گی بغلان مرکزی تومنی نینگ شهره‌کهنه حدودیده یشه‌گن سابق حربی «فیض محمد» هم طالبان تامانیدن اۉلدیریلگن. محلی منبعلر جمعه کونی، ۴- میزان کونی، اونینگ سابق حکومت نینگ ترتیب- انتظام (نظم عامه) افسری بۉلگنینی تصدیقله‌دی. منبعلرگه کۉره، او طالبان قیته حاکمیتنی اېگه‌له‌گچ ایران تامان قاچگن، بیراق بیر نېچه آی آلدین جبردن رد قیلینگن و قیتگچ بیر مدت کابلده یشه‌گن، سۉنگ توغیلگن قیشلاغیگه قیتگن؛ عاقبتده او کېچه‌سی، اویی یانیده اۉلدیریلگن.
محلی منبعلر نینگ ۱ -میزان دوشنبه کونی بېرگن معلوماتیگه کۉره، بدخشان ولایتی نینگ نسی تومنیده بیر سابق حربی طالبان تامانیدن قییناققه سالینگندن سۉنگ اۉلدیریلگن. منبعلر ایتیشیچه، بو سابق حربی نینگ اسمی عبدالرشید بۉلیب، او نسی تومنی نینگ غومی شاخدره قیشلاغاینینگ اهالیسی آره‌سیدن اېدی. منبعلرگه کۉره، او اولگی افغانستان حکومتی نینگ ملی خوفسیزلیک خدمتی خادیمی بۉلگن و طالبان حاکمیتنی اېگه‌له‌گچ، ایران تامانیگه پناه ایزلب کېتگن اېدی.
سابق حربیلرگه قرشی زنجیرسیمان سوءِقصدلر دوام اېتیب، منبعلر ۳۰- سنبله یکشنبه کونی بېرگن معلوماتده ایتیشلریچه،گل‌آقا جلالی، هرات ولایتی نینگ سابق پولیس افسری، هرات شهری نواباد منطقه‌سیده نشانگه آلینیب، هلاک بۉلگن. محلی منبعلر اونینگ خدمت وقتیده اۉلدیریلگنینی بیلدیرگن. منبعلر نینگ تأکیدلشیچه، او آلدین خدمت دوریده بیر کۉزینی هم یۉقاتگن اېدی.
اوشبو گزارش نینگ تاپیلمه‌لریگه کۉره، عبدالرحمان ایماق، علی‌آباد تومنیده‌گی سابق خلق حرکتلری قوماندانی، ۱۵- سنبله جمعه کونی پیچاق ضربه‌لری بیلن اۉلدیریلگن. منبعلر اونینگ اۉلیمی اوچون طالباننی مسوول دېب بیله‌دی. معلوماتلرگه کۉره، عبدالرحمان ایماق جمهوریت قوله‌گچ، ایران تامانگه پناه ایزلب کېتگن و قیتیب کېلگنیدن سۉنگ اۉلدیریلگن.
منبعلر۱۰- سنبله دوشنبه کونی معلوم قیلیشیچه، طالبان آلدین حکومت نینگ مخصوص قطعه افسری ولید نعیمینی اۉلدیرگن. منبعلرگه کۉره، بو سابق حربی پنجشیر ولایتیدن بۉلگن و او ۱۵ کون یۉقالگنیدن سۉنگ، جسدی طالبان نینگ طب-عدلیه بۉلیمیده تاپیلگن.
۸صبح گزېته‌سی و بیر نېچته باشقه ییتکرمه‌لر نینگ قۉشمه تېرگاو نتیجه‌لری شونی کۉرسه‌ته‌دیکی، ۲۰۲۳-ییلدن ۲۰۲۵ -ییل نینگ یرمیگچه کمیده ۱۱۰ سابق حربی اۉلدیریلگن و اولردن ۱۸ ته‌سی جاری ییل نینگ یېتی آییگه تۉغری کېله‌دی. آلتی آی دوامیده تیارلنگن اوشبو گزارشده، امریکا حربیلری بیلن بیرگه خدمت قیلگن سابق عسکرلرگه نسبتاً اۉنلب قییناق و اۉلدیریش حالتلری حجتلشتیریلگن. شونینگدېک، مخصوص عملیاتلرده اشتراک اېتگن اولگی مخصوص خوفسیزلیک بۉلینمه‌لری نینگ آلتی اعضاسی نینگ اۉلیمی و ایکی اعضاسی نینگ قییناققه سالینگنی حقیده باتفصیل معلومات قید اېتیلگن. اوشبو عسکرلر مخصوص تیارگرلیکدن اۉتگن و امریکا کوچلری بیلن بیرگه‌لیکده تروریسمگه قرشی عملیاتلرده اشتراک اېتگن.
افغانستان آزادلیک جبهه‌سی نینگ معلوم قیلیشیچه، اۉتگن تۉرت ییل ایچیده طالبان اولگی حکومت نینگ حربی تیزیمیده فعال بۉلگن ۳۰ کیشی عیالنی اۉلدیرگن. جبهه، ۲۵- اسد شنبه کونی ترقه‌تگن گزارشیده تأکیدله‌گنیدېک، فقط بیر ییل دوامیده طالبان ۲۰۹ سابق حربینی نشانگه آلیب اۉلدیرگن. جبهه نینگ بیاناتیگه کۉره، بو شخصلر مملکت نینگ ۳۰ ولایتیده اۉلدیریلگن، بوندن تشقری، طالبانگه علاقه‌دار قوراللی شخصلر تامانیدن ۱۴۵ سابق حربی حبسگه آلینگن، قماققه تشلنگن و قییناققه سالینگن.
بیرلشگن ملتلر تشکیلاتی نینگ افغانستاندهگی یاردم هیاتی (یوناما) اۉز گزارشیده سۉنگگی اوچ آی ایچیده یېتی سابق حربی نینگ اۉلدیریلگنینی حجتلشتیرگنینی معلوم قیلدی. یوناما ۱۹- اسد یکشنبه کونی بیلدیرگن معلوماتیگه کۉره، اوشبو حالتلر جاری ییل نینگ ۱- اپرېلیدن ۳۰- جونیگچه قید اېتیلگن. یوناما ینه شونی قۉشیمچه قیلدیکی، شو دورده سکیز سابق حربی ناقانونی روشده حبسگه آلینگن و ینه اوچ نفری قییناققه سالینگن.
